ZAJ NYEEM HNUB TIM 19 LUB 8 HLI 2025
HNUB NCO TXOG LEEJ NTSHIAB ZAM AWS DES
COV LUS NYOB HAUV MAS TAIS NTAWV MOO ZOO (MT 19: 23-30)
Kwv tij, hnub no peb yuav hais ua 2 ntu.
Ntu ib yog hais txog tus nplua nuj ceeb laj mus tau hauv Ntuj lub Ceeb Tsheej, thiab ntu 2 yog hais txog tus tso txhua yam tsev ces nws raws Huab Tais Yes Xus mus mas nws tau dab tsi.
Thuam tus hluas nplua nuj hnov Huab Tais Yes Xus cov lus hais kom nws muab nws cov cuab tam pub rau cov neg pluag, mas nws ntxhov siab, ces nws rov mus tsev, vim nws tsis muaj cuab kav yuav nrauj tau nws lub cuab tam, nws yuav pub tas nws lub cuab tam nws muaj rau lwm tus tsis tau.
Kwv tij, hnub no Huab Tais Yes Xus thiaj hais rau cov thwj tim tias “Tus neeg nplua nuj ceeb laj nkag mus hauv Ntuj lub Ceeb Tsheej.”
Kwv tij Hmoob sawv daws, thaum nej hnov Huab Tais Yes Xus hais tias ib tug neeg nplua nuj yuav ceeb laj nkag mus hauv Ntuj lub Ceeb Tsheej mas nej xav li cas? Thiab yog vim li cas Huab Tais Yes Xus thiaj hais li ntawd? Puas yog Huab Tais Yes Xus tsis nyiam cov neeg nplua nuj?
Tos Huab Tais Yes Xus hais zoo li ntawd, vim tias nyob rau lub caij ntawd mas cov neeg muaj neeg nplua nuj mas lawv muab lawv lub siab dai dhuam rau lawv tej cuab tam. Thiab lo lus ‘nplua nuj’ tsis yog hais txog nyiaj txiag xwb, tseem hais txog ‘suab npe’, ‘hwj chim’, ‘kev ntshaw’ thiab. Yog li mas tus neeg twg nws saib tej yam li hais los no loj dua txoj kev nyiam lwm tus, lawv nrhiav tej li hais no ua ntej nrhiav Tswv Ntuj, mas yog nws ceeb laj mus tau hauv Ntuj Ceeb Tsheej.
Kev nplua nuj tseem yuav ua rau peb lub siab cuaj khaum. Muab xav saib, yog peb hais kom tus neeg muaj ib puas thiab tus muaj ib txhiab, nkawd tso nkawd cov nyiaj kom tas rau hauv lub hnab nyiaj, tus twg yuav khuv xim dua. Muaj tsawg tsawg tus neeg muaj ib puas yuav khuv xim dua tus muaj ib txhiab.
Kev raws Huab Tais Yes Xus qab kuj yuav zoo li ntawd, tus neeg cuaj khaum nws lub neej, nws khuv xim lub sij hawm muab rau Huab Tais Yes Xus, mas nws ceeb laj raws tau Huab Tais Yes Xus qab. Yog li mas cov kwv tij Hmoob, peb yuav ua neeg pluag, tsis txhob khuv xim peb lub sij hawm, tsis txhob khuv xim peb lub zog ua cov hauj lwm sib nyiam sib hlub, txhob khuv xim peb lub tswv yim kawm Huab Tais Yes Xus cov lus qhia.
Thaum peb hnov Huab Tais Yes Xus hais tias Tus neeg nplua nuj ceeb laj nkag mus hauv Ntuj lub Ceeb Tsheej”, mas peb txhob xav tias “Kuv yog neeg pluag txom nyem, kuv tsis tas yuav nyiam yuav hlub lwm tus, kuv tsis tas yuav nrhiav Tswv Ntuj, kuv kav tsij ua tiag nrhiav noj yug kuv lub plab lub cev xwb, vim Huab Tais Yes Xus tsis tau hais tias cov neeg pluag txom nyem li kuv no ceeb laj mus tau hauv Ntuj lub Ceeb Tsheej.”
Txhob xav li no, tsam yuam kev.
Huab Tais Yes Xus hais tias ib tug ntxhuav yuav nkag hauv ib lub qhov koob mas tseem yooj yim dua ib tug neeg nplua nuj mus hauv Ntuj lub Ceeb Tsheej. Qhov tseeb mas tsis yog neeg nplua nuj xwb, txhua tus neeg yeej ceeb laj mus tau hauv Ntuj lub Ceeb Tsheej. Huab Tais Yes Xus cov thwj tim los lawv kuj xav li ntawd, lawv thiaj hais tias yog li leej twg thiaj yuav tau txais kev cawm.
Kwv tij Hmoob, yog peb vam txog peb lub tswv yim los peb rab peev xwm xwb mas peb yeej yuav mus tsis tau hauv Ntuj lub Ceeb Tsheej kiag li. Tab sis vim Huab Tais Tswv Ntuj hlub peb, mas Huab Tais Tswv Ntuj thiaj pub nws Leej Tub uas yog Huab Tais Yes Xus tuaj ua txoj kev coj peb mus kom txog Ntuj lub Ceeb Tsheej, tsuav yog peb ntseeg thiab tso siab rau Huab Tais Yes Xus.
Thaum ntawd, cov thwj tim ntseeg thiab tso siab rau Huab Tais Yes Xus tias Huab Tais Yes Xus yuav yog tus cawm lawv, ces lawv tso vaj tse, tso niam tso txiv, tso poj niam me nyuam, tso lawv cov hauj lwm los raws Huab Tais Yes Xus.
Pob Zeb xav paub tias lawv tso tas txhua yam pov tseg kom tau raws Huab Tais Yes Xus, mas lawv yuav tau dab tsi?
Huab Tais Yes Xus teb tias “Nej mas nej yuav tau zaum saum cov His Xas Lais 12 lub theej kiab. Nej yuav tau txais tas txhua yam nej tau tso pov tseg ntawd, thiab tseem tau ntau tshaj qhov nej tso pov tseg. Nej kuj tseem yuav tau txais txoj sia nyob mus li.”
Lawv ntseeg tias Huab Tais Yes Xus yog tus Pleev cawm haiv His Xas Lais. Huab Tais Yes Xus yog tus yuav sawv ua vaj His Xas Lais, ces lawv yuav muaj koob nto npe, zaum ntawm tus vaj His Xas Lais ib sab. Lawv to taub tias Huab Tais Yes Xus hais txog lub neej nyob hauv ntiaj teb no.
Nyem no peb paub lawm tias Huab Tais Yes Xus tsis yog hais txog lub neej nyob ntiaj teb no, tab sis Huab Tais Yes Xus hais txog lub neej tom qab peb tso lub ntiaj teb no tseg. Tus twg nws ua neej nyob, nws tso nws cov cuab tam tseg vim txoj kev ntseeg txog Huab Tais Yes Xus, mas nws yuav tau txoj sia nyob mus li nyob saum ntuj, nws yuav tau nws cov cuab tam nyob saum ntuj.
Nyob zoo sawv daws.
