ZAJ NYEEM HNUB TIM 13 LUB 1 HLIS 2025
HNUB NCO TXOG LEEJ NTSHIAB HIS LAS YUS
HN 1: 1-6, MK 1: 14-20
Kwv tij Hmoob zoo nyiam, hnub no yog thawj lub lis piam hauv lub caij Nyob Nruab Xyoo. Lub caij Nyob Nruab Xyoo yog ib lub caij ntev rau peb tsoom neeg ntseeg tau mloog Huab Tais Yes Xus cov lus cawm ntiaj teb neeg thiab mloog Leej Ntuj Plig Ntshiab ua hauj lwm nyob hauv tsoom ntseeg lub siab.
Hnub no peb tau hnov thawj zaj nyeem yog cov lus hauv tsab ntawv sau mus rau cov Hes Nplaws hais tias puag thaum ub, Tswv Ntuj kom cov Yaj Saub siv ntau txoj kev los cev nws cov lus rau peb cov yawg koob ntau zaus kawg. Lub zim txwv no, Tswv Ntuj tso nws Leej Tub tuaj cev Tswv Ntuj cov lus rau peb. Tswv Ntuj tsa Leej Tub ua tus txais lub cuab tam tas huv tib si, thiab nws nrog Leej Tub tsim lub sim ceeb. Leej Tub yog Tswv Ntuj lub hwj chim ci ntsa iab, yog Tswv Ntuj tus duab. Leej Tub lo lus muaj zog, Leej Tub nres tas lub sim ceeb huv tib si. Leej Tub ntxuav txhua txoj kev txhaum pov tseg tas huv tib si, ces nws zaum ntawm tus Tswv Ntuj muaj hwj huam sab xis nyob txheej ntuj saud.
Nyob hauv Yes Xus lub Moo Zoo raws li Leej Ntshiab Mas Kos khaws tseg mas yog piav txog thaum Huab Tais Yes Xus pib leg Tswv Ntuj txoj hauj lwm cawm ntiaj teb neeg, Huab Tais Yes Xus tau mus hu Xis Moos Pob Zeb, As Nres, Yas Kos, thiab Zam. Yes Xus hais tias “Tswv Ntuj lub Ceeb Tsheej los txog ze lawm; nej hloov siab, nej ntseeg txog lub Moo Zoo, nej raws kuv mus.”
Lo lus no yog lo lus Huab Tais Yes Xus tab meeg hais rau peb txhua tus neeg nyob hauv lub caij Nyob Nruab Xyoo hauv lub xyoo tshiab no.
Huab Tais Yes Xus hu kom peb tig los ua Yes Xus cov thwj tim!
Kwv tij, thaum yus hais rau tus neeg twg tias “Koj raws kuv” mas txhais tau tias kom tus ntawd ua raws li yus hais, tsis yog kom nws cav ncauj thiab huas ua yus ntej.
Thaum Huab Tais Yes Xus hais rau lawv 4 tug tias “Nej raws kuv mus” mas thiaj yog Huab Tais Yes Xus hais tias “Nej mloog thiab ua raws li kuv tau ua thiab qhia nej mog.”
Muaj ib zaug Huab Tais Yes Xus hais tias tus xav ua Yes Xus thwj tim mas kom nws nrauj tus kheej thiab kwv nws tus ntoo cuam lawv Yes Xus qab. Huab Tais Yes Xus lo lus no thiab lo lus tias ‘Nej raws kuv mus’ yog tib lub ntsiab. Li ntawd, hnub no Huab Tais Yes Xus txhib peb kom muab luag tej saib ua qhov loj dua yus tus kheej, peb yuav tau muab Tswv Ntuj ua qhov loj tshaj txhua yam, peb yuav zoo siab ris txhua tsav yam xwv txheej tuaj raug peb xws li Huab Tais Yes Xus tau ua piv txwv rau peb pom.
Nyob hauv lub Moo Zoo, peb pom tias Xis Moos Pob Zeb thiab nws tus kwv As Nres, nkawd tso plhuav lub vas ntses tseg; peb pom tias Yas Kos thiab Zam, nkawd tso nkawd txiv tseg. Lawv cia li raws Huab Tais Yes Xus mus.
Xis Moos Pob Zeb, As Nres, Yas Kos, thiab Zam; lawv tso lawv lub qub neej pov tseg, lawv tso lawv cov hauj lwm nrhiav noj pov tseg, lawv tso lawv qhov chaw vam pov tseg; lawv tso siab thiab ruaj siab rau Huab Tais Yes Xus lo lus tias “Kuv yuav muab neb hloov ua tub puav neeg.”
Lawv ruaj siab tias lawv raws Huab Tais Yes Xus mus mas muaj ib hnub lawv yuav tau lub neej tshiab zoo dua qub, lawv yuav tau ua txoj hauj lwm tseem ceeb dua, lawv yuav tau qhov chaw vam zoo dua tuaj.
Lawv ntsia tsis pom tias tej ntawd yuav zoo li cas tab sis lawv tso siab rau Huab Tais Yes Xus.
Kwv tij zoo nyiam, lub caij Nyob Nruab Xyoo yog lub caij cia peb mloog Huab Tais Yes Xus cov lus cawm neeg thiab mloog Leej Ntuj Plig Ntshiab ua hauj lwm nyob hauv cov ntseeg lub siab, li ntawd lub caij no thiaj yog lub caij peb txais Huab Tais Yes Xus lub Moo Zoo los yug peb thiab cia Leej Ntuj Plig Ntshiab ua hauj lwm hauv peb kom peb lub siab ntseeg hlob loj tuaj. Yog li mas peb tsoom neeg ntseeg twb yog cov Huab Tais Yes Xus hu los raws Huab Tais Yes Xus, los ua Yes Xus cov thwj tim lawm, tsim nyog peb yuav tau tso lub qub neej tseg, tso peb tus kheej kev ntshaw tseg, peb yuav tso siab rau Huab Tais Yes Xus, mloog thiab ua raws li Huab Tais Yes Xus cov lus hauv lub Moo Zoo.
