ZAJ NYEEM HNUB TIM 3 LUB 8 HLI 2025
HNUB CHIV, LIS PIAM 18 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 12: 13-24)
Nyob zoo os kwv tij hmoob sawv daws, zoo siab tos txais nej sawv daws los mloog Tswv Ntuj lo lus ua ke. Kuv yog Txiv Plig Tshaj Moo ntawm lub koom haum Zoo Tswv Zov Yaj. Hnub no yog hnub chiv tim 3 lub 8 hli ntuj xyoo 2025
“Tus uas khaws nyiaj txiag tseg rau nws tib leeg kheej, yuav zoo li ntawd, vim nws tsis nrhiav kev nplua nuj nyob hauv Tswv Ntuj.”
Kwv tij hmoob sawv daws, nej mloog lub Moo Zoo hauv hnub no tas lawm, ces nej xav li cas? Huab Tais Yes Xus tab tom hais dab tsi rau nej? Tswv Ntuj Lo Lus peb hnov hnub no qhia dab tsi rau peb lub neej ntseeg Ntuj?
Peb paub zoo tias qhov uas neeg nplua nug ua yog qhov zoo, nws ua tsim nyog lawm. Nws npaj tas puas tsav rau nws lub neej yav tom ntej. Nws muaj qoob loo cuab tam ntau, nws muaj nyiaj muaj txiag txau yug nws lub neej yam tom ntej. Qhov no, yog qhov zoo tshaj, tus nplua nuj no, nws muaj lub hom phiaj rau nws lub neej, nws thiaj tsis poob rau hauv kev txom nyem los kev tshaib plab.
Tiam sis, Huab Tais Yes Xus hais tias “Nej ceev faj, nej yuav txuag kom nej txhob ntshaw, vim tias neeg txawm nplua nuj npaum twg, los nws txoj sia tsis nyob hauv nws lub cuam tam.” Nws hais li no kom qhia tseeb rau tsoom sid thiab nws cov thwj tim tias nyiaj txiag los cuab tam tsis yog txhua yam ntawm yus lub neej, tsis yog lub hom phiaj ntawm tib neeg lub neej. Peb siv nyiaj txiag kom peb muaj noj muaj haus, muaj kev vam meej, kom paub ntaub paub ntawv xwb. Peb siv nyiaj txiag kom pab luag tej tshwj xeeb yog cov txom nyem, cov uas tsis muaj leej twg saib xyuas lawv xwb. Huab Tais Yes Xus qhia kom peb nhriav lub cuab tam nyob saum ntuj lub ceeb tsheej, tsis yog lub cuab tam nyob niaj teb no. Huab Tais Yes Xus hais kom peb ceeb faj kuj vim tias nws ntshai tias nws cov thwj tim los peb sawv daws yuav saib nyiaj txiag los lub cuab tam nyob niaj teb no tseem ceeb dua Tswv Ntuj. Huab Tais Yes Xus ntshai tias khaws nyiaj txiag cia ntau ntau ces peb tsis hnov qab Tswv Ntuj lawm, peb tsis hnov qab peb cov kwv tij neeg tsa lawm, peb tsis pom luag tej lawm, Huab Tais Yes Xus ntshai tias nyiaj txiag los cuab tam yuav ua rau yus ua neeg qia dub, yus pom yus tus kheej xwb, tsis pom luag tej, tsis hlub luag tej. Qhov no yog qhov phem kawg. Huab Tais Yes Xus thiaj hais lus hnyav hnyav tias “Neeg ruam, hmo no kiag, Ntuj yuav coj koj tus ntsuj plig rov qab. Tej yam uas koj npaj tau, yuav yog leej twg tug? Tus uas khaws nyiaj txiag tseg rau nws tib leeg kheej, yuav zoo li ntawd, vim nws tsis nrhiav kev nplua nuj nyob hauv Tswv Ntuj. Li ntawd, txhob dai rau lub cuab tam nyob ntiaj teb no.
Hnub no, Huab Tais Yes Xus kuj caw peb kom twm txog Nws Lo Lus thiab. Peb tib neeg yog Tswv Ntuj me nyuam. Tib neeg thiaj li muaj qab hau muaj meej mom dua nyiaj txiag. Tswv Ntuj tsim tib neeg los, peb tuaj ntawm Tswv Ntuj. Tiam sim, tib neeg tsim nyiaj txiag los siv xwb. Nyiaj txiag tsis yog peb tus tswv. Tab yog Tswv Ntuj thiaj yog peb tus tswv. Tib neeg lub hom phiaj thiaj yog nrhiav Tswv Ntuj tsis yog nyiaj txiag.
Nyob zoo sawv daws.
