ZAJ NYEEM HNUB TIM 15 LUB 6 HLI 2026
HNUB OB, LIS PIAM 11 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 5: 38-42)
Kwv tij Hmoob, nyob hauv cov Yus Das, lawv qhia tias ‘Qhov muag pauj qhov muag, kaus hniav pauj kaus hniav”, mas yog lawv qhia kom sawv daws ua qhov ncaj. Koj ua raug luag nqaij ntuag ntshav nrog, mas koj yuav tsum raug plua them raws li tus nqe. Koj nyiag luag cuab tam, mas koj tsum nrhiav los rau lawv, los yog cia luag ntaus nqe saib raug li cas, ces koj them rau.
Tsis yog cov Yus Das xwb, tas ntiaj teb yeej txiav li ntawd, vim qhov no yog qhov ncaj.
Hnub no Huab Tais Yes Xus qhia qhov loj tshaj ntawd, yog Huab Tais Yes Xus qhia kom peb txav deb txoj kev ua tus neeg phem.
Nyob hauv cov Yus Das thiab ntau haiv neeg, yog koj yuas txhais tes xis ib ncuav pias tus twg sab plhu xis, mas txhais tias koj saib tsis taus tus neeg ntawd. Yog li mas leej twg ib npuaj koj sab plhu xis, yog tus ntawd tab tom sab tsis taus koj. Li ntawd, Huab Tais Yes Xus tab tom qhia peb tias yog luag saib tsis taus koj, luag thuam koj, los koj ua twj ywm,
Huab Tais Yes Xus hais tias leej twg xav ua plaub rau peb kom tau peb lub tsho, mas peb muab peb lub tsho tshaj sab ntxiv rau nws thiab, mas yog Huab Tais Yes Xus qhia peb kom ua neeg siab dav rau tus neeg xav ua phem rau peb.
Yog muaj neeg thov peb xa nws mus ib ncuas kev, mas peb nrog nws mus ob ncuas, yog Huab Tais Yes Xus qhia kom peb txaus siab ua hauj lwm pab luag, tsis hais luag thov los yuam yus.
Huab Tais Yes Xus xav kom peb ua li ntawd, mas peb thiaj zam tau kev ua neeg phem, peb thiaj li yuav nyob sib haum xeeb nrog luag tej.
Nyob zoo sawv daws.
