Hnub Chiv Tim 12 Lub 5 Hlis 2024
Lub Caij Hla 7 Hnub nyoog Huab Tais Yes Xus Rov Mus Lawm Saum Ntuj
Mas Kos 16:15-20
“Nej mus thoob qab ntuj, nej tshaj lub Moo Zoo rau txhua leej txhua tus.”
Hnub chiv no yog hnub nyoog Huab Tais Yes Xus rov mus lawm saum ntuj. Caij hla yuav xaus lub lis piam no. peb tau ntsib tau pom Huab Tais Yes Xus tus Sawv Rov Los lawm, Huab Tais Yes Xus zog peb lub siab thiab nplij pe blub tswv yim kom muaj kev vam kev cia siab rau Yes Xus lawm, ntxiv mus mas nws yuav xa nws cov thwj tim, xa peb sawv daws kom mus ua txoj hauj lwm tseem ceeb yog hais tias “txoj hauj lwm tshaj lub Moo Zoo” rau luag tej paub.
Hauv Ntawv Moo Zoo hnub no, Mos Kos piav rau peb paub tias Huab Tais Yes Xus hais rau cov thwj tim tias “Nej mus thoob qab ntuj, nej tshaj lub Moo Zoo rau txhua leej txhua tus.” Nws tab tom muab ib txoj hauj lwm tseem ceeb tshaj plaws rau lawv. Thaum Huab Tais Yes Xus hais cov lus no tas rau lawv, ces Ntuj nqa nws nce mus saum ntuj. Kwv tij sawv daws, Huab Tais Yes Xus mus saum Ntuj lawm tsis txhais tias nws tsis nyob lawm, los nws tsis nrog peb nyob lawm, tsis yog. Tab txawm tias peb tsis pom nws zoo li ib tug tib neeg, peb tsis po nws cev nqaij dais tawv lawm, tsis txhais tias nws tsis nyob. Qhov tiag yog tias nws tseem nyob. Nws tseem nrog peb nyob. Nws tseem nrog cov ntseeg nyob, nws tseem nrog lub Koom Txoos nyob. Vim li no mas, nyob hauv Mas Tais Ntawv Moo Zoo, nws tsis piav txog Huab Tais Yes Xus mus saum ntuj. Tsis muaj zaj no zoo li Mas Kos tau sau tseg. Mas Tais xaus nws Ntawv Moo Zoo li no: “nej mus, nej ua kom ta sib tsoom haiv neeg los ua kuv thwj tim. Nej hu txog Leej Txiv, Leej tub thiab Leej Ntuj Plig Ntshiab lub npe, nej ntxuav lawv. Nej qhia kom lawv coj tas puas tsav yam uas kuv qhia rau nej. Hos kuv, mas kuv niaj hnub nrog nej nyob mus txog lub zim txwv ntiaj teb kawg.” Txhais luv luv tias Yes Xus tsis mus qhov twg deb deb, nws nyob ze peb, nws nrog peb nyob. Ntawm Mas Tais mas, Huab Tais Yes Xus thiaj yog “Es Mas Nus Es” tiag tiag, txhais tias “Tswv Ntuj nrog peb nyob.”
Hauv Ntawv Moo Zoo hnub no kuj zoo ib yam li thiab, Mas Kos qhia ntxiv tias “Cov thwj tim tawm mus tshaj lub Moo Zoo rau tas qhov txhia chaw, Huab Tais nrog lawv lis hauj lwm, nws ua ib co cim nres Lo Lus.” Thaum peb tshaj tawm lub Moo Zoo rau luag tej, rau peb cov kwv tij neeg tsa, Huab Tais Yes Xus kuj nyob ntawm lawv. Thaum lawv mloog Tswv Ntuj Lo Lus, khaws cia thiab ua raws, Huab Tais Yes Xus kuj nrog lawv nyob.
Kwv tij sawv daws, ua ntej Huab Tais Yes Xus mus saum Ntuj, nws hais kom peb ua txoj hauj lwm tshaj lub Moo Zoo. Qhov no yog txoj hauj lwm ntawm cov neeg ntseeg sawv daws. Thaum peb txais lub cim Ntxuav, Huab Tais Yes Xus kuj muab txoj hauj lwm no rau peb ua lawm. Ntxiv mus mas peb yuav tsum ua tim khawv txog lub Moo Zoo. Peb yuav tsum ua neej ua piv txwv ntawm txoj kev sis nyiam sis hlub rau lwm tus, ua rau lawv paub Tswv Ntuj thaum lawv pom txoj kev hlub ntawm peb lub neej, tsis yog ntawm peb qhov ncauj xwb. Txawm tias Huab Tais Yes Xus mus lawm saum ntuj, tab sis mas nws tsis tso peb pov tseg. Nws tseem nyob nrog nraim peb sawv daws txhua leej txhua tus. Peb yuav tsum ua siab loj tshaj Tswv Ntuj lo lus, ua tim khawv txog Tswv Ntuj tas siab tas tsws.
Thov kom Huab Tais Tswv Ntuj nrog nej nyob, kom nej sawv daws nyob kaj lug!
