ZAJ NYEEM HNUB TIM 10LUB 10 HLI 2024
HNUB TSIB LUB LIS PIAM 27 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 11: 5-13)
Kwv tij Hmoob sawv daws, nyob hauv cov Yus Das mas lawv nyiam tawm rooj mus kev deb thaum hmo ntuj vim tias nyob lawv teb chaws mas yav nruab hnub kub heev. Cov Yus Das ib txwm qhia tias thaum muaj ib tug qhua tuaj txog ntawm yus qhov rooj, lawv khob yus lub qhov rooj kom tau kev pab, mas yus yuav tau sawv mus qhib qhov rooj txais tus qhua ntawd, txawm tias yuav lig npaum cas.
Hnub no, Huab Tais Yes Xus xav qhia txog kev thov Ntuj rau nws cov thwj tim, mas Huab Tais Yes Xus thiaj muab cov Yus Das lub neej los ua piv txwv rov qhia lawv.
Huab Tais Yes Xus hais tias muaj ib hmos twb lig lawm, muaj ib lub suab khob qhov rooj thov kom tus tswv tsev pub ncuav mov rau nws coj mus yug cov phooj ywg tuaj kev deb tuaj.
Tus tswv tsev yeej tsis xav sawv los qhib lub qhov rooj, tab sis qhov kawg nws yeej tsum sawv los qhib rau; yog tias tus tuaj taij ntawd tsis tso tseg.
Kev thov Ntuj zoo ib yam li ntawd, yog peb ua tiag thov tsis tseg mas muaj ib hnub twg Huab Tais Tswv Ntuj yuav pub rau peb raws li peb thov yog tias yam peb thov ntawd peb thov coj mus pab luag lwm tus.
Huab Tais Yes Xus hais ntxiv tias thaum muaj ib tug thov ib yam ntawm peb, mas peb yeej yuav muab yam ntawd rau nws. Piv li peb yog niam yog txiv mas peb yeej yuav muab yam zoo tshaj rau peb cov me nyuam, peb yuav tsis muab tej yam yuav ua kev kub ntxhov rau peb cov me nyuam.
Huab Tais Tswv Ntuj yog peb Txiv, mas nws zoo li ntawd, Huab Tais Tswv Ntuj yuav muab yam zoo tshaj rau peb thiab, Huab Tais Tswv Ntuj yeej yuav tsis muab ib yam phem rau peb.
Kwv tij Hmoob sawv daws, Huab Tais Yes Xus hais tseeb thiab meej kawg tias “Leej twg thov mas nws yuav tau txais, leej twg nrhiav mas nws yuav ntsib, leej twg khob qov rooj mas yuav muaj tus qhib rau nws. Yog nej thov, nej nrhiav, thiab nej khob qhov rooj tsis tseg; mas Huab Tais Leej Txiv yuav pub Leej Ntuj Plig Ntshiab rau nej, ces thaum ntawd nej lub neej yuav hloov, nej yuav muaj txoj siab tshiab; yog txawj nyiam Ntuj thiab nyiam neeg, zoo siab ua neeg me, nws nyob kaj lug, nws muaj lub siab ntev, nws xyiv fab pab luag tej, nws ua siab zoo rau sawv daws, nws tso siab rau Ntuj thiab rau neeg, nws muaj lub siab hlub lwm tus, thiab nws txawj kav nws lub cev kom huv.
Kwv tij Hmoob, yam zoo tshaj uas Huab Tais Tswv Ntuj pub rau peb mas yog 9 yam raws li tau hais los saum no, peb hais tias ‘Leej Ntuj Plig Ntshiab 9 lub txiv’.
