ZAJ NYEEM HNUB TIM 1 LUB 3 HLIS 2025
HNUB XYA, LUB LIS PIAM 7 CAIJ NYOB NRUAB XYOO
NXL 17: 1-15; MK 10: 13-16
Kwv tij Hmoob sawv daws, nyob hauv lis piam no peb hnov Huab Tais Yes Xus hais txog cov me nyuam; yam li Huab Tais Yes Xus hais tias “Leej twg txais ib tug me nyuam yaus xws li tus no, vim kuv lub npe mas yog nws txais kuv. Leej twg coj ib tug neeg ntseeg me me no kom ua txhaum, mas cia muab lub zeb zom dai nws caj dab thiab muab pov hauv dej ntuj” (MK 9: 37, 42).
Cov thwj tim hnov li ntawd, tsis kav zoo li lawv tsis mloog, hnub no peb thiaj hnov lub Moo Zoo hais tias lawv cem cov niam txiv coj me nyuam tuaj nrhiav Huab Tais Yes Xus thiab txwv tsis pub cov me nyuam los cuag Huab Tais Yes Xus.
Muaj tej tus hais tias ntshai yog vim cov thwj tim tsis xav kom cov me nyuam tuaj txob los tab kaum Huab Tais Yes Xus lub sij hawm mas lawv thiaj txwv cov me nyuam. Peb tsis paub txog tej no.
Qhov peb paub mas yog Huab Tais Yes Xus hais tias “Nej txhob txwv lawv, nej cia lawv tuaj cuag kuv. Cov neeg ua zoo li cov me nyuam no mas lawv thiaj yuav tau Tswv Ntuj lub Ceeb Tsheej los ua lawv tug.”
Kwv tij Hmoob, Huab Tais Yes Xus cov thwj tim tsum muaj lub siab nyiam tsob hwb cov me nyuam thiab coj cov me nyuam mus ua qhov ncaj, lawv tsum hlub cov neeg txom nyem.
Huab Tais Yes Xus cov thwj tim tsis txhob ua neeg siab nqaim, saib yus tseem ceeb dua lwm tus, tsis muab siab rau mloog Huab Tais Yes Xus cov lus.
Tus neeg twg xav tau Tswv Ntuj lub Ceeb Tsheej los ua nws tug, nws kuj yuav ua zoo li cov me nyuam; yam li tuaj cuag Huab Tais Yes Xus, npuab Huab Tais Yes Xus, cia Huab Tais Yes Xus los nyob hauv lawv.
Huab Tais Yes Xus twb xub qhia tias tus tau Tswv Ntuj lub Ceeb Tsheej los ua nws tug yog tus pluag hauv nruab siab thiab nyiam txoj kev ncaj (MT 5: 3, 11). Tus neeg pluag hauv nruab siab yog tus neeg paub tias nws yuav muaj txoj sia tsis tau yog tsis vam txog Tswv Ntuj pab. Tus neeg nyiam kev ncaj nws tsis zais siab tsis hais lus dag ls cuav. Cov me nyuam zoo li ntawd, lawv vam txog niam txiv kev pab kom lawv muaj txoj sia nyob, qhov twg yog ces lawv hais tias yag; lawv tsis zais tsis dag.
Huab Tais Yes Xus xav kom cov thwj tim ua zoo li ntawd; cov thwj tim vam txog Tswv Ntuj xws li cov me nyuam vam txog niam txiv, cov thwj tim ua qhov yog thiab qhov tseeb xws li cov me nyuam tsis zais siab rau niam txiv.
Kwv tij Hmoob, thaum peb txiav siab ntseeg txog Yes Xus, peb txais lub Cim Ntxuav ces peb yog Huab Tais Yes Xus cov thwj tim ntag, mas phim peb yuav coj tus cuj yam ntxwv xws li yog ib tug me nyuam mas Huab Tais Yes Xus thiaj yuav puag peb thiab tsa tes foom hmoov zoo rau peb ib yam li hnub no peb hnov nyob hauv lub Moo Zoo.
