Hnub chiv tim 6 lub 10 hli ntuj 2024
Mas Kos. 10:2-16
Lub lis piam 27
Lub Caij Nyob Nruab Xyoo
“Thaum chiv lub keeb tsim neeg, Tswv Ntuj tsim nkawd ua txiv neej, thiab poj niam. Vim li ntawd, txiv neej yuav tso nws niam nws txiv tseg, nkawd ob leeg yuav ua ib lub cev nqaij xwb.
Cov kwv tij hmoob, Lub Moo Zoo lub ntsiab lus hnub no, hais txog kev ua txij ua nkawm. Txiv neej thiab poj niam thaum sib yuav ua txij ua nkawm ua ib cuab ib yim neeg, mas lawv yuav tsum sib nyiam sib hlub mus txog hnub tas sim neej lawm. Hauv lub Moo Zoo, ib cov Fas Lis Xais xav sim Yes Xus, saib tias Yes Xus yuav teb li cas. Yog Yes Xus teb tsis raug, lawv yuav ua kom nws raug txim. Lawv xav muab Yes Xus tuag zoo li Zam Ntxuav Plig uas nws hais rau Hes Los tias Hes Los tsis muaj cai yuav Hes Los Dias. Hes Los thiab Hes Los Dias tsis txaus siab kawg, nkawd thiaj muab Zam raug txiav caj dab. Tej zaus, cov Fas Lis Xais kuj xav zoo li ntawd thiab. Cov Fas Lis Xais nug tias: “Ib tug txiv neej yuav nrauj nws poj niam uas tau?” Kwv tij sawv daws, txog qhov no, Huab Tais Yes Xus hais meej kawg. Txawm tias Mais Xes kom ua ntawv nrauj tso thiaj nrauj tau, qhov tiag mas nrauj tsis tau. Mais Xes kom ua ntawv nrauj kuj vim tias cov His Xas Lais lawv lub siab txhav dhau, Mais Xes thiaj sau txoj cai ntawd. Tab sis mas, “Thaum chiv lub keeb tsim neeg, Tswv Ntuj tsim nkawd ua txiv neej, thiab poj niam. Vim li ntawd, txiv neej yuav tso nws niam nws txiv tseg, nkawd ob leeg yuav ua ib lub cev nqaij xwb. Li ntawd, nkawd tsis yog ob leeg lawm, nkawd yog ib lub cev nqaij xwb. Huab Tais Yes Xus hais ntxiv tias: yog vim qhov no mas, yam uas Tswv Ntuj muab sau los ua ke, neeg yuav tsis txhob muab cais.
Kwv tij sawv daws, niaj hnub no mas, tib neeg tsis zoo li Huab Tais Yes Xus hais kiag li. Tib neeg hnub no mas, sib nrauj sai sai, sib nrauj yooj yim tshaj. Thaum yus sib cav tsis ceg hauv yus yim neeg, yus tsis txaus siab yus tus txiv qhov ub qhov no, mas yus kuj cem cem cem yus tus txiv yus kuj xav sib nrauj. Ntawm tus txiv mas kuj haus tshuaj haus cawv yus kuj thiab yus poj niam kuj sib cav sib ceg sib ntaus, ces ua rau yus sib nrauj. Los sis yus pom lwm tus poj niam zoo nkauj tshaj yus mob siab rau nws, ua rau yus ua txhaum, yus ua deev hluas nraug ua rau yus xav sib nrauj.
Kwv tij sawv daws, yog peb tsis muaj txoj kev nyiam kev hlub, kev hlub pub tus txiv, kev hlub peb tus poj niam, peb kuj yuav sib nrauj yooj yim, tab sis mas, yog peb muaj kev sib nyiam sib hlub xws li Huab Tais Yes Xus qhia, peb kuj yuav sib hlub ntev ntev. Nco ntsoov tias thaum yus sib yuav, Huab Tais Tswv Ntuj twb foom hmoov zoo rau yus lawm. Tswv Ntuj pom zoo, Tswv Ntuj thiaj foom hmoov zoo rau peb. Cov kwv tij, “yam uas Tswv Ntuj muab sau los ua ke, neeg yuav tsis txhob muab cais.”
