Hnub Chiv tim 15 lub 6 Hlis 2025
Hnub Hwm Peb Leeg Huab Tais
Zam 16: 12-15
“Tas ib puas tsav yam uas yog Leej Txiv tug, mas kuj yog kuv tug huv tib si. Vim li ntawd kuv thiaj hais rau nej tias: Leej Nplij Neeg yuav coj yam uas yog kuv tug tuaj qhia rau nej.”
Nyob zoo…
Hnub chiv no peb ua hmoov hwm Peb Leeg Huab Tais. Peb ntseeg txog Tswv Ntuj. Peb thiaj li hu yus tus kheej tias “neeg ntseeg” los “cov ntseeg” los sis “pawg ntseeg” cov lus no muaj lub ntsiab txog peb yog cov neeg ntseeg txog Tswv Ntuj. Peb ntseeg txog Tswv Ntuj tib leeg xwb. Tiam sis peb tus Tswv Ntuj muaj 3 Leeg Huab Tais uas yog Leej Txiv, Leej Tub, thiab Leej Ntuj Plig Ntshiab. Los hais tau tias 3 Leeg Huab Tais no koom ua tib tug Tswv Ntuj. Qhov no yog lub Koom Txoos lo lus qhia, qhov no yog peb txog kev ntseeg os cov kwv tij; nej txhob tsis nco qab mog.
Hauv Ntawv Moo Zoo, peb tsis pom Huab Tais Yes Xus qhia txog lo lus qhia Peb Leeg Huab Tais, nyob hauv Ntawv Ntshiab tas nrho, peb kuj tsis pom thiab. Tiam sis, hauv Ntawv Ntshiab Cog lus Qub, ntau zaus hais txog Leej Ntuj Plig thiab hais txog Huab Tais Tswv Ntuj. Hauv Ntawv Cog Lus Tshiab mas, Yes Xus hu Tswv Ntuj ua Leej Txiv, nws hais txog nws tus kheej ua Leej Tub los sis Leej Neeg. Thiab ntau zaus nws hais txog Leej Ntuj Plig Ntshiab. Ib yam li Ntawv Moo Zoo peb hnov hnub no. Lo lus qhia txog Tswv Ntuj tshwj xeeb tshaj yog lo lus qhia txog Peb Leeg Huab Tais to taub tsis yooj yim. Peb tib neeg tsis to taub tag nrho. Peb yuav tsum siv peb lub siab lub ntsws ntseeg xwb thiaj nkag siab, tsis yog siv lub taub hau los sis lub tswv yim xwb.
Lo lus qhia txog Peb Leeg Huab Tais yog kev sib yiam sib hlub. Nyob hauv Peb Leeg Huab Tais yog kev sib nyiam sib hlub. Peb Leeg Huab Tais koom ua tib tug Tswv Ntuj hauv txoj kev sib nyiam sib hlub. Tswv Ntuj tsim tib neeg los kuj vim txoj kev nyiam, Tswv Ntuj tsim txhua tsav txhua yam los kuj vim kev nyiam. Li ntawd, peb tib neeg yuav tsum ua neej nyob hauv txoj kev sib nyiam sib hlub. Peb cov ntseeg yuav tsum ua neej ua piv txwv rau luag pom txoj kev nyiam ntawd. Peb yuav tsum ua tim khawv txog kev nyiam ntawd.
Nyem no yog lub caij uas Leej Ntuj Plig Ntshiab ua hauj lwm nyob hauv lub qab ntuj, nyob lub Koom Txoos, thiab nyob hauv neeg lub siab. Leej Ntuj Plig kaj peb txoj kev, qhib lub siab qhib lub tswv yim kom txais “yam uas Leej Ntuj Plig yuav qhia rau peb.”
Kwv tij zoo nyiam sawv daws, hnub no mloog Tswv Ntuj Lo Lus, peb hwm Peb Leeg Huab Tais, peb twm txog lo lus qhia tseem ceeb txog Tswv Ntuj. Tus Tswv Ntuj no, peb paub nws zoo tshaj, vim tias peb tus Tswv Ntuj nrog peb nyob, peb tus Tswv Ntuj nyob ze peb, peb tus Tswv Ntuj nyob hauv peb. Qhov twg muaj kev nyiam kev hlub, Tswv Ntuj kuj nyob nruab nrab peb. Peb leeg Huab Tais kuj nyob hauv peb. Vim tias kev nyiam kev hlub txhawv hauv Peb Leeg Huab Tais los. Tswv Ntuj los yog Peb Leeg Huab Tais yog lub hauv paus uas txoj kev nyiam tawm los. Yog tsis muaj Tswv Ntuj, kuj tsis muaj kev nyiam kev hlub hauv lub qab ntuj no thiab. Li ntawd, thov kom peb ua piv txwv txog kev nyiam kev hlub zoo li Peb Leeg Huab Tais, vim tias peb tus Tswv Ntuj yog kev nyiam kev hlub.
Nyob zoo sawv daws
