ZAJ NYEEM HNUB TIM 18 LUB 8 HLI 2025
HNUB OB, LIS PIAM 20 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 19: 16-22)
Kwv tij Hmoob sawv daws, nyob hauv lub Moo Zoo hnub no muaj 2 lo lus; yog lo lus ‘qhov zoo’ thiab lo lus ‘txoj sia nyob mus li’.
Tus neeg tuaj cuag Huab Tais Yes Xus, nws nug tias nws yuav ua dab tsi zoo thiaj tau txoj sia nyob mus li. Yog nws tab tom thov kom Huab Tais Yes Xus qhia nws, saib yog ib tug neeg xav muaj txoj sia nyob mus li, mas tus neeg ntawd yuav ua qhov zoo dab tsi.
Huab Tais Yes Xus pom tias tus hluas no tseem tsis to taub tias qhov zoo yog dab tsi, Huab Tais Yes Xus thiaj hais tias “Vim li cas koj nug kuv txog qhov zoo? Tsuas muaj tib leeg xwb thiaj yog Tus Zoo.”
Huab Tais Yes Xus hais ntxiv tias yog nws xav muaj txoj sia nyob mus li, mas yuav ua raws li cov lus qhia.
Kwv tij, tus neeg ua qhov zoo, yog tus ua cov hauj lwm xis Tswv Ntuj siab nyiam. Cov Yus Das paub tias cov hauj lwm xis Tswv Ntuj siab mas yog Huab Tais 10 Lo Lus Qhia uas thaud Tswv Ntuj muab rau Mais Xes coj los ntuas cov His Xas Lais.
Tus hluas no qhia tias ib txwm los, nws ua raws nraim Huab Tais 10 Lo Lus Qhia tsis nruam ib zaug li, tab sis qhov ntawd puas tau txaus kom nws tau txoj sia nyob mus li.
Kwv tij, tus hluas cov lus mas kuj zoo li peb nyiam hais tias “Kuv ua neeg zoo, mas tom qab kuv tso ntiaj teb tseg, kuv puas yuav tau txais txoj sia nyob mus li.”
Huab Tais Yes Xus hais li cas rau nws, thiab rau peb cov muaj lus nug li hais los? Huab Tais Yes Xus hais tias “Yog koj xav kom koj zoo tshaj, mas koj rov mus muab txhua txhia yam uas yog koj tug muag. Koj muab pub rau cov pluag, ces koj yuav muaj ib lub cuab tam muaj nqis loj nyob saum ntuj. Ua qhov ntawd tas mas koj los raws kuv.”
Huab Tais Yes Xus lo lus no yog li cas? Tsis yog kom peb ua neeg zoo xwb, tseev kom peb ua neeg zoo tshaj, thiab raws Huab Tais Yes Xus.
Kwv tij, peb ua neej nyob mas peb ib tug zoo tsis thooj ib tug, peb ib tug yug los txawv ib tug. Muaj tej tus neeg yug los nyob hauv ib yim neeg nplua nuj muaj cuab tam ntau, tej tus yug los nyob hauv tsev neeg txom nyem. Muaj tej tus yug los txawj ntse muaj kev kawm txuj paub tab, tab sis muaj tej tus yug los hlawb tsis zoo tsis muaj kev kawm. Thaum peb pom tus neeg nplua nuj nyiam tsim koob hmoov tseg ntau dua tus pluag txom nyem, mas peb hais tsis tau tias nkawd ob tug no tus twg yuav yog tus neeg zoo dua. Peb thiaj yuav muab ib tug qhov zoo mus piv rau lwm tus tsis tau. Li ntawd, tus neeg ua qhov zoo xwb, thiaj tsis yog tus yuav tau txais txoj sia nyob mus li.
Huab Tais Yes Xus hais tias thaum koj muab yam koj muaj pub rau cov neeg tsis muaj, mas yog koj tsim ib lub cuab tam nyob saum ntuj. Qhov tseem ceeb mas yog koj los raws kuv. Yog kom peb raws Huab Tais Yes Xus. Huab Tais Yes Xus ua li cas, peb yuav tau ua zoo li ntawd.
Yog li lub Moo Zoo hauv hnub no thiaj tsom kom peb pom tias tus neeg ua qhov zoo, thiab tus neeg raws Huab Tais Yes Xus sib txawv li cas.
Ntawm peb, peb yuav xaiv ua tus neeg zoo xwb, los peb yuav xaiv ua tus neeg zoo tshiab thiab raws Huab Tais Yes Xus.
Kom peb nco tias tus neeg zoo, nws ua raws Huab Tais Lo Lus Qhia. Tus neeg zoo tshaj, nws pub yam nws muaj rau cov neeg txom nyem. Tus txais txoj sia nyob mus li, nws raws Huab Tais Yes Xus.
Tus raws Huab Tais Yes Xus, nws mloog thiab yoog raws Huab Tais Yes Xus; nws ua tus neeg zoo thiab ua tus neeg zoo tshaj.
Nyob zoo.
