Hnub Chiv tim 25 Lub 2 Hlis Ntuj 2024
Lub lis piam tim 2 hauv lub caij Plaub Caug
Mas Kos 9: 2-10
Nyob zoo…
Hnub no yog hnub chiv lub lis piam tim 2 hauv lub caij Plaub Caug. Kwv tij sawv daws, peb tab tom taug kev mus txog hnub tseem ceeb tshaj plaws uas yog hnub Huab Tais Yes Xus yuav rov qab los. Ua ntej mus txog hnub ntawd, peb yuav tsum nrog Yes Xus mus dhau kev txom nyem peb thiaj tau txais kev yeej ntawm kev tuag.
Hnub no, peb mloog Tswv Ntuj Lo Lus hauv Mas Kos Ntawv Moo Zoo hais txog Yes Xus lub hwj chim tawm los. Yes Xus coj Pob Zeb, Yas Kos, thiab Zam lawv rau ib qho, nws coj lawv mus saum ib lub roob siab. Ntawm no mas peb pom tias lub roob hauv Ntawv Ntshiab tseem ceeb tshaj vim rau qhov hais tias lub roob yog ib qho chaw uas tib neeg los tus thawj coj loj loj hauv His Xas Lais ib yam li Mais Xes, Es Lis As, nkawd pom Tswv Ntuj. Hauv Ntawv Ntshiab lub roob thiaj yog qhov chaw uas tib neeg pom Tswv Ntuj thiab nrog Tswv Ntuj sib tham.
Vim li cas Yes Xus thiaj ua kom nws lub hwj chim tawm tuaj zoo li ntawd?
Vim nws xav kom peb ntseeg zoo tias Yes Xus ib txhij yog Tswv Ntuj tus Pleev thiab nws yog tus yuav raug luag muab nws pov tseg. Thiab Yes Xus yog tus tsis kam ua tus Pleev muaj hwj chim rau txhia leej pom: nws yog Tswv Ntuj tus Tub yuav raug luag hiam.
Nqe no qhia tej yam zoo li ntawd vim nqe no piav tias Yes Xus lub hwj chim tawm tuaj, tab sis yog tawm tuaj rau peb leeg pom xwb; thiab thaum nws lub hwj chim tawm tuaj mas nws tham txog qhov nws yuav raug luag hiam. Li ntawd mas nqe no phim Mas Tais ntawv Moo Zoo: yam li Yes Xus yog tus Pleev nyiam ua tus me thiab tuaj yeem raug txom nyem.
Mais Xes tawm tuaj: vim Mais Xes yog tus sawv His Xas Lais chaw nrog Tswv Ntuj Cog Lus thawj zaug. Hes Lias tawm tuaj, vim cov Yus Das hais kom tias Hes Lias yog tus yuav tuaj npaj txoj kev rau tus Pleev yuav tuaj.
Lawv nrog Yes Xus tham… tham txog dab tsi?
Lus Kas piav tias lawv tham txog qhov Yes Xus yuav mus laug txom nyem nyob Yes Lus Xas Les. Peb tug thwj tim thiaj ib txhij pom Yes Xus muaj Tswv Ntuj lub hwj chim thiab tham txog txoj kev raug luag hiam. Cov thwj tim tsis to taub dab tsi li.
Pob Zeb hais tias “peb nyob ntawm no mas hmoov zoo kawg.” Nws xav ua lub tsev tsam phooj, nws nyiam qhov chaw ntawd, nws xav nyob ntawd vim tias qhov chaw ntawd yog zoo li Ntuj lub ceeb tsheej lawm.
Tab sis mas, qhov ntawd tsis yog qhov tiag. Huab Tais Yes Xus tsis xav li ntawd. Lub ntsiab lus uas Yes Xus, Mais Xes thiab Es Lias sib tham yog Yes Xus yuav mus laug txom nyem nyob Yes Lus Xas Les. Nws yuav raug luag hiam thiab muab nws tuag. Yes Xus cov thwj tim kuj yuav raug zoo ib yam thiab.
