ZAJ NYEEM HNUB TIM 18 LUB 2 HLIS 2024
HNUB OB THAWJ LUB LIS PIAM CAIJ PLAUB CAUG
COV LUS NYOB HAUV MAS TAIS NTAWV MOO ZOO (MT 25: 31-46)
Kwv tij Hmoob sawv daws, lub lis piam no yog thawj lis piam hauv lub caij Plaub Caug. Lub caij Plaub Caug yog lub caij cia rau peb sawv daws tau tsim koob hmoov cia nyob hauv lub ntiaj teb no, mas txog hnub ntiaj teb kawg ntawm peb, peb thiaj yuav tau mus nyob pem Ntuj Ceeb Tsheej.
Hnub no Huab Tais Yes Xus qhia peb tias thaum peb tus plig tso lub cev no tseg lawd, peb yuav tau mus pom Huab Tais Yes Xus nyob ntawm lub rooj txiav txim. Huab Tais Yes Xus yuav tshuaj xwm txog peb lub neej thaum muaj sia nyob, saib peb puas tau tsim koob hmoov tseg los tsis tau. Tus neeg twg tsim koob hmoov tseg cia mas nws yuav mus nyob pem Ntuj, tus neeg twg tsis tau tsim koob hmoov mas nws yuav poob rau hauv dab phem cov hluav taws.
Kwv tij Hmoob, peb yuav tsim koob hmoov rau peb tau li cas?
Huab Tais Yes Xus qhia hais tias tus neeg tsim koob hmoov yog tus ‘nyiam’ lwm tus. Hauv cov lus Hmoob mas tsis muaj lo lus yuav los hais tau kom ntxaws ntxaws txog lo lus ‘nyiam’ uas Huab Tais Yes Xus qhia. Lo lus no kuj tsis yog ‘hlub’ thiab.
Tiam sis lo lus Huab Tais Yes Xus hais txog mas yog thaum peb pom lwm tus txom nyem, ces peb lub siab hlub tus neeg ntawd, peb thiaj ua cov hauj lwm los nyiam tus neeg txom nyem ntawd.
Huab Tais Yes Xus xav kom peb to taub mas nws thiaj hais tias “Thaum nej pom ib tus neeg twg tshaib plab, nej hlub nws ces nej cev mov rau nws noj. Thaum nej pom ib tug neeg txom txom nyem tsis muaj zoo khaub ncaws hnav, nej lub siab hlub nws ces nej pub khaub ncaws zoo rau nws hnav. Thaum nej pom ib tug neeg raug mob ces nej hlub nws, nej mus xyuas mus pab tu nws. Thaum nej ua li no mas yog nej nyiam tus neeg ntawd, yog nej tab tom nyiam kuv.” Thaum peb ua li no mas yog peb tsim koob hmoov tseg, ces Huab Tais Yes Xus yuav hais rau peb tias “Nej yog cov kuv Txiv pub txoj hmoov zoo rau.”
Kwv tij Hmoob, lub caij Plaub Caug no, peb yuav kub siab ua hauj lwm sis nyiam sis hlub li Huab Tais Yes Xus tos kom peb ua mog.
Nyob zoo sawv daws.
