ZAJ NYEEM HNUB TIM 11 LUB 10 HLI 2024
HNUB NCO TXOG LEEJ NTSHIAB VAJ QHIA ZAM 23
COV LUS NYOB HAUV LUS KAS NTAWV MOO ZOO (LK 11: 14-26)
Kwv tij Hmoob sawv daws, cov Yus Das thiab peb cov Hmoob ntseeg tias txhua yam txiab mob yog tuaj ntawm dab phem tuaj; yog peb xav kom tus mob thim los rov zoo mas peb tsum ntsiab tus dab ntawd kom tawm mus los yog Hmoob hais tias yuav tau ua neeb kho.
Nyob rau lub caij Huab Tais Yes Xus ua neej nyob, mas cov Yus Das tseem ntseeg zoo li ntawd, ces thaum Huab Tais Yes Xis kho ib tus neeg raug mob kom zoo mas lawv thiaj hais tias yog Huab Tais Yes Xus ntiab tus dab tsis huv ntawd tawm mus.
Tus muaj hwj chim ntiab tau dab mas tsuas yog tus tau txais lub hwj huam ntawm Tswv Ntuj xwb, yog li thaum lawv pom Huab Tais Yes Xus kho tau ib tug neeg mob kom zoo hlo mas lawv thiaj cav tias Huab Tais Yes Xus yog tus tuaj ntawm Tswv Ntuj tuaj, tab sis ntawm cov Fas Lis Xas mas lawv tsis hais li ntawd. Cov Fas Lis Xais ib txwm paub tias tus yuav ntiab tau dab, kho tau cov neeg mob kom rov huv tuaj mas yog tus tuaj ntawm Tswv Ntuj tuaj, tab sis yog lawv ntseeg thiab lees tias Huab Tais Yes Xus yog tus Tswv Ntuj xa tuaj, mas txij no mus lawv yuav poob hwj chim, yuav tsis muaj neeg mloog lawv ntxiv. Cov Fas Lis Xas xav li no, lawv thiaj hais rau tsoom sid tias Huab Tais Yes Xus hu txog Npes Ntxes Npus los ntiab dab vim Npes Ntxes Npus yog tus vaj dab phem tsis huv.
Kwv tij Hmoob, cov Yus Das hais tias Npes Ntxes Npus yog ib tug Tshiab qhia neeg siv toob xib thiab qhia neeg kom txawj xaiv noj tej yam txhiam xws huv, tab sis muaj ib hnub Npes Ntxes Npus mus tuaj dab phem Xas Tas tog, ces nws thiaj raug ntiab tawm hauv Ntuj Ceeb Tsheej. Npes Ntxes Npus txia ua ib tug yoov mos ntsuab, nws yam us txog twg mas nws tseb txiab mob kev nkees rau qhov ntawd, mas tus twg txais tau ces tus ntawd thiaj raug mob.
Kwv tij, thaum Huab Tais Yes Xus kho tau cov neeg mob mas cov Fas Lis Xais thiaj liam tias yog Huab Tais Yes Xus hu txog tus dab Npes Ntxes Npus los ntiab tus dab mob nkees.
Huab Tais Yes Xus xav kom sawv daws ras txog qhov tseeb mas nws thiaj hais tias yog ib tug dab rov tawm tsam ib tug dab, mas cov dab ntawd puas yuav tsa tau lawv lub ceeb tsheej.
Kwv tij, yog peb cov neeg ntseeg rov sib tawm tsam, mas peb puas yuav tsa tau Tswv Ntuj lub Ceeb Tsheej nyob hauv peb? Yeej tsis tau kiag li!
Huab Tais Yes Xus hais ntxiv tias “Thaum tus dab tawm ntawm neeg mus lawm, muaj ib hnub nws yuav rov qab los nrhiav neeg uas yog nws lub tsev, nws pom tias nyob hauv neeg mas huv thiab du lug lawm tab sis tsis muaj tus tswv tsev nyob hauv, ces tus dab mus yaum lwm tus dab los nrog nws nyob hauv lub tsev du lug uas yog neeg lub cev ntxiv, ces tus neeg ntawd yim phem tshaj qub.
Kwv tij Hmoob sawv daws, peb yuav tiv kom txoj kev phem txhob los nphav peb ntxiv tau li cas? Kawm peb tsum muaj Huab Tais Yes Xus nyob hauv peb. Huab Tais Yes Xus nyob hauv peb tau mas yog peb tsum khaub zig Huab Tais Yes Xus thiab koom nrog tsoom neeg ntseeg hlob mus ua ke nyob hauv kev tshaj lub Moo Zoo.