Kwv tij zoo nyiam sawv daws, ntau zaus peb kuj zoo li Pob Zeb. Peb tsis xav txais kev txom nyem hauv peb lub neej. Peb tsis xav muaj kev kub ntxhov kev txom nyem, xav tias yus ua Yes Xus cov thwj tim lawm ces yus yuav muaj suab muaj npe, yus yuav muaj nyiaj muaj txiag, yus yuav nplua nuj, yus tsis muaj teeb meem dab tsi li. Qhov ntawd mas tsis yog Yes Xus txoj kev. Yes Xus cov thwj tim tsis yog li ntawd. Nyob niaj teb no mas yeej muaj kev txom nyem, yeej muaj teeb meem, tsis muaj leej twg tsis muaj teeb meem, tsis muaj leej twg tsis muaj kev txom nyem. Tab sis mas, peb yuav tsum txais qhov ntawd hauv txoj kev ntseeg. Yes Xus hais rau nws cov thwj tim tias: yog leej twg xav los raws kuv, nws yuav tsum nrauj nws, nws yuav kwv nws tus ntoo cuam, nws yuav lawv kuv qab. Yes Xus cov thwj tim yuav tsum kwv kev txom nyem, cov teeb meem, kev nyuaj siab txhua yam, ces lawv Yes Xus qab.
Hnub no, Huab Tais Yes Xus kuj hais rau peb sawv daws thiab mog. Cov kwv tij, peb ua puas tau?
ZAJ NYEEM HNUB TIM 25 LUB 2 HLIS 2024
HNUB CHIV LUB LIS PIAM OB CAIJ PLAUB CAUG
COV LUS NYOB HAUV MAS KOS NTAWV MOO ZOO (MK 9: 2-10)
ZAJ NYEEM HNUB TIM 26 LUB 2 HLIS 2024
HNUB OB LUB LIS PIAM 2 CAIJ PLAUB CAUG
COV LUS NYOB HAUV LUS KAS NTAWV MOO ZOO (LK 6: 36-38)
Kwv tij Hmoob sawv daws, Huab Tais Yes Xus cov lus hnub no nej hnov mas yog cov lus tseeb thiab ncaj tshaj plaws, nej xav kom Huab Tais Tswv Ntuj txiav li cas rau nej mas nej yuav tsum ua li ntawd rau lwm tus neeg. nej xav kom Huab Tais Tswv Ntuj hlub nej, mas nej yuav tau hlub luag tej. Nej xav kom Huab Tais Tswv Ntuj txhob txiav txim rau nej, mas nej tsis txhob txiav txim rau luag tej. Nej tsis xav kom Huab Tais Tswv Ntuj muab txim rau nej, mas nej tsis txhob muab txim rau luag tej. Nej xav kom Tswv Ntuj zam txim rau nej, mas nej yuav tsum zam txim rau tus neeg ua phem rau nej. Nej xav kom Huab Tais Tswv Ntuj mloog nej cov lus thov thiab pub rau nej, mas nej yuav tsum xub pub rau luag tej tso. Yog nej ua li ntawd, mas Tswv Ntuj haj yam muab ntau tshaj qhov nej ua rau luag tej.
Kwv tij Hmoob, peb tig los xav saib peb puas tau hlub thiab nyiam cov nyob ib ncig peb, peb puas ua neeg nyiam txiav txim thiab muab txim rau lwm tus, peb puas muaj lub siab zam txim rau tus ua tsis zoo rau peb, peb puas pub yam peb muaj rau cov neeg tsis muaj?
Yog peb twb tsis tau ua li hais, mas peb puas yuav muaj cuab kav thov kom Huab Tais Tswv Ntuj hlub peb, txhob muab txim rau peb, zam rau peb, los yog pub rau peb?
Hnub no, peb nyias rov ntuas nyias siab, yog tshuav yam twg peb tseem tsis tau ua, mas nyob hauv lub caij Plaub Caug no peb kav tsij xyaum ua mog, txog hnub Huab Tais Yes Xus sawv rov los mas peb thiaj tsim nyog mus koom cav txog Huab Tais Yes Xus lub koob meej ua ke thiab tsim nyog mus koom Huab Tais Yes Xus rooj qav Hla.
