Hnub Chiv Tim 23 Lub 3 Hlis Ntuj 2025
Lub Caij Plaub Caug 3
Lus Kas 13:1-9
“Yog nej tsis xav tig los hloov dua siab tshaib, mas nej yuav tuag ib yam li ntawd thiab.”
Kwv tij hmoob sawv daws, hnub no yog hnub chiv lub lis piam 3 hauv lub caij plaub caug. Hauv Lus Kas Ntawv Moo Zoo hnub no Huab Tais Yes Xus zeem tseeb tias nws cov thwj tim huv tib si yuav tsum “tig los yuav lub siab tshiab,” ua lub neej tshiab hauv txoj kev ncaj, hauv Tswv Ntuj txoj kev. Yog peb muaj cuab kav lees tias peb ua txhaum, peb yog neeg txhaum, peb thiaj li xav tig los hloov siab tshiab, peb thiaj tau txais kev cawm.
Hauv lub Moo Zoo hnub no, peb hnov hais tias cov Nkas Lis Lais uas Pis Las Tos muab lawv cov ntshav hliv xyaw rau cov ntshav uas lawv txi Ntuj, cov Yus Das xav tias cov no yog neeg txhaum, lawv ua txhaum hnyav kawg, lawv ua txhaum loj dua sawv daws. Huab Tais Yes Xus hais tias tsis yog li ntawd. Txhob xav tias kev tuag, kev txom nyem, los sis xwv txheej ntau yam uas tshwm sim hauv peb lub neej tuaj ntawm Tswv Ntuj tuaj. Tsis yog Huab Tais Tswv Ntuj muab txim rau peb. Thiab txhob xav tias kev txom nyem los xwv txheej hauv peb lub neej tshwm sim kuj vim tias cov txhaum peb ua, Tswv Ntuj thiaj muab txim rau peb. Tsis yog li ntawd, txhob xav li ntawd nawb. Qhov uas Tswv Ntuj xav kom peb ua yog “tig los hloov dua siab tshiab.” “Yog nej tsis xav tig los hloov dua siab tshiab, mas nej yuav tuag ib yam li ntawd thiab.”
Kwv tij zoo nyiam sawv daws, peb ua txhaum, peb yog neeg txhaum, ntau zaus peb ua txhaum tsis txawj nres, tiam sim peb puas paub tias Huab Tais Tswv Ntuj ua siab ntev ntev rau peb npaum li cas? Zaj paj lug hnub no hais txog tsob txiv ncuav pias tsis txi txiv. Tau peb xyoo lawm uas tsob txiv ncuav pias tsis txi txiv, tus tswv xav muab tsob ntoo ncuav puas ntov. Tiam sis, tus tub xib zov vaj thov kom cia tsob ntoo nyob ib xyoo ntxiv, nws yuav saib xyuas kom zoo dua, nws yuav khawb av ncig lub hauv paus ntoo thiab npoog chiv rau. Tej zaum yav tom ntej, tsob ntoo yuav txi txiv.” Tus tswv tsob txiv ncuav pias yog Leej Txiv Tswv Ntuj, tus tub txib zov vaj yog Huab Tais Yes Xus, ib tsob txiv ncuav pias yog tib neeg, yog neeg txhaum, los yog peb sawv daws. Cov kwv tij, nej puas pom Huab Tais Yes Xus nyiam peb cov neeg txhaum npaum li cas, nws thiaj thov Leej Txiv kom peb muaj sij hawm ntxiv mus kom peb yuav lub siab tshiab, tig los nrhiav Tswv Ntuj, yuav lub siab tshiab tsis rov qab los ua txhaum ib zaug dua, tsis rov qab los nhriav qhov txhaum ntix mus lawm yav tom ntej. Huab Tais Yes Xus thov kom peb muaj sij hawm txi txiv tau, nws muab sij hawm rau peb kom ua neej txawj paj txi txiv, kom nyiam thiab hlub lwm tus hauv peb lub neej, kom peb ua zoo rau cov nyob ib puag ncig peb, kom peb txhob txiav txim rau luag, tiam sim hlub lawv, tsis yog ntxub lawv.
Thov Tswv Ntuj pab peb kom tig los hloov dua siab tshiab tiag tiag thiab tig los nhriav Tswv Ntuj hauv lub caij Plaub Caug no.
