ZAJ NYEEM HNUB TIM 19 LUB 10 HLI 2025
HNUB CHIV LIS PIAM 29 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 18: 1-8)
Nyob zoo…kwv tij zoo nyiam sawv daws, hauv lub Moo Zoo hnub no, Huab Tais Yes Xus qhia peb kom nquag thov Ntuj. Peb yuav tsum thov Ntuj xws li tus poj ntsuam taij kom luag ua ncaj rau nws. Hauv zaj paj lug hnub no, peb hnov Huab Tais Yes Xus qhia kom cov thwj tim kom yuav tsum teev Ntuj tsis tseg, txhob ntaus siab yau. Yog tus txwj laus txiav txim cev tes pab tus poj ntsuam tsis yog vim nws ntshai Tswv Ntuj los tsis yog nws yog neeg ncaj ncees, tiam sis nws tsis nyiam cia tus poj ntsuam txob nws. Tswv Ntuj yeej tsis xav zoo xws li tus txwj laus txiav txim no tiag. Peb yog nws cov me tub me nyuam, Tswv Ntuj yeej mloog peb lo lus thov thiag. Thov kom peb teev ntuj tsis tseg, tsis hais ntev npaum li cas, ib hlis ob hlis, los ib xyoos ob xyoo, los tsib xyoo kaum xyoo, thov kom peb teev ntuj tsis tseg. Txog lub sij hawm zoo, lub sij hawm tsim nyog mas Tswv Ntuj yuav pub tiag. Yog peb nquag nquag teev ntuj, teev ntuj tsis tseg, peb txoj kev ntseeg kuj yuav ruaj khov thiab loj hlob tuaj. Huab Tais Yes Xus hais tias “Thaum Neeg Leej Tub rov los, nws puas yuav pom neeg ntseeg nyob ntiaj teb?” yog lawm, muaj tiag! Yog peb teev ntuj tsis tseg, tsis tso Tswv Ntuj pov tseg, thiab yog peb qhia peb cov me tub me nyuam kom txawj teev ntuj, kuj tseem muaj cov neeg ntseeg nyob ntiaj teb no mus txog hnub Huab Tais Yes Xus yuav rov los. Thov Huab Tais Tswv Ntuj foom koob foom hmoov rau peb kom noj qab nyob zoo, muaj zog teev ntuj tsis tseg mog. Nyob zoo sawv daws.
