ZAJ NYEEM HNUB TIM 11 LUB 9 HLI 2025
HNUB TSIB, LIS PIAM 23 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 6: 27-38)
Kwv tij sawv daws, tsuas muaj txoj kev ntseeg Ntuj no xwb, thiaj qhia tias “Kom koj nyiam koj tus yeeb ncuab.” Qhov tiag kom yus txhob ntxub txhob chim, thiab zam rau luag, tso luag mus xwb yeej yog zoo kawg lawm, tab sis, Huab Tais Yes Xus cov lus qhia li peb ntsib nyob rau ntawm Yes Xus tus ntoo cuam, Yes Xus thov kom Leej Txiv zam rau lawv cov uas muab Yes Xus tua.
Yog peb ua tib zoo nyeem thiab maj mam xav tswv yim, mas peb yuav to taub tias, nws yog Leej Txiv lub siab hlub neeg, uas nws nyob hauv Huab Tais Yes Xus tus yam ntxwv, vim Huab Tais Yes Xus hais meej tias nws nyob hauv Leej Txiv thiab Leej Txiv nyob hauv nws, mas nws hlub thiab zam rau luag, hlub txog qhov kawg, hlub tus yeeb ncuab, tsis yog qhov nyuaj dhau uas peb yuav ua tsis tau, yog peb los raws Yes Xus thiab yoog raws nws tiag tiag, yog qhov uas peb yuav tsum ua, vim li cas peb ho hlub luag?
Yog peb kub siab nyeem ntawv moo zoo tiag tiag thiab soj ntsuam Huab Tais Yes Xus, mas peb yuav ntsib lo lus teb tias “Vim kuv yog Tswv Ntuj Leej Tub”.
Huab Tais Yes Xus hais meej tias nws yog Tswv Ntuj uas nyob siab Leej Tub, vim Huab Tais khuv leej neeg, nws siab zoo thiab hlub neeg, nws zam rau cov neeg phem neeg txhaum, txog qhov nws tuaj yeem muab nws txoj sia los txhiv neeg ntiaj teb huv tib si, yog peb nyeem Mas Tais ntawv Moo Zoo mas peb yuav to taub tias, Tswv Ntuj Leej Tub yog tus coj kev thaj yeeb, nws tshaj txog Ntuj lub Ceeb Tsheej thiab txoj kev nyob kaj lug kaj nrig.
Nyob zoo sawv daws.
