ZAJ NYEEM HNUB TIM 11 LUB 8 HLI 2025
HNUB NCO TXOG LEEJ NTSHIAB KAJ
COV LUS NYOB HAUV MAS TAIS NTAWV MOO ZOO (MT 17:22-27)
Kwv tij Hmoob sawv daws, nyob hauv cov Yus Das txoj cai, cov txiv neej nto 20 xyoo txhua tus yuav tsum them se pab lub Tuam Tsev Teev Ntuj, yog li hnub no cov sau se thiaj hais rau Pob Zeb “Nej tus Xib Hwb puas them se pab lub Tuam Tsev Teev Ntuj?”
Tos tus sau se tuaj nug li no, vim tias muaj ib txhia Xib Hwb qhia Mais Xes txoj cai tsis kam them se rau lub Tuam Tsev Teev Ntuj; lawv cav tias lawv yog tsoom pej xeem tus Xib Hwb lawm, lawv leg Tswv Ntuj txoj hauj lwm mas lawv tsis yuav them se.
Lawv ua li ntawd, mas lawv yog cov neeg zoo sab nraud raws li Huab Tais Yes Xus hais tiag.
Lawv qhia tsoom pej xeem kom them se ib feem kaum tab sis lawv tsis them.
Lawv ua puas ncaj, lawv puas ua raws li lawv cov lus?
Tej zaus tus sau se yuav xav tias Huab Tais Yes Xus yuav ntxab ntxawm li lawv. Tab sis Pob Zeb teb rau nws tias ib txwm mas Huab Tais Yes Xus yeej them se xws li tsoom pej xeem.
Huab Tais Yes Xus ua ncaj tiag.
Kwv tij, Huab Tais Yes Xus nug Pob Zeb tias “Xis Moos, koj xav li cas, cov vaj kav ntiaj teb sau se ntawm leej twg, puas yog ntawm lawv cov tub, los yog ntawm cov qhua?”
Huab Tais Yes Xus lo lus no kuj yog xav hais rau Pob Zeb tias puas tsim nyog Huab Tais Yes Xus yuav them se los tsis them.
Pob Zeb xav me ntsis, ces nws hais rau Huab Tais Yes Xus tias “Xib Hwb, lawv sau se ntawm tej qhua” txhais tias tsis tsim nyog Huab Tais Yes Xus yuav them se rau lub Tuam Tsev Teev Ntuj. Tab sis Huab Tais Yes Xus hais ntxiv rau Pob Zeb tias “Yog lawm, tab sis wb txhob ua li ntawd tsam luag to taub yuam kev. Wb yuav tsum them se xws li lwm tus.”
Kwv tij Hmoob sawv daws, yeej yog li Pob Zeb hais tiag, Huab Tais Yes Xus yog Tswv Ntuj Leej Tub, yog tus tswv lub Tuam Tsev Teev Ntuj, tsis tsim nyog Huab Tais Yes Xus yuav them se; tab sis yuav muaj puas tsawg leej ntseeg li ntawd. Yog Huab Tais Yes Xus tsis them se, mas ntshai sawv daws yuav xyav tias “Yes Xus hais tias nws tuaj ntawm Tswv Ntuj tuaj, mas nws tsis kam them se”, los yuav hais tias “Yes Xus muab Tswv Ntuj los dag kom txhob tau them se”, los yuav hais li no tias “Yes Xus qhia kom ua ncaj, tab sis ua cas nws tseem ua tus nkhaus li peb cov Xib Hwb thiab.”
Huab Tais Yes Xus tsis xav kom sawv daws to taub yuam kev li ntawd, nws thiaj hais kom Pob Zeb mus them se.
Kwv tij Hmoob sawv daws, lub Moo Zoo hnub no zoo qhia 2 yam rau peb li no:
1. Peb yuav ua tus neeg ncaj, tsis hais rau tej yam me me los tej yam loj.
2. Tab txawm peb yuav tuav ib txog hauj lwm ua rau lub Koom Txoos, los yog tshaj Ntuj Lus, los coj ib txog hauj lwm loj dua lwm tus; peb tsis txhob muab qhov ntawd los ua chaw xyeej kom peb muaj cai loj dua lawv. Peb yuav ua tus loj sib txig li sawv daws. Tshwj xeeb mas yog thaum peb mus teev Ntuj, peb txhob xav tias hnub no peb ua ib tug tub coj nkauj, los peb nqa ib cov txiv xyoob txiv ntoo tuaj txi Ntuj lawm, ces tsis yuav qee nyiaj pub rau lub tsev teev Ntuj.
Nyob zoo sawv daws.