Nyob zoo sawv daws.
ZAJ NYEEM HNUB TIM 27 LUB 2 HLIS 2024
HNUB NCO TXOG LEEJ NTSHIAB NQES NKOS LIS NYOB NAS LES
COV LUS NYOB HAUV MAS TAIS NTAWV MOO ZOO (MT 23: 1-12)
Cov Hmoob sawv daws, peb ua neej nyob mas peb nyiam nyiam txiav txim rau lwm tus raws li qhov peb pom, ces ua rau peb tsis nco pom txog qhov zoo nyob hauv tus neeg ntawd. Piv li peb pom ib tug neeg hnav zoo, mas peb txiav tias nws yog neeg muaj; peb pom ib tus neeg hnav khaub khaub hlab, mas peb lub tswv yim twb txiav tias nws yog neeg txom nyem.
Peb nyiam txiav li ntawd tiag!
Hnub no Huab Tais Yes Xus hais tias thaum peb pom cov neeg tshaj Ntuj Lus coj tus yam ntxwv tsis zoo, mas peb txhob liam tias tas txhua yam ntawm nws yeej tsis zoo, ces peb yuav tsis mloog nws cov lus. Huab Tais Yes Xus qhia peb tias txawm nws coj tus yam ntxwv tsis zoo tsis haum peb siab, los kom peb mloog nws cov lus tshaj txog Tswv Ntuj Lo Lus, vim tias cov lus ntawd yog tuaj ntawm Tswv Ntuj tuaj.
Peb txhob muab nws tus yam ntxwv los tus cuj pwm tsis zoo los ua chaw theem kom peb tsis tau txais Tswv Ntuj Lo Lus los yug peb txoj sia, los ua hauj lwm hloov peb lub siab lub tswv yim.
Yog peb txiav tias nws tsis zoo, ces kuv tsis yuav nws cov lus, mas yog peb tab tom kaw qhov rooj rau Tswv Ntuj Lo Lus.
Cov kwv tij, ntseeg tias nyob hauv peb pawg ntseeg mas yeej muaj tej tus Txiv Plig, Xib Hwb, los cov tub tshaj Ntuj Lus coj tus yam ntxwv tsis haum lub Moo Zoo tiag. Tsis hais kuv los nej, muaj tej tus yeej tsis nyiam peb tus yam ntxwv. Tab sis xav kom sawv daws nco Huab Tais Yes Xus cov lus hauv hnub no cia; “Nej ua tas txhua yam lawv qhia nej, thiab nej khaws huv tib si tseg, tab sis nej txhob ua raws li lawv.”
Cov kwv tij Hmoob, kuv yog ib tug Txiv Plig, yog Tswv Ntuj ib tug tub tshaj Ntuj Lus, kuv niaj hnub tuaj tshaj Huab Tais Yes Xus lub Moo Zoo rau nej mloog. Nej mloog thiab nej coj mus ua raws, tab sis nej txhob yoog raws kuv tus yam ntxwv los tus cuj pwm vim tias kuv yog ib tug neeg xws li nej, muaj ntau yam kuv kuj tau ua tsis xis Tswv Ntuj siab thiab tsis ntxim nej siab.
Qhov kuv vam ntawm nej, yog kom nej pab thov Tswv Ntuj rau kuv thiab rau tas cov tub tshaj Ntuj Lus sawv daws, kom peb sawv daws ua tau ib tug piv txwv zoo raws li Huab Tais Yes Xus qhia.
Nyob zoo sawv daws.
