ZAJ NYEEM HNUB TIM 16 LUB 12 HLIS 2025
HNUB NCO TXOG COV TIM KHAWV NYOB XOOV KHOOS
COV LUS NYOB HAUV MAS TAIS NTAWV MOO ZOO (MT 21: 28-32)
Kwv tij sawv daws, kev ua raws li yus lo lus hais, yog tias, peb lub ncauj lam lees tias peb yuav ua, tiam sis peb tsis ua raws, ces kuj tsis muaj nuj nqis dab tsi. Tab sis, kev ua hauj lwm kuj tsis tseem ceeb yog peb tsis muab siab rau ua thiab yog tsis zoo siab ua tiag tiag. Qhov no yog lub siab uas Huab Tais Tswv Ntuj qhia kom peb ua. Kev tig los yuav lub siab tshiab, tsis muaj qab hau yog peb tsis muab siab rau, los yog peb tsis npaj siab tiag tiag. Yog peb lub ncauj lam hais tias, peb yuav hloov siab, tiam sis, peb tseem coj peb tus cwj pwm li qub, peb tseem niaj hnub ua txhaum li qub, ces tsis muaj nuj nqis dab tsi rau Tswv Ntuj. Kev hloov siab thiab tig los nrhiav Tswv Ntuj, yog qhov uas peb yuav tsum hloov peb tus kheej thiab tig los fim nrog peb tus Tswv Ntuj, peb lub neej yuav tsum hloov mus rau qhov zoo, peb yuav tsum tig nrob qaum rau txoj kev ua txhaum. Qhov uas yuav pab kom peb ua tau ntawd, yog peb yuav tsum ua neeg me, peb los lees peb lub txim, thiab thov txim ntawm Tswv Ntuj, thov kom Ntuj zam txhaum rau peb, thiab peb txhob tig rov mus ua txhaum lawm, ces Tswv Ntuj thiaj yuav cawm tau peb.
