Zaj nyeem hnub tim 19 lub 2 hlis 2026
Hnub Tsib tom qab hnub Txais Tshauv
Cov lus nyob hauv Lus Kas Ntawv Moo Zoo (LK 9:22-25)
Kwv tij sawv daws, yav thaum ub Mais Xes tau muab 2 txoj kev rau tsoom His Xas Lais Xaiv, yog txoj kev ciaj sia thiab txoj kev tuag. Yog lawv mloog Tswv Ntuj cov lus qhia thiab raws Mais Xes, mas qhov kawg lawv yuav tau lub teb chaws Kas Nas Has los ua lawv tug, ces lawv yuav tau txoj sia thiab vam meej zuj zus tuaj. Vim lawv paub zoo tias, Tswv Ntuj tib leeg xwb thiaj yog tus Tswv uas yuav pub txoj sia rau lawv tau. Hos yog lawv tsis mloog Tswv Ntuj lus, lawv mus teev pej kum dab, ces qhov kawg lawv yuav poob rau hauv kev puas tsuaj, uas yog txoj kev tuag.
Nyem no Huab Tais Yes Xus kuj qhia meej rau peb tias, ib tug neeg yuav ib txhij xaiv ob tug tswv tsis tau. Huab Tais Yes Xus hais meej tias : “Tus xav cawm nws txoj sia mas nws yuav ua nws txoj sia ploj, hos tus nws ua nws txoj sia ploj vim kuv, mas tus ntawd yuav rov cawm tau nws txoj sia.”
Nyob rau nqe lus no, yog peb muab ua tib zoo xav mas peb yuav pom tias, tos Huab Tais Yes Xus ho hais li no, vim nws yog tus Huab Tais pub txoj sia. Peb tsis tas yuav mus nrhiav txoj sia qhov twg ntxiv lawm. Tus yuav pub tau txoj sia rau peb, kawg yog Huab Tais Yus Xus tib leeg xwb. Zoo li Huab Tais lo lus tias, kuv yog txoj kev, kuv yog qhov tseeb thiab kuv yog txoj sia. Thov kom pub txoj sia nyob mus li rau peb tsoom ntseeg sawv daws.
