Hnub chiv tim 4 lub 8 hli ntuj 2024
Zam 6:24-35
Lub lis piam 18
Caij Nyob Nruab Xyoo
“Kuv yog cov mov muaj txoj sia. Tus tuaj cuag kuv nws yuav tsis tshaib, tus ntseeg txog kuv nws yuav tsis nqhis ib zaug li.”
Nyob zoo…
Lub Moo Zoo hnub no zoo txuas zaj nyeem lub lis piam dhau los uas Huab Tais Yes Xus ua hwj huam yees ntxwv muab 5 lub ncuav mov qis thiab 2 tug ntses me me pub 5,000 leej neeg nyob Kas Lis Lais teb. Hnub no mas tsoom sid caij nkoj mus nhriav Yes Xus tim Kas Fas Naus. Huab Tais Yes Xus hais kom meej tias tsoom sid nrhiav nws tsis yog vim tias lawv tau pom ib co cim los hwj huam yees ntxwv, tab sis lawv nrhiav nws vim tias lawv tau noj cov ncuav mov tsau lawv plab xwb. Vim li no mas Huab Tais Yes Xus thiaj hais rau lawv tias lawv tab tom to taub yuam kev. Cov mov pub txoj sia uas Yes Xus hais txog tsis yog 5 lub ncuav mov thiab 2 tug ntses los ntiaj teb zaub mov. Tab sis mas, Yes Xus tab tom hais txog nws tus kheej. Yes Xus yog cov mov muaj txoj sia nyob mus li. Ua li ntawd, Huab Tais Yes thiaj hais rau stoom sid tias “Nej txhob ua hauj lwm nrhiav cov txhiam xws txawj ploj. Nej ua hauj lwm nrhiav cov txhiam xws pub txoj sia nyob mus li.” Cov txhiam xws ntawd yog cov uas Neeg Leej Tub yuav pub rau nej.
Kwv tij hmoob hmov thiab tshua, hauv peb lub neej mas, muaj kev tshaib plab 2 yam. Yam tim 1 yog kev tshaib plab ntawm cov mov nyob ntiaj teb. Peb tshaib plab, peb ntshaw kev noj qab nyob zoo, peb ntshaw nyiaj txiag, peb ntshaw kev vam meej, peb ntshaw kev muaj suab muaj npe muaj hwj chim, peb ntshaw kev thaj yeeb, peb ntshaw lub neej tsis muaj teeb meem tsis muaj kev kub ntxhov. kev lees txais, tsim nyog rau tus kheej, kev thaj yeeb nyab xeeb, kev so, kev cia siab.
Muaj ib tug kws sau ntawv sau tias “peb txhua tus muaj lub siab tshaib plab rau ib yam dab tsi. Txhua tus neeg tab tom nrhiav cov lus teb rau peb cov lus nug tseem ceeb: Kuv yog leej twg? Kuv haum qhov twg? Kuv nyob ntawm no rau dab tsi? Cov lus nug ntawm tus kheej, kev muaj khoom muaj ub muaj no thiab lub hom phiaj ntawm yus lub neej yog kev tshaib plab peb muaj. Huab Tais Yes Xus hu cov no tias cov txhiam xws txawj ploj. Yam tim 2 mas yog kev nqhis ntawm cov mov tuaj saum ntuj tuaj. Cov mov no yog… Huab Tais Yes Xus. Cov thwj tim nug Yes Xus tias: Peb yuav ua dab tsi, peb thiaj ua tau Tswv Ntuj txoj hauj lwm?
Lo lus teb yog tias “kom nej ntseeg txog tus xa tuaj” kom nej ntseeg txog Yes Xus. Yes Xus hais ntxiv tias “Kuv yog cov mov muaj txoj sia. Tus tuaj cuag kuv nws yuav tsis tshaib, tus ntseeg txog kuv nws yuav tsis nqhis ib zaug li.”
Kwv tij sawv daws, peb ntseeg txog Yes Xus tsis txhais tias peb tsis muaj teeb meem, tsis txhais tias peb tsis tshaib plab, peb tsis nqhis dej. Peb cev qaij daim tawv tseem xav tau ncuav mov, ntses, qaij, dej, cov mov ntawm ntiaj teb. Tab sis mas, peb tus tsuj plig tsis tshaib plab lawm, peb tus tsuj plig tsis nqhis dej lawm. Peb txais Yes Xus cov lus thiab cov mov lawm ces peb yuav muaj zog ua neej nyob ntxiv mus, txawm muaj teeb meem los xwm txheej hnyav li cas, peb kuj yuav yeej tau, vim peb ntseeg txog Tswv Ntuj, peb ntseeg txog Huab Tais Yes Xus. Qhov tseem ceeb yog tias peb puas ntseeg tiag tiag tias Huab Tais Yes Xus tib leeg xwb yuav pub mov muaj txog sia nyob mus li rau peb, los peb tab tom nhriav lwm yam los pub peb txoj sia, lwm yam uas tsis yog Yes Xus? Lwm yam uas tsis pub txoj sia nyob mus li. Peb txais ces peb tseem tshaib plab dua tsis txawj tsaus plab mus li.
Nyob zoo sawv daws.
