Hnub chiv tim 21 lub 7 hli ntuj 2024
Mas Kos 6:30-34
Caij Nyob Nruab Xyoo
“Nej los rau ib qho chaw xu kev tsis muaj neeg, nej so me ntsis.”
Nyob zoo…
Kwv tij hmoob sawv daws, hnub chiv dhau los, peb hnov tias Huab Tais Yes Xus xa Pab Kaum Ob mus tshaj Ntuj Lus. Hnub no, lawv rov qab los cuag Yes Xus, lawv piav tas puas tsav yam uas lawv tau ua thiab tau qhia. Lawv yuav tsum tau nkees heev. Lawv yuav tsum tau ntsib ntau yam, ob qho tib si zoo thiab phem, yam nyuag siab thiab kaj siab, yam to taub thiab tsis to taub. Tab sis Yes Xus tsis hais dab tsi ntxiv mus, nws tsuas hais rau lawv tias, “Nej los rau ib qho chaw xu kev tsis muaj neeg, nej so me ntsis.” Huab Tais Yes Xus xav kom nws cov thwj tim so saib xyuas yus tus kheej, kom lawv muaj sij hawm nyob ntsiag to xav tswv yim.
Kwv tij sawv daws, peb kuj zoo ib yam li ntawd thiab. Peb ua hauj lwm hnyav hnyav kuj zoo lawm, tab sis, txhob tsis nco qab, peb muaj tsum so thiab. Peb yuav tsum nhriav sij hawm kom yus tus kheej tau so, nhriav sij hawm nrog Tswv Ntuj nyob, nhriav sij hawm rov qab los cuag Huab Tais Yes Xus thiab piav tas puas tsav yam uas peb tau ua thiab tau ntsib hauv yus lub neej rau Yes Xus mloog. Huab Tais Yes Xus yuav mloog peb cov lus tiag tiag. Txhob tsis nco qab rov qab tuaj teev Ntuj, ua Tswv Ntuj tsaug. Hauv peb lub neej, txhob tsis nco qab cov no mog!
Ntxiv mus mas, peb hnov hauv Ntawv Moo Zoo hnub no hais tias muaj coob leej xav mloog Yes Xus cov lus qhia, lawv xav cuag nws, mloog nws lus, thiab xav kom nws pab lawv kom dim ntawm kev mob nkeeg, kev nyuaj siab kev ntxhov siab. Cov neeg no khiav ko taw hauv cov nroog tuaj mus cuag Yes Xus. Thaum Huab Tais Yes Xus pom ib pab neeg coob li no, nws hlub lawv, “vim lawv zoo li cov yaj uas tsis muaj tswv zov.” Ces nws thiaj li qhia lawv ntev loo. Cov lus no Yes Xus hlub lawv, “vim lawv zoo li cov yaj uas tsis muaj tswv zov” ua kom peb paub tias Tswv Ntuj hlub peb tshaj npaum li cas. Hauv zaj paj lug no, tus tswv zov yaj yog Yes Xus, los yog Huab Tais Tswv Ntuj, thiab cov yaj piav tau li peb cov neeg tseeg sawv daws, los cov tib neeg hauv tiaj teb no. Hauv Ntawv Ntshiab, tus sau nyiam siv “cov yaj” los piav li peb sawv daws kuj vim rau qhov hais tias cov yaj lawv saib xyuas lawv tus kheej tsis tau. Yuav tsum muaj tus tswv zov lawv, lawv thiaj dim ntawm xwm txheej, lawv thiaj muaj txoj sia nyob ntxiv mus. Thiab tus tswv zov yaj zoo kuj yuav tsum saib xyuas nws cov yaj kom zoo, tsis tso cov yaj pov tseg. Nyob hauv zaj nyeem ib, hauv Yes Les Mias Phau Ntawv, Huab Tais Tswv Ntuj cem cov tswv phem tias “nej txoj hmoov phem, nej tau ua kom kuv cov yaj tawg, nej caum lawv, nej tsis liam fab saib kuv cov yaj.” Nyem no ntxiv mus yav tom ntej, Tswv Ntuj yuav zov nws cov yaj, vim tias tsis muaj leej zov yaj zoo li Tswv Ntuj zov.
Kwv tij hmoob sawv daws, vim li no, Tswv Ntuj thiaj hlub peb kawg. Peb yog Tswv Ntuj cov yaj. Tswv Ntuj yog tus zoo tswv zov yaj. Tswv Ntuj khuv leej peb, Tswv Ntuj hlub peb tshaj dua peb cov txhuam. Peb txhob tsis nco qab. Tshwj xeeb mas thaum peb muaj kev ntxhov siab kev nyuag siab, muaj xwm txheej, txhob tsis nco qab rov qab los cuag Tswv Ntuj, nyob ntsiag to thov Ntuj, nhriav ib qho chaw xu kev tsis muaj neeg, tsuas muaj yus thiab Tswv Ntuj xwb, ces so me ntsis hauv Tswv Ntuj. Tswv Ntuj yuav nplij peb lub siab, vim Tswv Ntuj hlub peb, vim Tswv Ntuj yog tus Zoo Tswv Zov Yaj.
