Hnub Chiv Tim 16 Lub 3 Hlis Ntuj 2025
Lub Caij Plaub Caug 2
Lus Kas. 9:28b-36
“Tus no yog kuv Leej Tub, yog tus kuv Xaiv, nej mloog nws mog.”
Nyob zoo…
Cov kwv tij hmoob, hnub chiv yav tas los, dab phem ntxias kom Huab Tais Yes Xus ceeb toom tias nws yog leej twg, tab sis Huab Tais Yes Xus tsis kam ua raws li dab phem ntxias. Hnub chiv no, Huab Tais Yes Xus kuj tseem tsis qhia rau leej twg paub tias nws yog leej twg. Tab sis mas Pob Zeb, Zam, thiab Yas Kos tab meeg pom tias Yes Xus yog leej twg, Yes Xus yog neeg tseem ceeb npaum li cas? Vim rau qhov hais tias tsis yog Mais Xes, tsis yog Es Lias uas nkawd qhia kom paub, tab sis yog Huab Tais Tswv Ntuj tiag yog tus qhia kom paub tias “Yes Xus yog kuv Leej Tub, yog tus kuv Xaiv,” thiab Leej Txiv Tswv Ntuj hais kom sawv daws “mloog nws mog.” Tsis yog Yes Xus uas nws qhia txog nws tus kheej, thiab tsis yog nws uas tsa nws tus kheej loj dua sawv daws, tab sis yog Leej Txiv yog tus tsa nws, yog Leej Txiv yog tus xaiv nws kom tshaj lub Moo Zoo rau peb, kom ua piv ntxiv rau peb kom paub thiab nyiam Tswv Ntuj tob dua.
Hauv lub Moo Zoo peb hnov Pob Zeb hais tias “Xib Hwb, peb nyob ntawm no mas zoo kawg! Cia peb tsa peb lub tsev tsam phooj nyob ntawm no.” Pob Zeb xav nyob ntawd, nws tsis xav nqes pem roob los. Tab sis mas, Huab Tais Yes Xus tsis xav zoo li Pob Zeb xav, Huab Tais Yes Xus tseem muaj hauj lwm tseem ceeb yuav tsum ua kom tiav yog tias txoj hauj lwm tshaj Ntuj Lus mus txog Yes Lus Xas Les. Nyob Yes Lus Xas Les, Huab Tais Yes Xus yuav raug txim, nws yuav raug lawv dai saum ntoo cuam, nws yuav tuag, ces nws yuav sawv rov qab los muaj txoj sia tshiab. Huab Tais Yes Xus coj nws cov thwj tim Pob Zeb, Zam thiab Yas Kos mus teev Ntuj pem roob. Lawv mus “teev Ntuj.” Thaum Huab Tais Yes Xus tab tom teev Ntuj, cov thwj tim pom Tswv Ntuj lub hwj chim tawm los.
Kwv tij zoo nyiam sawv daws, hauv peb lub neej, los yog cov ntseeg lub neej, peb yuav tsum teev Ntuj tsis tu ncua. Txhob ua dig ua dog, yuav tsum nquag teev Ntuj. Txawm tias peb tsis muaj sij hawm mus koom thaj txi Ntuj txhua hnub chiv, txhob tsis nco qab teev Ntuj. Thaum yus nyob tom vaj tom tsev, los thaum yus nyob tom liaj tom teb kuj xij, txhob tsis nco qab teev Ntuj. Yus coj Tswv Ntuj nrog yus nyob tsis hais qhov twg.
Hnub no, saum lub roob, Huab Tais Yes Xus lub hwj chim tawm los yog qhia rau Yes Xus cov thwj tim kom pom txog txoj sia tshiab, yog txoj sia nyob mus li. Tiam sis, ua nej yuav mus txog txoj sia tshiab nyob mus li, peb yuav tsum dhau ntoo cuam kom tau, peb yuav tsum kwv peb tus ntoo cuam thiab dhau kom tau. Kev nyuaj siab, xwv txheej, kev txom nyem hauv lub neej yog tus ntoo cuam yus yuav tsum kwv kom mus txog Huab Tais Yes Xus tus sawv rov qab los. Yog peb kwv tus ntoo cuam hauv txoj kev ntseeg kom ruaj, peb yuav dhau tus ntoo cuam no tau.
