Xis Lias teb : Kev ua hauj lwm rau Tswv Ntuj thiab cov neeg nyob hauv tsov rog, thiab kev txom nyem.
Nyob Damacus nws yog tus uas sawv daws paub hauv lub npe tus Leej Phauj ua hauj lwm hauv ‘Tsev kho mob Fab Kis’, uas yog nws thiab nws lub Koom Haum saib xyuas ib lub tsev kho mob Kav Tos Liv. Nws hais txog cov neeg ntseeg tej kev ntshai, kev tsiv teb tsaws chaw ntawm cov tub ntxhais hluas thiab lawv txoj kev cia siab uas tau muab rau cov neeg mob hauv niaj hnub.
Leej Phauj Judita nyob hauv lub Koom Haum Leej Phauj ua hauj lwm, hwm Leej Ntshiab Vincent de Paul los tau 33 xyoos lawm. Hauv kev ua ib tug kws muab tshuaj uas tau kawm los, nws tau ua hauj lwm nyob hauv ntau qhov chaw nrog rau cov yeej thoj nam thiab cov thaj tsam uas muaj kev tsis sib haum xeeb, ua ntej nws mus txog Damacus. Muaj ib yam uas nws nco tau thiab tseem nyob rawv hauv nws nruab siab, yog thaum muaj neeg nug tias : “Tus poj niam uas tab tom pab peb ntawd yog leej twg ?” Tus txhais lus teb tias : “Nws yog ib tug poj niam nyiam Tswv Ntuj thiab nyiam tas ib tsoom neeg.” Lo lus ntawd nyob rawv hauv nws nruab siab txij hnub ntawd los. Nws txiav txim siab ua kws kho mob thiab tau txais lub zog txhawb siab los ntawm tej kev txhawj xeeb uas nws tau pom. Nws hais tias : “Kuv ntxhov siab txog tej kev txom nyem ntawm cov neeg khiav tsov rog thiab kev phem, vim lawv tsis muaj dab tsi nrog cev thiab xav tau kev pab tshaj plaws.” Zim txwv no nws txoj hauj lwm tau hloov txawv tag lawm. “Kuv txoj hauj lwm yog ua hauj lwm hauv tsev kho mob thiab nrhiav nyiaj txhawb nqa kom lub tsev kho mob nyob ntev mus. Thiab tuav rawv peb txoj hauj lwm uas yog ua hauj lwm pab cov neeg pluag txom nyem.”
Lub tsev kho mob no yog qhov chaw sawv daws paub dav kawg nyob Damacus, hauv lub npe ‘tsev kho mob Fab Kis’. Yog cov Leej Phauj kev ua hauj lwm hwm Leej Ntshiab Vincent de Paul. Leej Phauj Judita yog tus saib xyuas kev ua hauj lwm, thiab cov neeg ua hauj lwm feem coob yog cov neeg ntseeg txawj ntse uas yav tag los lawv muaj kev ntseeg sib txawv.
