Zaj nyeem hnub tim 29 lub 3 hlis 2026
Hnub Chiv Nquam Nplooj
Cov lus nyob hauv Mas Tais Ntawv Moo Zoo (MT 21: 1-11)
Kwv tij zoo nyiam sawv daws, hnub no yog hnub chiv Nquam Nplooj. Peb pib lub lis piam ntshiab lawm. Thov caw peb cov ntseeg sawv daws npaj siab npaj tsws nrog Huab Tais Yes Xus mus hauv txog kev txom nyem. Thov kom peb ras txog peb tus ntoo cuam uas peb kwv niaj hnub. Peb kwv peb tus ntoo cuam, kev txom nyem, kev txhaum, kev tsis zoo, ces peb nrog Huab Tais Yes Xus mus kom dhau txoj kev txom nyem no mus txog kev cawm.
Hauv lub Moo Zoo hnub no peb hnov tias cov nyob tom Yes Lus Xas Les txais Huab Tais Yes Xus xws li Leej Pleev. Tsoom neeg qw tias “Das Vis Leej Tub, thov koj cawm peb. Tus uas Huab Tais xa tuaj, no koob meej! Tus nyob saum cov txheej ntuj siab, thov koj cawm peb!” Lawv hais li ntawd kuj vim tias Huab Tais Yes Xus yog lawv txoj kev vam thiab cia siab. Lawv vam thiab cia siab tias Tswv Ntuj yuav cawm lawv. Tswv Ntuj tsis tso lawv pov tseg.
Yog tiag tias Huab Tais Yes Xus yog tus vaj, tiam sis nws tsis yog tus vaj zoo li Das Vis los sis zoo li lwm cov vaj. Tus vaj Yes Xus yuav mus ntsib kev txom nyem thiab kev tuag. Tus vaj no yuav raug luag hiam, raug luag ntaus, raug luag dai saum ntoo cuam. Nws ua li no kom tib neeg tau txais kev cawm. Kev cawm uas tus vaj Yes Xus yuav pub rau tib neeg tsis yog kev cawm ntawm txoj sia nyob ntiaj teb no xwb, tiam sis yog kev cawm ntawm kev npab, kev txhaum, kev tsis zoo uas ua rau peb tsis muaj kev thaj yeeb, tsis muaj kev ywj pheej.
Kwv tij zoo nyiam sawv daws, thov kom peb siv lub sij hawm hauv lub lis piam ntshiab no kom zoo mog. Thov kom peb ras txog Huab Tais Yes Xus txoj kev txom nyem uas yog nws txoj kev hlub peb thiab ras txog peb txoj kev ntseeg txog nws. Peb muaj txoj kev ntseeg txog Yes Xus li cas lawm?
Nyob zoo sawv daws.
