ZAJ NYEEM HNUB TIM 12 LUB 10 HLI 2024
HNUB XYA LUB LIS PIAM 27 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 11: 27-28)
Cov kws tij Hmoob, nej yuav pom tias thaum muaj ib tug neeg nws ua ib yam dab tsi zoo, mas sawv daws yuav hais tias tus ntawd yog leej twg me nyuam ne! Nws niam nws txiv yog leej twg, ua cas nws niam nws txiv yuav txawj qhuab qhia nws ua luag! Nws niam nws txiv mas muaj hmoo tiag tiag uas yug tau ib tug me nyuam zoo li nws!
Kwv tij, thaum Huab Tais Yes Xus tshaj lub Moo Zoo thiab kho cov neeg mob kom zoo, mas ib txhia yeej yuav cav txog Huab Tais Yes Xus caj ces xws li hais los no. Hnub no, peb hnov muaj ib tug poj niam tsa suab hais nrov nrov tias “Lub plab uas tau nqa koj thiab lub xub ntiag uas pub mis rau koj tau txoj hmoov zoo!”
Lo lus no txhais tias “Tus poj niam xeeb koj thiab tus koj hlob, mas nws tau txoj hmoov zoo, vim tias nws tus me tub yog ib tug tau Tswv Ntuj lub txiaj ntsim, yog ib tug muaj Tswv Ntuj lub hwj huam roos nws.”
Yog tus poj niam no tab tom cav lus zoo txog Huab Tais Yes Xus niam uas yog Mab Liab.
Yog kawg cov kwv tij Hmoob, niam Mab Liab yog tus tau txoj hmoov zoo tiag tiag li. Tab sis hnub no Huab Tais Yes Xus qhia ib yam ntxiv tias tsis yog niam Mab Liab ib leeg thiaj tau txoj hmoov zoo xwb, sawv daws puav leej tau txoj hmoov zoo.
Huab Tais Yes Xus hais tias “Tus tau txoj hmoov zoo, yog tus mloog Tswv Ntuj Lo Lus thiab ua raws li Tswv Ntuj Lo Lus.”
Kwv tij Hmoob, niaj hnub no peb yog cov tau txoj hmoov zoo tiag, yog peb mloog Tswv Ntuj Lo Lus hauv phau Ntawv Ntshiab thiab peb coj Tswv Ntuj Lo Lus mus ua raws nyob hauv peb lub neej. Tab sis yog peb mloog Tswv Ntuj Lo Lus xwb tsis ua raws mas peb kuj yuav tsis tau txoj hmoov zoo dab tsi. Li ntawd mas thov kom peb tsoom Hmoob sawv daws, thaum nej hnov Tswv Ntuj Lo Lus lawm, nej khaws mus xav thiab muab lo lus yug nej txoj sia, nej mus ua raws li Lo Lus ntawd, ces Tswv Ntuj Lo Lus yuav txi txiv nyob hauv nej, nej thiaj yuav tau txoj hmoov zoo mog.
