Zaj nyeem hnub tim 3 lub 5 hlis 2026
Hnub Chiv, Lis Piam 5 caij Hla
Cov lus nyob hauv Zam Ntawv Moo Zoo (Z 14: 1-12)
Kwv tij zoo nyiam sawv daws, lub Moo Zoo hnub no Huab Tais Yes Xus qhia txog txoj kev mus cuag Leej Txiv rau nws cov thwj tim thiab qhia peb sawv daws. Nws qhia tias cov ntseeg txog Tswv Ntuj, cov muaj Tswv Ntuj hauv lawv lub siab, tsis txhob ntxhov siab mog vim Tswv Ntuj yog tus cawm lawv, Tswv Ntuj yuav pub txoj sia rau lawv. Peb paub txoj kev muaj txoj sia lawm. Huab Tais Yes Xus qhia kom peb paub txoj kev mus lawm; yog kev ntseeg txog nws. Tsis muaj lwm txoj kev uas coj peb tau, tsuas yog Huab Tais Yes Xus xwb thiaj coj peb mus cuag Leej Txiv tau.
Tsis txhob ua neej zoo li Tos Mas hnub no uas nws hais tias nws tsis paub txoj kev. Nws nrog Huab Tais Yes Xus nyob tau 3 xyoo, tab sis, nws hais tias nws tsis paub txoj kev. Tej zaus qee leej kuj ua neej zoo li Tos Mas thiab. Lawv tau paub Yes Xus tau ntau xyoo lawm, lawv tseem tsis tau txais Yes Xus. Qee leej tau txais lub Cim Ntxuav tau 2-3 xyoo lawm, tiam sis, ua neej zoo li lawv tsis paub Yes Xus, tsis paub txoj kev zoo, los tsis paub txoj kev mus cuag Leej Txiv.
Cov kwv tij hmoob, thov kom lub Moo Zoo hnub no pab peb kom muab siab mloog Tswv Ntuj Lo Lus. Tsis txhob ntxhov siab vim yus yog neeg ntseeg, tsis txhob tu siab vim yus ua neeg ntseeg cov hauj lwm tshaj Ntuj Lus. Thov Tswv Ntuj foom hmoov zoo rau nej txhua leej txhua tus.
Nyob zoo.
