ZAJ NYEEM HNUB TIM 14 LUB 12 HLIS 2025
HNUB CHIV, LIS PIAM 3 CAIJ TOS HUAB TAIS
COV LUS NYOB HAUV MAS TAIS NTAWV MOO ZOO (MT 11: 2-11)
Kwv tij hmoob sawv daws, hnub no yog hnub chiv lub lis piam 3, hauv lub caij Tos Huab Tais. Huab Tais Yes Xus cov lus hauv Mas Tais Ntawv Moo Zoo qhia kom peb nco ntsoov txog Huab Tais Tswv Ntuj nrog nraim peb. Tswv Ntuj nrog peb nyob mus tas ib txhiab ib txhis. Txhua txhia hnub Tswv Ntuj nrog peb nyob. Tej zaum, peb tsis pom nws, tej zaum peb tsis nco nws qab. Lub sij hawm no, thov caw peb twm txog peb lub neej thiab nug tias peb pom Tswv Ntuj hauv peb lub neej tau li cas?
Hauv Mas Tais lub Moo Zoo, Zam xa nws ib co thwj tim tuaj nug Yes Xus kom paub meej tias Yes Xus puas yog Leej Pleev, tus uas lawv tab tom tos? Huab Tais Yes Xus tsis hais lus teb tias yog nws. Tiam sis, qhov nws ua yog nws hais kom Zam cov thwj tim ntawd rov mus qhia rau Zam paub tias lawv hnov thiab pom dab tsi. Yam dab tsi thiaj yog lub cim qhia kom sawv daws paub tias Leej Pleev, tus Cawm Seej tuaj txog lawm. Qhov uas cov thwj tim yuav rov mus qhia Zam yog qhov Yes Xus twb ua. Nws kho cov dig muag kom rov pom kev, cov ceg tawv mus taus kev, cov mob ruas rov huv, cov lag ntseg hnov lus, cov tuag sawv rov los. Cov pluag tau hnov lub Moo Zoo. Cov pluag txom nyem muaj kev kaj siab lug vim lawv paub tias Huab Tais Tswv Ntuj nyob ze lawv, Tswv Ntuj nrog lawv nyob hauv lawv lub neej. Tswv Ntuj nyob tsis deb ntawm lawv ua kom lawv muaj kev vam thiab kev cia siab rau Tswv Ntuj. Tib neeg tsis yog kev vam khom vim tib neeg siab tsis dawb tsis huv, tso siab tsis tau. Tsuas yog Tswv Ntuj xwb thiaj tso siab rau nws tau. Li ntawd, qhov Huab Tais Yes Xus ua thiaj yog lub cim tshwm sim rau peb paub tias Tswv Ntuj nrog nraim peb lawm. Lub sij hawm no, thov kom peb rov saib ntawm yus tus kheej, nhriav Tswv Ntuj hauv yus lub neej. Nws nrog peb nyob peb puab pom? Nws nyob ze peb lawm, peb puas pom?
