Hnub chiv tim 3 lub 11 hli ntuj 2024
Mas Kos. 12: 28-34
Lub lis piam 31st
Lub Caij Nyob Nruab Xyoo
“Koj yuav nyiam koj tus Huab Tais Tswv Ntuj tas siab tas ntsws, tas koj tus ntsuj plig,…thiab koj yuav nyiam tus nyob ze koj ib yam li koj nyiam koj.”
Nyob zoo…
Cov kwv tij hmoob, Huab Tais Yes Xus cov lus hnub no qhia txog thawj lo lus qhia. Peb paub zoo lawm tias thawj lo lus qhia hauv lub Koom Txoos Kas Tos Liv yog lo lus qhia ntawm kev nyiam Tswv Ntuj thiab nyiam tus nyob ze peb. Tsis muaj lwm lo lus qhia loj dua ob lo lus no. Cov ntseeg txog Yes Xus tas huv tsi yeej ntseeg li ntawd tiag, tsis hais cov Kas Tos Liv los cov Pos Tes Tas. Nyem no mas, thov caw peb saib ntwm 2 Lo Lus Qhia no kom meej me ntsis.
Lo Lus Qhia tim 1 hais tias: “Koj yuav nyiam koj tus Huab Tais Tswv Ntuj tas siab tas ntsws, tas koj tus ntsuj plig, tas koj lub tswv yim thiab tas koj lub zog. Txhais tias peb yuav tsum nyiam Tswv Ntuj tag nrho, muab peb tus kheej tag nrho nyiam Tswv Ntuj, nyiam Tswv Ntuj txhua lub sij hawm, tsis yog hais tias peb nyiam Tswv Ntuj thaum peb koom thaj txi Ntuj xwb, los tsis tias peb nyiam Tswv Ntuj thaum peb ua kab ke txais lub cim ntxuav xwb, los thaum peb muaj mob muaj nkeeg, muaj teeb meem los sis thaum peb yuav tuag xwb. Peb teev Ntuj tas, peb koom thaj txi Ntuj tas, thaum peb rov qab mus tsev, peb kuj yuav tsum nyiam Tswv Ntuj thiab. Hais li no tas lawm ces, peb yuav nyiam Tswv Ntuj tau li cas?
Kuv thov teb li no, Huab Tais Yes Xus hais ntxiv tias: Lo lus qhia ob yog lo lus no: koj yuav nyiam tus nyob ze koj ib yam li koj nyiam koj.” Lo lus qhia no teb lo lus nug lawm. Peb nyiam Tswv Ntuj tiag tiag thaum peb nyiam cov kwv tij uas nyob ze peb. Peb hais tsis tau tias peb nyiam Tswv Ntuj tshaj plaws, yog peb tsis nyiam cov nyob ib puag ncig peb. Leej Ntshiab Zam nyob hauv Tsab Ntawv ib zaj 4 nqe 20-21 hais tias: Yog muaj ib tug hais tias: Kuv nyiam Tswv Ntuj, tab sis nws ntxub nws tus kwv, mas nws yog ib tug neeg dag. Tus tsis nyiam nws tus kwv uas qhov muag pom tau, mas nws nyiam tsis tau Tswv Ntuj uas qhov muag tsis pom.
Lo lus qhia uas peb tau txais ntawm Leej txiv los yog lo lus no: tus nyiam Tswv Ntuj, mas nws yuav tsum nyiam nws tus kwv.
Li ntawd mas peb hais tsis tau tias kuv nyiam Tswv Ntuj, kuv ntseeg txog Tswv Ntuj, tab sis kuv tsis nyiam kuv niam kuv txiv vim nws cem cem kuv, kuv tsis nyiam tus no vim nws hais lus phem rau kuv, kuv tsis nyiam tus ntawd vim nws ua neej tsis zoo, kuv tsis nyiam leej twg li, kuv nyiam kuv tus kheej xwb. Peb hais tsis tau tias peb ntseeg txog Tswv Ntuj yog peb tsis cev tes pab cov neeg txom nyem, los yog peb tsis khuv leej lwm tus, los peb tsis zam txim rau cov ua txhaum rau peb, peb lub siab yuav nyob kaj lug tau li cas, peb yuav nyiam Tswv Ntuj tau li cas.
Cov kwv tij, thaum peb hais txog nyiam cov nyob ze peb, txhob xav txog yam loj loj peb yuav tsum ua, txawm yog yam me me peb ua vim peb nyiam lawv kuj zoo tshaj plaws lawm xwb.
