Hnub chiv tim 10 lub 11 hli ntuj 2024
Mas Kos. 12:38-44
Lub lis piam 32th
Lub Caij Nyob Nruab Xyoo
“Tus poj ntsuam ntawd rho nyiaj hauv nws txoj kev pluag los: nws rho tas nrho nws lub cuab tam, uas nres nws txoj sia los tso rau hauv.”
Nyob zoo…
Kwv tij hmoob sawv daws, lub Moo Zoo hauv hnub no piav txog kev pub nyiaj los kev pub dawb rau luag. Cov nplua nuj tso nyiaj ntau rau hauv lub txhab ceev nyiaj, tab sis, lawv rho lawv tej nyiaj seem mus tso. Tab sis mas, thaum saib ntawm tus poj ntsuam pluag tus piv txwv, nws kuj ua ib yam li cov nplua nuj thiab. Nws tso o blub txiaj toog me me, saib zoo li tsis muaj nqi dab tsi. Tias sim mas Huab Tais Yes Xus qhua txog tus poj ntsuam no kawg vim tias nws rho nyiaj hauv nws txoj kev pluag los: nws rho tas nrho nws lub cuab tam, uas nres nws txoj sia los tso rau hauv. Vim li ntawd, ntawm Yes Xus txoj kev xav mas, tus poj ntsuam no tso nyiaj ntau dua cov uas tau tso nyiaj rau hauv lub txhab ceev nyiaj huv tib si.
Kwv tij sawv daws, Tswv Ntuj Cov Lus hnub no puas kov nej lub siab? Lub ntsiab lus tob tob hauv zaj no tsis yog hais txog qhov koj muab ntau npaum li cas, tab sis yog hais tias puas tseem ceeb rau koj uas koj muab qhov koj muaj rau pab lwm tus. Qhov yus muab tsis yog qhov seem, los khoom seem los nyiaj seem yus muab rau luag. Tab sis yog qhov yus muab los ntawm yus lub siab nyiam, los ntawm yus lub siab xav pab lwm tus. Txawm tias yus kuj tsis muaj thiab, yus kuj yog ib tug neeg txom nyem thiab, tab sis yus kuj muab qhov yus muaj rau luag, vim yus hlub lawv. Huab Tais Yes Xus qhuas txog cov ua zoo li hais tshaj. Zoo li tus poj ntsuam, txawm tias nws tsis muaj, nws muab me me xwb, tab sis, nws lub siab loj tshaj, nws rho tas nrho nws lub cuab tam, uas nres nws txoj sia los muab rau Tswv Ntuj.
Muaj ib lo lus hais tias: Tsis muaj leej twg pluag dhau uas nws tsis muaj dab tsi muab rau luag. Kuv xav tias cov lus no tseeb tiag. Tsis muaj leej twg pluag dhau uas nws tsis muaj dab tsi muab rau lwm tus. Thaum hais txog kev pub, kev muab rau luag los rau Tswv Ntuj, ntau zaus peb xav txog nyiaj txiag xwb. Yus yuav tsum pub dawb nyiaj txiag rau luag, los rau tsev teev Ntuj. Txhob xav yuam kev li ntawd. Qhov peb muab rau luag los rau Tswv Ntuj tau tsis yog nyiaj txiag xwb, tab sis yog peb lub zog los pab ua hauj lwm ntawm tsev teev Ntuj, los pab lwm tus, yog peb lub suab los hu nkauj cav txog Tswv Ntuj, yog peb lub sij hawm los muab rau lwm tus vim tias lawv tseem ceeb, peb thiaj muab lub sij hawm rau lawv. Peb muab lo lus zoo, lo lus txhawb lub zog rau luag, nej saib, muaj ntau yam peb muab tau rau luag. Yam me me zoo li peb luag ntxhi rau luag peb kuj ua tau. Tsis muaj leej twg tsis muaj luag ntxhi, puas yog? Li ntawd, mas luag ntxhi rau yus tus kheej, luag ntxhi rau yus niam yus txiv, yus me tub me nyuam, thiab luag ntxhi rau tus neeg yus pom yeej zoo tshaj.
Kwv tij hmoob sawv daws, Huab Tais Tswv Ntuj tsis saib ntawm qhov yus muab rau luag, tab sis Tswv Ntuj saib ntawm yus lub siab, yus muab mas, yus lub siab puas nyiam lwm tus, yus lub siab puas khuv leej lwm tus, yus lub siab puas hlub lwm tus?
Hauv Kos Lis Nthos Tsab 2 Zaj 9 qib 7 Leej Ntshiab Paj Lug qhia kom meej rau cov neeg ntseeg Kos Lis Nthos txog kev pub dawb thiab kev muab rau luag tej tias: “Nej nyias yuav pub raws li nyias txiav nyob hauv nyias siab. Nej txhob pub zoo li nej khuv khuv xim, thiab zoo li yog luag yuam nej, vim Tswv Ntuj nyiam tus zoo siab luag ntxhi pub.”
Li ntawd mas, kwv tij sawv daws, thaum peb pub dawb rau luag los sis thaum peb muab khoom los nyiaj pab luag tej, peb yuav tsum zoo siab luag ntxhi pub, peb yuav tsum puv siab pub. Vim Tswv Ntuj nyiam tus ua li ntawd.