ZAJ NYEEM HNUB TIM 28 LUB 2 HLIS 2024
HNUB PLAUB LUB LIS PIAM 2 CAIJ PLAUB CAUG
COV LUS NYOB HAUV MAS TAIS NTAWV MOO ZOO (MT 20: 17-28)
Kwv tij Hmoob sawv daws, thaum Huab Tais Yes Xus lawv nce mus pem Yes Lus Xas Les, mas Huab Tais Yes Xus hais rau cov thwj tim tias nws yuav raug ntes thiab muab tua, tab sis zoo li cov thwj tim tsis kub siab mloog, lawv tsuas xav tias Huab Tais Yes Xus yog tus Pleev uas yuav coj kev twj lij tuaj rau haiv His Xas Lais, Huab Tais Yes Xus yuav ntiab cov nom tswv Los Mas tawm hauv lub teb chaws mus, ces sawv daws yuav tsa Huab Tais Yes Xus ua vaj. Lawv xav raws li cov lus uas cov Yaj Saub hais tseg. Yog li hnub no peb thiaj hnov Zam thiab Yas Kos nkawd niam los hais rau Huab Tais Yes Xus tias txog hnub Huab Tais Yes Xus ua vaj mas thov kom tsa nws ob tug tub ua ob tug loj nyob ntawm Huab Tais Yes Xus sab xis thiab sab laug.
Cov kwj tij, tsis yog nkawd niam ib leeg thiaj li xav li ntawd, nkawd los kuj xav li ntawd thiab, lwm tus thwj tim los yeej xav ib yam li ntawd; sawv daws xav tau lub koob meej nyob ntiaj teb no.
Ntseeg tau tias nyob hauv peb sawv daws, los peb yeej xav li ntawd. Tos kuv hais li no, vim thaum peb ua ib txog hauj lwm twg mas peb yeej xav kom tau nce qib siab zuj zus; ces peb nyiaj hli yuav nce, peb lub meej mom yuav ncha, sawv daws yuav saib taus thiab hwm peb.
Hnub no Huab Tais Yes Xus qhia tias peb txhob xav li ntawd. Yog peb xav ua tus loj, xav kom muaj neeg hwm thiab saib taus, xav kom peb nyiaj hli nce; mas peb tsum ua tus neeg me, ua zoo li ib tug qhev tsob hwb sawv daws. Qhov no tsis yog kom peb ua rau tej nom tswv, los peb tus hau xwb, los tsis yog lam ua rau luag pom tias peb nyiam ua tus me kom taulus qhua. Tab sis peb tsum ua tawm hauv nruab siab tuaj tiag tiag thiab tsum tsob hwb txhua tus neeg txij tus hlo mus txog tus yau, txij tus me nyuam mus txog tus laus.
Cov kwv tij, qhov no tsis yooj yim kiag li. Yog li ntawd, peb thiaj yuav vam txog Huab Tais Yes Xus pub Leej Ntuj Plig ua lub zog rau peb, vam txog Huab Tais Yes Xus lo lus los ywg peb lub siab kom muag kom mos, mas peb thiaj yuav txo tau peb lub hwj chim pov tseg, es tig los ua tus neeg me tsob hwb sawv daws xws li Huab Tais Yes Xus nqes los yeem ua tus me tsob hwb peb sawv daws.
Nyob zoo sawv daws.
ZAJ NYEEM HNUB TIM 29 LUB 2 HLIS 2024
HNUB TSIB LUB LIS PIAM 2 CAIJ PLAUB CAUG
COV LUS NYOB HAUV LUS KAS MOO ZOO (LK 16: 19-31)
Kwv tij Hmoob sawv daws, lub Moo Zoo hnub no nej tau hnov yog Huab Tais Yes Xus piav txog tus neeg nplua nuj thiab tus neeg pluag tias thaum nkawd tuag lawm mas nkawd yuav mus ntsib dab tsi. Tsis yog Huab Tais Yes Xus tab tom qhia kom peb ua neeg pluag nyob txom nyem ntsuav mas peb thiaj yuav tau ntuj ntoo, tsis yog Huab Tais Yes Xus thuam cov neeg muaj.
Tab sis muaj ib lub ntsiab tob nyob hauv zaj no cia rau peb coj mus xav tias yog vim li cas tus nplua nuj thiaj poob rau hauv ntuj txias teb txaus, ua cas tus pluag thiaj tau mus nrog Has Nplas Has nyob?
