ZAJ NYEEM HNUB TIM 31 LUB 8 HLI 2025
HNUB CHIV LIS PIAM 22 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 14: 1, 7-14)
Tus uas nws tsa nws siab, mas Ntuj yuav txo nws qis, hos tus uas nws txo nws qis, mas Ntuj yuav tsa nws siab.
Nyob zoo…
Kwv tij hmoob sawv daws, hnub no Huab Tais Yes Xus hais txog kev tsis muab hlob ib zaug dua. Huab Tais Yes Xus lo lus qhia no tseem ceeb kawg tsim nyog uas peb khaws cia los twm txog kom zoo kom meej. Li ntawd, Huab Tais Yes Xus thiaj qhia tias “tus uas nws tsa nws siab, mas Ntuj yuav txo nws qis, hos tus uas nws txo nws qis, mas Ntuj yuav tsa nws siab.” Tus uas nws tsa siab uas Huab Tais Yes Xus hais txog yog cov Fas Lis Xais uas lawv xav kom sawv daws qhuas txog lawv, lawv xav kom muaj suab muaj npe. Huab Tais Yes Xus qhia kom nws cov thwj tim ceev faj cov no. Ua cas Huab Tais Yes Xus thiaj qhia kom cov thwj tim thiab peb sawv daws kom ceev faj, txhob ua neej zoo xws li cov Fas Lis Xais peb hnov hnub no, txhob ua neeg muab hlob, txhob tsa yus tus kheej kom siab dua luag twm tus?
Huab Tais Yes Xus qhia li no kuj vim tias tus muab hlob, nws tsa nws siab dua luag twm tus, ces nws tsis pom lwm tus, nws saib tsis tau cov pluag txom nyem, nws tsis mloog Tswv Ntuj lo lus. Nws tsis muaj siab nyiam thiab hlub lwm tus. Yog nws tsis hlub luag lwm tus, ces nws yuav nyiam Tswv Ntuj tau li cas? Nws yuav ua raws li Tswv Ntuj Lo Lus tau li cas? Tswv Ntuj kuj tsis muaj qab hau muaj nqe ntawm nws lub neej. Nws xav tias nws nyob siab dua lwm tus, nws saib tsis tau lwm tus, nws xav tias tsis muaj leej twg txo nws qis tau. Huab Tais Yes Xus hais tias ceev faj, muaj ib hnub Tswv Ntuj yuav txo nws qis. Tswv Ntuj yuav ua rau nws txaj muag rau luag. Qhov tiag mas, tsis muaj leej twg nyiam tus muab hlob, puas yog? Tswv Ntuj kuj tsis nyiam tus muab hlob thiab.
Kwv tij zoo nyiam sawv daws, Tswv Ntuj lo lus qhia hnub no, muaj li no xwb. Ntawm peb ne, peb ua neeg zoo li cas? Tej zaum, peb puas ua neeg zoo li tus muab hlob? Tej zaus, peb puas tsa yus tus kheej siab dua cov nyob ib puag ncig peb? Peb yuav tsum rov los nug yus tus kheej niaj hnub. Yog peb ua neeg zoo li hais, ces hnub no, Huab Tais Yes Xus hais rau peb lawm, peb mloog nws mog!
