Hnub Chiv tim 22 lub 6 Hlis 2025
Hnub Hwm Yes Xus lub Siab lub Plawv (Hwm lub Cim Ntshiab)
Lub Caij Nyob Nruab Xyoo
Lus Kas 9: 11b-17
Nyob zoo…
“Nej muab mov rau lawv noj mas!” nov yog lo lus uas Huab Tais Yes Xus hais rau cov thwj tim. Tsoom sid rawv Yes Xus qab mus vim lawv xav mloog Yes Xus cov lus qhia. Yes Xus paub zoo tias mov yog ib qho tseem ceeb tshaj plaws uas yug neeg lub neej. Peb mus kev tsis tau yog peb tsis tau noj mov, peb leg dej num tsis tau yog peb tsis muaj mov noj, yus txoj sia, yus yim neeg tsev neeg yuav nyob li cas yog tsis muaj mov muaj zaub los yug yus txoj sia. Ntawm txoj kev ntseeg thiab, peb txoj kev ntseeg yuav nyob nruaj nreb tau li cas yog tias tsis muaj mov los pub yus txoj sia, los yug yus tus tsuj plig. Li ntawd, Huab Tais Yes Xus thiaj muab nws lub cev thiab cov ntshav kom ua cov mov ntshiab yug peb txoj sia, yug cov ntseeg txoj sia.
Cov kwv tij hmoob, hnub no peb hwm Yes Xus lub Siab lub Plawv lo yog Hwm lub Cim Ntshiab los lub Cim Yug. Hauv hmo kawg, ntawm rooj mov, Huab Tais Yes Xus tuav lub ncuav mov thiab lub ntim cawv, nws ua Ntuj tsaug, nws muab ntais, nws cev rau cov thwm tim, nws hais tias “qhov no yog kuv lub cev thiab cov ntshav.” Nws tseem hais ntxiv tias, “nej ua qho no kom nej nco txog kuv.” Hauv thaj txi Ntuj, Leej Ntuj Plig Ntshiab ua kom lub ncuav mov thiab cov cawv txia ua Yes Xus lub cev thiab cov ntshav yug peb txoj sia, yug peb txoj kev ntseeg. Peb noj zaub mov kom yug lub cev qaij daim tawv, peb yeej noj Yes Xus lub cev kom yug peb tsuj plig thiab. Li ntawd, kwv tij sawv daws, txhua hnub chiv nej mus koom thaj txi Ntuj thiab txais lub Cim Ntshiab mog. Nej nquag koom thaj txi Ntuj, nquag txais lub Cim Zam Txim thiab nquag txais lub Cim Yug mog. Vim tias lub cim yug los lub cim ntshiab yog Huab Tais Yes Xus nyob nraim peb, nws nrog nraim peb hauv lub Cim Ntshiab.
Hais txog lub Cim Ntshiab los yog Yes Xus lub siab lub plawv, ces muaj qhov tseem ceeb dab tsi? Muaj qab hau dab tsi rau peb cov ntseeg? Thaum peb ntsia pom lub Cim Ntshiab thiab ras txog Yes Xus lub siab peb pom meej tias yog “kev nyiam.” Huab Tais Yes Xus nyiam peb tshaj plaws, nws thiaj muab nws tus kheej dai saum ntoo cuam thiab tuag kom peb dim ntawm kev txhaum. Thaum peb txais Yes Xus lub cev los yug peb lub cev lawm ces peb kuj yuav tsum hlub luag tej zoo xws li Yes Xus hlub peb. Lub Cim Ntshiab los lub Cim Yug uas lus As Kiv hu tias “Holy Communion” uas lus Thaib “ศีลมหาสนิท” txhais tau tias koom siab koom tsws ua ib pab ib pawg, muaj kev nyiam kev hlub koom siab ua ib pab ib pawg, muaj kev sib haum xeeb, tsis muaj kev sib cav sib ceg sib cais. Lub cim Ntshiab ua kom peb thiab Tswv Ntuj muaj kev sib raug zoo thiab ua kom peb thiab cov neeg ntseeg muaj kev sib raug zoo thiab. Yog peb muaj kev sib haum xeeb muaj kev kaj siab lug hauv peb lub neej kuj txhais tau tias lub Cim Ntshiab tau ua hwj huam yees ntxwv hauv peb lub neej lawm.
Li ntawd, peb cov neeg ntseeg, mas peb yuav nco ntsoov tias lub ntsiab lus tseem ceeb ntawm lub Cim Ntshiab los Yes Xus lub siab lub plawv yog kev nyiam, yog Tswv Ntuj txoj kev nyiam tib neeg. Qhov no yog lub txiaj ntsim tseem ceeb tshaj plaws.
Nyob zoo
