Hnub xya tim 11 Lub 1 Hlis Ntuj 2025
Cov kwv tij zoo nyiam sawv daws, hauv Ntawv Moo Zoo hnub no, peb pom Zam Ntxuav Plig ua tus piv txwv zoo rau peb. Nws cov lus hais tias: Kuv tsis yog Leej Pleev, kuv yog tus Ntuj xa tuaj mus ua nws ntej. Tus ntawd yuav tsum hlob tuaj, hos kuv yuav me zuj zus” yog cov lus qhia peb zoo tshaj, uas rau peb paub tias, ntawm Tswv Ntuj xub ntiag, peb yog neeg me me xwb. Peb tsis yog Tswv Ntuj, peb yuav tsum hwm tus loj dua peb, txhob ua lub neej zoo li yus tus kheej yog tswv Ntuj. Muaj coob leej qhuas Zam Ntxuav Plig yog tus Pleev, tab sim mas, Zam paub zoo tias nws yog leej twg. Nws tsis zoo siab uas sawv daws tsa nws ua tus Pleev, tiam sim, nws qhia lawv kom to taub meej meej.
Kwv tij sawv daws, peb kuj zoo ib yam li ntawd thiab. Txhob tsis nco qab tias peb yog Tswv Ntuj tus tub txib, peb yog zoo li Tswv Ntuj txhais tes pab Tswv Ntuj ua hauj lwm kom sawv daws paub txog Tswv Ntuj, kom sawv daws pom xyeem Tswv Ntuj txoj kev nyiam kev hlub, kom sawv daws paub tias Tswv Ntuj hlub lub qab ntuj neeg npaum li cas, sawv daws thiaj tsim nyog qhuas txog Tswv Ntuj lub npe, qhuas txog Tswv Ntuj lub koob meej. Hauv peb lub neej, Tswv Ntuj yuav tsum hlob tuaj, hos peb yuav me zuj zus. Zam cov lus hnub no, kuv nyiam tshaj. Zam cov lus yog cov lus uas kuv muab los ua lub hom phiaj hauv kev tshaj Ntuj lus. Huab Tais Yes Xus yuav tsum hlob tuaj, tab sis mas, kuv yuav tsum me zuj zus.
