Kev ntseeg uas tsis ua hauj lwm, ces yog tuag lawm. (Faith Without Works Is Dead)
Kev ntseeg uas tsis ua hauj lwm, ces yog tuag lawm. (Faith Without Works Is Dead)
Kuv xav tias : “Tus neeg ruam xwb thiaj maj nkag mus hauv qhov chaw tus ntsuj plig tsis kam tsuj”. Kuv rov hais txog qhov no dua ib zaug, vim nws yog qhov kev sib tawg ntawm cov neeg ntseeg nyob sab hnub poob txij thaum daws kho cov kev teev hawm los. Qhov ntawd yog kev ntseeg thiab kev ua. Kuv hais li no tsis yog kuv xav muab txim, tab sis vim zaj no muaj nyob hauv zaj nyeem ob hauv Yas Kos cov tsab ntawv. Yog cov lus tseem ceeb ntawm cov neeg ntseeg Kav Tos Liv hauv nqe lus no.
Thov nyeem ob peb kab lus nyob hauv Yas Kas cov tsab ntawv rau nej mloog :
“Cov kwv tij zoo nyiam sawv daws ! Kev ntseeg tsis muaj qab hau dab tsi, yog leej twg hais tias nws muaj kev ntseeg tab sis tsis nqis tes ua. Txoj kev ntseeg ntawd yuav pab nws tau li cas ? Yog kev ntseeg tsis muaj kev ua hauj lwm, mas nws zoo li tuag mus lawm.” Yog lo lus hnyav kawg puas yog ? Kev ntseeg thiab kev ua hauj lwm nws yog qhov tseem ceeb ntawm kev cawm. Tam sim no koj paub lawm tias qhov no tshwm sim los ntawm dab tsi. Nws yog los ntawm Lus Thes kev pom thiab kev paub. Tus tub hluas uas yog ib tug Txiv Plig ntawm Augustinian uas coj nruj. Li ntawd, tam sim no peb nyob ntawm qhov pib hauv tiam 16. Lus Thes yog ib tug Txiv Plig uas thoob tsib thiab yog kws qhia kev ntseeg, nws paub Ntawv Ntshiab zoo. Tab sis nws tiv cov teeb meem hais txog “kuv puas paub tias kuv dim lawm”.
Lus Thes yog Txiv Plig, li ntawd nws thiaj muaj ntau yam hauj lwm rau nws xaiv ua. Nws muaj cov Cim Ntshiab, muaj cov kab ke thiab lwm yam. Nws tab meeg hais tias : “Yog tus Txiv Plig twg dim ntawm kev ua Txiv Plig, mas kuv yog tus Txiv Plig ntawd.” Ces nws thiaj siv txhua lub tswv yim los ntxias dag nws tus kheej kom dim, tab sis tsis tau qab hau dab tsi.
Kwv yees xyoo 1515 los 1516, Lus Thes muaj qhov tias Turmerlebnis, yog xeem lus Zes Mas Nias hais txog yam nws tau ntsib tau pom nyob hauv nws lub tsev. Hauv nws tsev Lus Thes tau tshawb pom qhov tob tob no, thiab nws tau txais ib co lus ua qhov chaw pib tuaj ntawm Los Mas tuaj tias : “Tus neeg ncaj nws yuav ua lub neej raws kev ntseeg.” Lo lus no yog qhov daws nws li teeb meem. Tsis yog tas txhua yam uas cov Txiv Plig ua kom nws dim, tab sis yog lub txiaj ntsim uas tuaj ntawm Yes Xus tuaj. Yes Xus cov ntshav npog rawv nws. Vim kev nqis tes ua nyob hauv kev ntseeg, thiaj ua rau nws ntsib kev dim. Ntawm Lus Thes mas zoo li nws raug tso tawm lawm. Tab txawm tias muaj ntau yam ua tawm los ntawm kev teev hawm Plos Tes Taas. Tsis kav tas txhua yam ntawd yog los ntawm kev ntseeg, kev ua hauj lwm tsis tas yuav yog kev dim los kev cawm.
Lus Thes thiab cov neeg raws nws puav leej hais tias kev ua zoo, yuav tau txais kev ncaj ncees. Ces yog thaum koj lees txais Tswv Ntuj nyob hauv koj txoj kev ntseeg, ces paub tias koj tau txais kev cawm lawm. Koj yuav ua kom cov neeg sab nraud nrog cov neeg sab hauv sib haum. Nov yog Lus Thes cov lus hais.
