ZAJ NYEEM HNUB TIM 14 LUB 10 HLI 2024
HNUB NCO TXOG LEEJ NIAM VAJ QHIA KAS LIS TUS
COV LUS NYOB HAUV LUS KAS NTAWV MOO ZOO (LK 11: 29-32)
Kwv tij Hmoob sawv daws, hnub no nej tau hnov Huab Tais Yes Xus hais txog Yos Nas lub cim. Yos Nas lub cim yog dab tsi? Yog Yos Nas nyob hauv tus vaj ntses plab, ces hnub peb tus vaj ntses mam ntuav Yos Nas tawm los.
Kwv tij, zaj kwv huam Yos Nas piav tias Huab Tais Tswv Ntuj pom lub tsheej Nis Nis Vas ua phem ua tsis zoo, ces Huab Tais Tswv Ntuj txib Yos Nas mus ceeb toom Tswv Ntuj cov lus rau lub tsheej. Yos Nas tsis xav kom Huab Tais Tswv Ntuj khuv leej cov neeg hauv lub tsheej Nis Nis Vas ces Yos Nas tsis kam mus, nws sawv khiav mus kom deb ntawm Huab Tais Tswv Ntuj. Thaum Yos Nas tab tom nyob saum lub nkoj, Huab Tais Tswv Ntuj tso cua hlob tuaj ntsawj lub nkoj ua lub nkoj yuav luag tawg, cov ntswj nkoj ntaus kuam saib yog leej twg coj xwv txheej tuaj, ces raug Yos Nas.
Yos Nas hais rau lawv kom muab nws pov rau hauv hiav txwv, ces dej yuav tus. Lawv thiaj ua raws li Yos Nas hais.
Huab Tais Tswv Ntuj tsis pub kom Yos Nas tuag mas Huab Tais Tswv Ntuj thiaj tso tus vaj ntses tuaj nqos Yos Nas mus nyob hauv tus vaj ntses lub nplab. Yos Nas nyob hauv tus vaj ntses lub nplab, nws teev Ntuj ces hnub peb, Huab Tais Tswv Ntuj hais rau tus vaj ntses kom ntuav Yos Nas rau tim ntug dej.
Huab Tais Tswv Ntuj rov txhib Yos Nas ib lwm kom mus ntuas tsoom neeg hauv lub tsheej Nis Nis Vas kom lawv tu siab rau lawv cov txhaum. Zaum no Yos Nas ua raws li Huab Tais Tswv Ntuj txib nws mus. Cov neeg hauv Nis Nis Vas mloog Yos Nas cov lus ces lawv tsis raug xwv txheej.
Kwv tij Hmoob, qhov no yog zaj piav txog Yos Nas yog lub cim rau cov neeg nyob Nis Nis Vas pom, ces lawv tu siab rau lawv cov txhaum thiab hloov siab tshiab, lawv tsis raug Huab Tais Tswv Ntuj nplua.
Huab Tais Yes Xus ne, nws lub cim yog dab tsi? Yog Huab Tais Yes Xus tuag mus zwm av 3 hnub ces nws sawv rov los muaj txoj sia tshiab. Huab Tais Yes Xus ua lub cim rau tiam neeg nrog Huab Tais Yes Xus ntawd, yog lawv ntseeg txog Huab Tais Yes Xus mas lawv yuav tsis raug xwv txheej xws li cov neeg nyob Nis Nis Vas ntseeg Yos Nas ces lawv tsis raug xwv txheej.
Niaj hnub no, peb kuj yuav ntseeg txog Huab Tais Yes Xus, peb ntseeg tias Huab Tais Yes Xus tuag thiab sawv rov los muaj txoj sia tshiab tiag. Peb hais tias yog ‘ntseeg txog kev sawv rov los’. Peb ntseeg txog kev sawv rov los, mas peb thiaj tsis ntshai txoj kev tuag xws li lub neej thaum tseem tsis tau ua ib tug neeg ntseeg Ntuj, vim nyem no peb paub lawm tias ‘kev tuag’ yog lub qhov rooj peb hla mus txais txoj sia tshiab. Txoj sia nyob nrog Huab Tais Tswv Ntuj saum Ntuj Ceeb Tsheej, los txoj sia nyob hauv dab phem cov hluav taws.
Peb xaiv tau, saib peb yuav txoj sia tshiab zoo li cas!
