Hnub Chiv Tim 4 Lub 5 Hlis 2025
Lub lis piam 3 nyob hauv Lub Caij Hla
Zam 21:1-14
“Yog Huab Tais.”
Nyob zoo!
Kwv tij hmoob sawv daws, Tswv Ntuj Lo Lus hnub no, kuv thov caw peb txhua leej txhua tus ras txog tus thwj tim uas Yes Xus nyiam cov lus hais tias “yog Huab Tais.” Lo lus luv luv li no, tiam sis muaj lub ntsiab lus tob tshaj. Lo lus “yog Huab Tais” yog lo lus uas cov thwj tim nco tau tias “Yog Huab Tais Yes Xus, nws sawv rov los lawm tiag!” Huab Tais Yes Xus tsis tau tso lawv pov tseg, qhov tiag mas, nws tseem nyob ze ze lawv, nws tseem nrog nraim lawv, tiam sis, ntau zaus, lawv tsis nco nws qab.
Thaum Huab Tais Yes Xus tas sim neeg lawm, ces cov thwj tim rov mus ua neej nyob li qub. Lawv mus puav ntses li qub. Zoo xws li Yes Xus tuag lawm, ces txhua yam kuj tas lawm thiab. Kwv tij zoo yiam sawv daws, tej zaus peb tsis pom Huab Tais Yes Xus hauv peb lub neej, kuj tsis txhais tias Huab Tais Yes Xus tsis nyob ze peb, tsis txhais tias Huab Tais Yes Xus tsis nrog nraim peb. Ntau ntau zaus, nws nyob ze ze peb, tiam sis peb tsis pom nws. Ntau zaus, nws tawm tuaj rau peb pom lawm, tiam sis, peb tsis nco nws qab. Yog maj, qhov tiag mas Huab Tais Yes Xus tsis tawm tuaj rau peb pom zoo xws li cov duab uas peb pom hauv Facebook, Youtube, los Tiktok. Tej zaus, Huab Tais Yes Xus tawm tuaj rau peb pom nyob hauv cov pluag txom nyem, cov muaj teeb meem, cov uas peb tsis tshua nyiam, qhov tseem ceeb yog hais tias peb puas nco tau nws thiab tshaj tawm tias “yog Huab Tais.”