Koj yuav tsum ua koj txoj kev ntseeg tawm los nyob hauv kev ua hauj lwm. Txawm li cas kuj xij, kev ua tawm los tsis yog ib feem ntawm kev dim. Tab sis nov yog lo lus xaus luv luv ntawm Plos Tes Taas. Nco ntsoov tias Lus Thes yog tus sau Ntawv Ntshiab, thiab nws vam txog Ntawv Ntshiab xwb. Ntawv Ntshiab yog qhov chaw txhawv lub zog thiab tsis yuam kev. Lus Thes paub tias lo lus no muaj teeb meem, thiab nws qhia tej yam tsis nyob hauv Ntawv Ntshiab. Cov neeg ntseeg Kav Tos Liv yuav daws cov teeb meem no tau li cas ? Thov caw txog peb cov neeg ntseeg, thov caw nej mus hauv Online, vim Internet yog qhov zoo heev. Peb tuaj yeem nrhiav yam uas peb xav tau. Koj yuav nkag mus Online thiab tshawb nrhiav lo lus ntawm lub Rooj Ncauj Lus uas nyob hauv lub nroog Trent. Lub Rooj Ncauj Lus hauv lub nroog Trent yog tshwm sim tom qab daws kho cov kev teev hawm. Yog lo lus teb zoo kawg ntawm lub Koom Txoos Kav Tos Liv thiab Lus Thes thiab Calvin tus muaj hwj chim tshaj hauv lub nroog Trent. Kuv tab tom hais txog cov Txiv Plig, cov kws kev ntseeg tsis muaj tus tsis kam lees txais cov Plos Tes Taas kiag. Lawv xyuam xim thiab ua tib zoo nyeem cov lus no, lawv sib ncaws hau. Li ntawd, yog koj nyeem kev txiav txim ntawm lub Rooj Ncauj Lus nyob Trent, koj yuav pom tias peb tsis tau txais kev txiav txim ncaj ncees hauv peb cov hauj lwm. Peb tau txais kev cawm, yog los ntawm Tswv Ntuj cov txiaj ntsim. Qhov sib txawv yog dab tsi ? Ntawm cov Kav Tos Liv, mas yog kev ntseeg. Yog qhov pib thiab yog tus cag ntawm txhua yam kev ncaj ncees. Nws yog los ntawm kev nqis tes ua cov hauj lwm kev nyiam kev hlub. Yog los ntawm cov Cim Ntshiab thiab lub neej ua neeg ntseeg. Yes Xus ua hauj lwm nyob hauv kuv, vim kuv koom tes nrog Yes Xus, mas kuv loj hlob nyob hauv kev ncaj ncees.
Raws li kuv twb tau hais lawm, txoj kev sib cav no twb muaj los tau 500 tawm xyoo.
Lus Thes zaj tswv yim xav li no : “Txawm tias kuv muaj txhaum, kuv kuj raug kuv cov txhaum npog. Tab sis vim Yes Xus lub txiaj ntsim, mas kuv kuj raug tshaj tias yog neeg ncaj ncees.” Koj tsis yog neeg dawb huv, vim koj muaj txhaum me me. Tsis hais koj yog neeg dawb huv los koj yog neeg muaj txhaum. Lus Thes thiaj ntsia pom tias qhov ntawd yog qhov tseem ceeb. “Thaum kuv raug tshaj tawm tias kuv ncaj ncees, vim Yes Xus lub txiaj ntsim.” Tab sis ntawm kuv, mas kuv thov rov hais lo lus nyob hauv Yas Kos cov tsab ntawv li no : “Yog leej twg hais tias nws muaj kev ntseeg, tab sis tsis nqis tes ua, nws ho zoo li cas ? Kev ntseeg puas pab tau nws ?”
Kev tau txais kev cawm yog hais txog dab tsi ? Lus Aas Kiv peb hais tias “Save” yog los ntawm lo lus tias : Salus hauv xeem lus Latin. Yog qhov luag hu Yes Xus ua tus cawm seej. Yes Xus yog tus coj Salus tuaj rau peb. Salus yog dab tsi ? Yog kev noj qab haus huv thiab kev kho mob. Nyob hauv cov Los Mas txheej thaud yog koj hais tias “salve” rau ib tug neeg twg, mas yog zoo li koj nug tus neeg ntawd puas noj qab nyob zoo ?
