ZAJ NYEEM HNUB TIM 11 LUB 5 HLIS 2024
HNUB XYA LUB LIS PIAM 6 CAIJ HLA
COV LUS NYOB HAUV ZAM NTAWV MOO ZOO (Z 16: 23-28)
Kwv tij Hmoob, peb hnov Huab Tais Yes Xus hais rau cov thwj tim tias “Los txog tav no, nej tsis tau tuav txog kuv lub npe thov ib yam dab tsi li. nyem no mus, nej yuav tuav txog kuv lub npe thov, ces Leej Txiv yuav pub rau nej, vim Leej Txiv nyiam nej.”
Thaum peb hnov cov lus no, mas tej zaus peb tej tus yuav xav twj ywm hauv siab tias ‘dag xwb, kuv twb tuav txog Huab Tais Yes Xus lub npe los thov Tswv Ntuj, Tswv Ntuj twb tsis muab rau kuv raws li kuv thov’.
Thov kom peb muab coj los xav zoo zoo, saib puas muaj li peb hais tiag! Peb puas tau nyiam Huab Tais Yes Xus tas siab mas? Peb puas ntseeg txog Huab Tais Yes Xus tiag mas? Yam peb thov puas yog yam ntxim Tswv Ntuj siab mas? Los yog peb thov Ntuj tas, peb lub siab puas kaj siab tuaj mas?
Kwv tij, peb thov tsheb, Tswv Ntuj tsis yuav muab tsheb rau peb; peb thov nyiaj, Tswv Ntuj kuj tsis yuav pub tej pob nyiaj rau peb.
Qhov Tswv Ntuj muab rau peb mas yog kev kaj siab, kev zoo siab, kev ntsia pom txoj hau kev tshiab, kev tau lub tswv yim tshiab.
Kwv tij Hmoob, yog peb nyeem Ntawv Moo Zoo ntxiv mus, peb yuav pom tias hmo ntawd, Huab Tais Yes Xus ntxhov siab tas nrho, Huab Tais Yes Xus thov Leej Txiv tias “Txiv, yog koj pom zoo, thov koj tshem lub ntim no mus deb kuv. Tab sis, koj txhob ua raws li kuv xav. Koj ua raws li koj xav.”
Kwv tij Hmoob, Huab Tais Yes Xus tsis tau raws li nws xav, qhov Huab Tais Yes Xus tau txais, yog nws lub siab kaj tuaj, Huab Tais Yes Xus pom tias nws tsum txais kev txom nyem thiab kev tuag xwb, thiaj yuav cawm tau ntiaj teb neeg hauv txoj kev txhaum, ces Huab Tais Yes Xus zoo siab hlo mus txais nws tus Ntoo Cuam.
Ntawm peb, mas peb yuav ua zoo li ntawd thiab.
