ZAJ NYEEM HNUB TIM 10 LUB 9 HLI 2024
HNUB PEB LUB LIS PIAM 23 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 6: 12-19)
Kwv tij Hmoob, yog peb saib hauv cov Ntawv Moo Zoo mas peb yuav pom tias txhua zaus thaum Huab Tais Yes Xus yuav ua ib txog hauj lwm dab tsi, mas Huab Tais Yes Xus yuav xub teev Ntuj tso. Huab Tais Yes Xus mus rau ib qhov chaw xu kev, nws nyob ntsiag ntsiag teev thiab thov Huab Tais Leej Txiv.
Lub Moo Zoo hnub no los kuj ib yam; ua ntej Huab Tais Yes Xus yuav xaiv 12 tug thwj tim los pab nws tshaj Tswv Ntuj lub Ceeb Tsheej los yog coj lub Moo Zoo mus rau lwm tus, mas nws xub teev Ntuj thiab thov Huab Tais Leej Txiv tso.
Zaj no kuj zoo qhia peb tias ua ntej peb yuav ua ib yam hauj lwm dab tsi, los yog yuav txiav siab rau ib yam twg mas peb yuav xub teev thiab thov Huab Tais Tswv Ntuj pub Leej Ntuj Plig tuaj kaj peb lub siab, pub kev thoob tsib rau peb lub tswv yim, pub ib lub siab ncaj rau peb kom ua tau qhov hauj lwm ntawd, kom xaiv txiav tau mus raws qhov tseeb.
Peb tso siab rau Huab Tais Tswv Ntuj lub zog, peb to siab rau Leej Ntuj Plig coj kev.
Kwv tij Hmoob, muaj peb ib tug neeg ntseeg hais tias txhua zaus luag tej kom nws tawm mus hais lus saum sam thiaj rau sawv daws mloog, mas nws ntshai thiab tshee vim nws yog ib tug neeg tsis txawj ntse tsis paub txuj ntau, tab sis niaj zaus nws yuav thov Huab Tais Leej Txiv pub Leej Ntuj Plig los pab nws kom txawj ua siab loj, kom Leej Ntuj Plig ua hauj lwm nyob hauv nws, kom cov lus nws hais yog tawm ntawm Tswv Ntuj kev thoob tsib tuaj tsis yog tawm ntawm nws lub tswv yim los.
Nws thov Ntuj li no, mas nws txoj kev ntshai thiab tshee ploj mus, txawm nws ua tau tsis zoo npaum cas los nws yeej zoo siab hlo tias Huab Tais Tswv Ntuj tau siv nws lub ncauj lub cev los ua Tswv Ntuj txoj hauj lwm.
Yog nws cia li nce mus saum sam thiaj thiab nws hais raws li nws xav xwb mas kawg poob ntsej muag. Tus phooj ywg no hais li no.