Yog peb ua tib zoo saib, peb yuav pom tias tus nplua nuj hauv zaj no mas nws muaj noj muaj hnav, nws nplua nuj heev, niaj hnub nws ua tej rooj qav loj los noj mas yeej tshuav cov zaub mov seem ntau, tab sis nws tsis liam fab pub ib yam me me rau tus pluag nyob ze ze ntawm nws lub qhov rooj loog li. Tej zaum tus pluag kuj yuav tau me ntsis noj thiab, tab sis tsuas yog tej niag qub zaub qub mov lawv coj tuaj pov tseg rau tej dev noj xwb! Txaus hlub kawg.
Cov kwv tij Hmoob, Huab Tais Yes Xus tsis tau qhia tias kev nplua nuj los nyiaj txiag yog yam tsis zoo, tab sis Huab Tais Yes Xus ntuas peb kom ceev fab txhob cia peb kev nplua nuj los peb tej nyiaj txiag los laum peb, ua rau peb ntsia tsis pom Huab Tais Tswv Ntuj, ua rau peb tsis nco qab nco txog cov neeg txom nyem nyob ib puag ncig peb.
Thaum peb muaj nyiaj ntau, peb pib nrhiav kev lom zem, pib haus dej haus cawv, pib ua neeg liam nrhiav kev plees. Qhov no yog peb tab tom tsis nco txog Huab Tais Tswv Ntuj.
Thaum peb muajnyiaj ntau, peb pib saib tsis tau lwm tus, peb tsis mloog lwm tus hais, peb tsab cai. Qhov no yog peb tsis nco txog cov nyob ib puag ncig peb.
Hnub no, Huab Tais Yes Xus xav qhia peb kom txhob ua li tus nplua nuj no. Hnub no Huab Tais Yes Xus xav kom peb ntsia pom Huab Tais Tswv Ntuj thiab ntsia pom cov neeg txom nyem nyob ze ze peb. Lub Koom Txoos los kuj xav qhia peb li ntawd, mas nyob hauv lub caij Plaub Caug no, lub Koom Txoos thiaj muab ib lub twj ceev nyiaj rau peb tauniaj hnub tso nyiaj rau hauv, kom tau coj mus pab cov neeg txom nyem thiab yogi b lub cim qhia peb kom ras tau tias tseem muaj cov neeg pluag cov neeg txom nyem ntshaw kev pab ntawm peb, mas peb yuav tau nco txog lawv, txhob ua lub siab txhav, txhob cia nyiaj txiag los kev nplua nuj plooj peb lub qhov muag kom tsis pom lawv. Nyob zoo sawv daws.
ZAJ NYEEM HNUB TIM 1 LUB 3 HLIS 2024
HNUB RAU LUB LIS PIAM 2 CAIJ PLAUB CAUG
COV LUS NYOB HAUV MAS TAIS NTAWV MOO ZOO (MT 21: 33-43, 45-46)
Kwv tij Hmoob sawv daws, thaum peb mloog Huab Tais Yes Xus zaj paj lug hauv lub Moo Zoo hnub no mas peb yeej ib txwm hnov cov tub tshaj Ntuj Lus nthuav rau peb paub tias yog hais txog Tswv Ntuj pub nws lub Ceeb Tsheej rau cov His Xas Lais, tab sis lawv tsis yuav, lawv tseem muab Tswv Ntuj Leej Tub tua pov tseg thiab, mas nyem no Huab Tais Tswv Ntuj thiaj pub nws lub Ceeb Tsheej rau lwm haiv neeg. Peb yeej ib txwm hnov li no tiag thiab zaj paj lug no yeej yog txhais li ntawd.
Nyob hauv hnub no peb thiaj yuav muab coj los xav ntxiv saib nyob hauv lub caij Plaub Caug no, Huab Tais Yes Xus puas yuav qhia dab tsi ntxiv rau peb.
Nyob hauv zaj no, peb yuav hnov Huab Tais Yes Xus nug tsoom sid tuaj mloog nws tias “Ntawm nej ne, nej xav tias thaum tus tswv teb tuaj txog, nws yuav ua dab tsi rau cov zov teb siab phem ntawd?”
