ZAJ NYEEM HNUB TIM 14 LUB 9 HLI 2025
HNUB UA HMOOV HWM YES XUS TUS NTOO CUAM
COV LUS NYOB HAUV ZAM NTAWV MOO ZOO (Z 3: 13-17)
Kwv tij zoo nyiam sawv daws, Zam Ntawv Moo Zoo hnub no qhia tseeb txog Huab Tais Yes Xus yog Tswv Ntuj Leej Tub tiag tiag. Nws tib leej xwb thiaj cawm peb kom dim ntawm kev txhaum, kev tsis zoo. Tswv Ntuj xa nws tuaj cawm tib neeg kuj vim tias Tswv Ntuj nyiam lub qab ntuj neeg tshaj plaws. Tswv Ntuj xa kom tib neeg muaj txoj sia nyob mus li hauv Tswv Ntuj. Tswv Ntuj thiaj xa Leej Tub tuaj cawm peb. Hauv Tswv Ntuj muaj kev nyiam kev hlub xwb. Tswv Ntuj tsis xav muab txim rau lub qab ntuj neeg. Kwv tij sawv daws, Leej Ntshiab Zam qhia kom peb paub txog Tswv Ntuj lub hom phiaj rau tib neeg. Qhov no yog lo lus teb hais tias ua cas peb yuav tsum ntseeg txog Huab Tais Yes Xus. Ua cas peb yuav tsum tuav txog Huab Tais Yes Xus lub npe. Yog peb ntseeg txog Huab Tais Yes Xus lawm, yog peb tob tom raws nws qab, kuj thov kom peb ua raws li nws lo lus qhia tiag tiag mog. Kev ua neeg raws Huab Tais Yes Xus qab yog lub sij hawm tas peb lub neej, peb yuav tsum taug hauv Tswv Ntuj txoj kev tas peb lub neej, peb yuav tsum ntseeg txog nws mus txog peb txoj sia tu. Li ntawd, ntawm peb lub neej mas, peb yuav tsum yuav lub siab tshiab txhua txhia hnub, peb yuav twm txog peb lub neej, tu siab rau qhov txhaum qhov tsis zoo peb ua, ces yuav lub siab tshiab, thov Ntuj zam txim rau peb, ces rau siab tshiab hloov yus lub siab txhua hnub tig los nhriav Tswv Ntuj, raws nws qab ntxiv mus.
Vim Tswv Ntuj nyiam lub qab ntuj neeg npaum no: nws thiaj muab nws Leej Tub twm zeej rau, kom xwv tus ntseeg txog Leej Tub txhob tuag, tab sis kom nws muaj txoj sia nyob mus li.
Nyob zoo sawv daws.
