Hnub chiv tim 17 lub 3 hli ntuj 2024
Zam 12:20-33
“Yog lub noob nplej uas poob rau hauv av tsis tuag, mas nws nyob nws, ua ib lub noob twm zeej. Hos yog nws tuag, mas nws txi txiv ntau.”
Kwv tij hmoob sawv daws, hnub no yog hnub chiv lub lis piam 5 hauv lub caij plaub caug lawm. Lub lis piam yav tom ntej yog lub lis piam Ntshiab lawm, thov kom peb npaj siab npaj tsws kom zoo mog. Lub Moo Zoo hnub no caw peb sawv daws ras txog kev ua Yes Xus cov thwj tim los kev raws Yes Xus qab.
Yes Xus hais tias “Yog lub noob nplej uas poob rau hauv av tsis tuag, mas nws nyob nws, ua ib lub noob twm zeej. Hos yog nws tuag, mas nws txi txiv ntau.” Lub Moo Zoo zaj no yog ib zaj uas kuv nyiam tshaj. Kuv xav tias lub ntsiab lus ntawm Lub Moo Zoo zaj no yog qhov tseeb ntawm peb lub neej. Ntawm peb mas, peb yug los, peb muaj ib txoj sia, peb txoj sia tsis yog peb li xwb. Yus muaj txoj sia nyob tsis yog nyob rau yus tus kheej xwb, tiam sis yus muaj txoj sia rau lwm tus. Yus muaj txoj sia rau yus tus me tub me nyuam, yus muaj txoj sia rau yus niam yus txiv, tus tsev neeg. Zoo li lub noob nplej uas poob hauv av, nws tuag mas, nws yug tshiab, nws txi txiv kom muaj lub noob nplej coob tshaj.
Nej sim xav cov niam cov txiv, nej yuav tsum ua hauj lwm kwv kwv, hnyav hnyav npaum li cas nej thiaj xa nej cov me tub me nyuam kom kawm tiav? nej yuav tsum nhriav noj nhriav haus khwv khwv npaum li cas nej thiaj yug nej me tub me nyuam kom hlob tuaj? Nej khwv tshaj, puas yog? Muaj teeb meem ntau li cas nej kuj yuav tsum dhau kom tau, muaj kev txom nyem hnyav li cas, nej kuj yuav tsum yeej kom tau, puas yog? Ib yam li Yes Xus hais, peb yuav tsum ua neej ib yam li lub noob nplej uas poob hauv av. Yus yuav tsum tso kom qee yam hauv yus tus kheej tua pov tseg, thiaj ua rau lwm yam los lwm tus yug los muaj sia tshiab. Tej zaus, peb yuav tsum tso kom lub neej qub tua pov tseg, thiaj muaj lub neej tshiab, peb yuav tsum tso kev ntseeg qub kom tua pov tseg, thiaj txoj kev ntseeg tshiab hauv Huab Tais Tswv Ntuj, thiaj muaj txoj sia hauv Tswv Ntuj nyob mus li.
Kwv tij zoo nyiam sawv daws, Yes Xus hais tias: “Tus twg nyiam nws txoj sia, mas nws plam nws txoj sia. Hos nyob hauv lub qab ntuj no, tus twg tsis khuv xim nws txoj sia, mas nws yuav ceev nws txoj sia kom ciaj nyob mus li.” Yog peb nyiam peb txoj sia, peb yuav tsum tso kom kev phem kev tsis zoo hauv peb tua pov tseg, peb thiaj muaj txoj sia nyob mus li.
Nyem no mas, peb tseem muaj qee yam dab tsi, peb xav tso kom tua pov tseg nws thiaj ua rau peb ua neeg zoo tuaj. Puas yog kev teev mlom teev dab, puas yog kev ua plees ua yi, puas yog kev sib ntxub, puas yog kev tsis sib haum, puas yog kev sib khib, puas yog kev npau lwj npau liam, puas yog kev sib ceg sib ncaim, nyias tawg nyias mus, noj haus liam sim, noj haus hu dab?
Hnub no, Tswv Ntuj Lo Lus los txog nej lawm, nej xav tswv yim ras txog Tswv Ntuj lo lus mog!