Sawv daws hais tias “Tus tswv teb yuav ua kom cov zov teb siab phem ntawd tuag txom nyem ntsuav, ces nws yuav ntiav lwm cov neeg zov nws daim teb.”
Thaum Huab Tais Yes Xus hnov lawv cov lus teb, mas Huab Tais Yes Xus hais li cas rau lawv?
Huab Tais Yes Xus tsis hais tias lawv hais tau raug lost sis raug, nws tsuas hais tias “Vim li ntawd, kuv hais rau nej. Ntuj yuav thau lub Ceeb Tsheej ntawm nej los cev rau ib haiv neeg uas yuav muab siab rau tu kom txi txiv.”
Cov kwv tij Hmoob, kom peb nco tias peb txiav txim li cas rau lwm tus, mas Tswv Ntuj yuav txiav txim li ntawd rau peb, mas hnub no cov Yus Das txiav txim li ntawd, ces Huab Tais Yes Xus thiaj qhia lawv tseeb tseeb tias yog vim lawv lub siab xav li ntawd, lawv tsis muaj lub siab zam txim, mas Tswv Ntuj thiaj pub raws li lawv lub siab ntshaw.
Lub caij Plaub Caug no, peb yuav tau tig los hloov siab tshiab, thov Ntuj pub ib lub tswv yim tshiab rau peb kom peb to taub Tswv Ntuj lub siab tias peb tus Tswv Ntuj nyiam kom peb ua dab tsi rau peb cov kwv tij.
Nyob zoo sawv daws.
ZAJ NYEEM HNUB TIM 2 LUB 3 HLIS 2024
HNUB XYA LUB LIS PIAM 2 CAIJ PLAUB CAUG
COV LUS NYOB HAUV LUS KAS NTAWV MOO ZOO (LK 15: 1-3, 11-32)
Cov kwv tij Hmoob sawv daws, nyob hauv Huab Tais Yes Xus zaj paj lug no muaj 3 tus neeg cia rau peb coj los twm txog. Tus ib yog leej txiv, tus ob yog tus tub yau, thiab tus peb yog tus tub hlob.
Peb pom tias leej txiv hlub nws ob tug me nyuam sib luag zos, thaum tus tub yau taij kom leej txiv faib lub cuab tam feem yog nws tug rau nws, mas leej txiv zoo siab faib rau, ces tus tub nqa tas nws lub cuab tam thiab tawm rooj mus ua nws lub neej, mas leej txiv tu siab kawg, tab sis leej txiv tsis tso nws tus me tub pov tseg. Leej txiv tos ntsoov saib puas yuav muaj ib hnub twg nws tus tub yau rov los cuag nws. Thaum tus tub yau rov los, nws ua lub cuab tam poob tas, tsis kav leej txiv tsis chim tsis cem nws, tab sis leej txiv zoo siab thiab ua ib rooj qav txais nws tus tub rov los.
Ntawm tus tub yau, thaum nws muab lub cuab tam phab tas, nws raug kev txom nyem ces nws tu siab thiab nws xav los thov txim ntawm leej txiv, ces nws rov los, nws xav tias txij no mus mas nws tsis tsim nyog yuav ua ib tug tub lawm, nws tsuas yog ib tug tub zog lawm xwb.
Hais txog tus tub hlob, mas nws tsis zoo siab thaum pom tias nws txiv zoo siab uas pom nws tus kwv rov los, nws chim thiab npau taws.
Cov kwv tij Hmoob, hnub no peb muab 3 tus neeg no coj los piv rau peb, saib peb tus yam ntxwv zoo li tus twg?
Peb puas muaj ib lub siab nyiam siab hlub luag tej zoo li leej txiv?
Peb puas ua neeg khav theeb tab sis txawj tu siab rau peb cov txhaum thiab thov los cuag Tswv Ntuj xws li tus tub yau?
Los peb muaj ib lub siab khib tsis xav pom luag tej tau zoo thiab peb muaj kev npau taws thaum pom Tswv Ntuj zam rau lwm tus xws li tus tub hlob.
Nej xav mog, nyob zoo sawv daws.