Lo lus “Salve” txhais tias “thov kom noj qab nyob zoo”. Peb yuav dim tau li cas ? Peb tus mob yuav zoo tau li cas ? Kuv xav tias yam koj pom nyob hauv Yas Kos thiab lub Koom Txoos Kav Tos Liv ua kom koj pom nyob hauv koj txoj kev ntseeg. Tas txhua yam no yog pib los ntawm kev ntseeg.
Yog peb lees txais Yes Xus lub txiaj ntsim nyob hauv peb lub neej, yog peb koom tes nrog Yes Xus, mas peb yuav tau txais kev cawm thiab peb lub cev ntaj ntsug yuav noj qab nyob zoo. Kev ntxuav txim txhaum yog pib nyob hauv kev ntseeg. Yog koj xav txuag koj tus kheej, koj yuav tsum lees tias koj tsis tuaj yeem daws teeb meem tau. Yog koj xav tias koj tus kheej mam ua tus daws teeb meem, koj ua tau thiab koj xav tias koj rub tau koj tawm los. Koj yuav nco ntsoov tias : “Leej twg hais tias nws muaj kev ntseeg, tab sis tsis nqis tes ua. Txoj kev ntseeg ntawd puas pab tau nws ?”
Cov Kav Tos Liv muaj ib lo lus paj lug hais tias : Tswv Ntuj tsim peb, nws tsis tau txais kev koom tes ntawm peb. Nws yog qhov tseeb tiag, vim peb raug tsim tawm los ntawm qhov khoob ntshuv. Tswv Ntuj yuav tsis rov tsim peb dua tshiab thiab tsis tau txais kev koom tes ntawm peb. Tswv Ntuj tsis nrog peb sib twv. Tswv Ntuj xav kom peb loj hlob nyob hauv kev cawm thiab kev txuag tus ntsuj plig uas yog los ntawm peb cov hauj lwm kev nyiam kev hlub. Vaj Qhia Fas Ntshis Kus hais tias : “Lub Koom Txoos yog zoo li lub tsev kho mob tshav puam.” Cov neeg raug mob yuav tuaj kom tau txais kev cawm. Nws zoo li cov Cim Ntshiab, lub thaj txi Ntuj, lub Cim Yug thiab cov hauj lwm kev nyiam kev hlub. Qhov ntawd yog qhov zim txwv no peb ua kom tau txais lub txiaj ntsim nyob hauv peb lub neej. Yes Xus tsis yog xav kho peb ntawm kev txhaum xwb, nws xav kom peb hloov ua cov ntsuj plig dawb huv.
Ib lo lus tseem ceeb nyob hauv Pob Zeb tsab ntawv Ib, yog qhov peb hloov ua cov muaj feem cuam txog txhua yam Tswv Ntuj tsim. Qhov ntawd yog qhov Tswv Ntuj xav tau tshaj plaws. Tswv Ntuj tsis xav tso peb nyob nrog peb cov txhaum thiab hais tias peb ncaj ncees lawm, tab sis peb tseem yog neeg txhaum. Tswv Ntuj hlub peb tiag, nws xav pab peb kom dim. Peb yuav tau qhib peb lub siab rau Yes Xus, vim kev ntseeg. Peb yuav nrog Yes Xus sib koom tes nyob hauv peb cov hauj lwm kev nyiam kev hlub. Nyob hauv cov Cim Ntshiab, peb yuav tau txais kev cawm thiab kev kho.
Vim li ntawd, Yas Kos thiaj hais tias : “Koj txoj kev ntseeg uas tsis nqis tes ua los yog tsis ua hauj lwm, mas yog zoo li tuag lawm.” Peb yuav pib nyob hauv peb txoj kev ntseeg, vim nws yog tus cag ntawm kev ntxuav peb cov txhaum. Kev ntxuav txhaum kuj yog los ntawm peb kev sib koom tes. Ces kev cawm, kev kho thiab qhov tseeb nws yuav tshwm sim tuaj.
