Vaj Qhia Leo 14 koom nrog 700 tus me nyuam hais zaj Saw Mab Liab pub kev thaj yeeb rau kev tsis sib haum xeeb nyob thoob ntiaj teb.

Kev sib sau zaum no txhais tau tias yog kev pib cov hauj lwm nruab xyoos ntawm lub Koom Haum ‘Aid to the Church in Need’ uas muaj lub npe tias : “Ib plhom tus me nyuam hais Txoj Saw Mab Liab’. Yog cov hauj lwm uas sau tas cov me nyuam thiab cov neeg ntseeg lub zog nyob thoob ntiaj teb los ua ke thov Ntuj, txij hnub tim 1 txog 7 lub 10 hli no. Tsab ntawv xov xwm Vas Tis Kas tshaj tias : “Cov tuaj koom yog tuaj ntawm cov tsev teev Ntuj thiab txhua lub tsev kawm nyob ib ncig Los Mas tuaj sib sau ua ke hais Txoj Saw Mab Liab kom txwm 5 yag, uas siv xeem lus Italian, Spanish, Urdu, German thiab Arabic. Ua kom pom txog ntiaj teb cov hauj lwm no. Ua ntej yuav hais Txoj Saw Mab Liab, Tswv Qhia Kurt Koch uas nws yog tus thawj coj txhawb nqa kev muaj vaj huam sib luag ntawm cov neeg ntseeg hais tias : “Cov hauj lwm no tau ua kom cov me nyuam tau nco tias ; thaum koom nrog Niam Mab Liab lawm, lawv tuaj yeem muab ntiaj teb kev txom nyem mus cev rau Yes Xus tau.” Tswv Qhia hais tias : “Cov me nyuam yaus lub suab, cov tsis paub dab tsi muab kev tso siab rau hauv Tswv Ntuj. Yog lub suab uas raug tos txais hauv Tswv Ntuj lub siab.” Cov hauj lwm uas npaj ib lis piam no yog ua kom ib tsoom neeg nco txog kev txom nyem thiab kev cia siab nyob thoob ntiaj teb. Nrog rau cov me nyuam nyob Us Khas Zis Nas thiab hauv lwm ntsuj tsov rog, cov yim neeg nyob Lis Npaas, nyob Xis Lias thiab hauv daim av ntshiab. Cov neeg ntseeg uas raug hiam nyob Pas Kis Taas teb thiab lwm qhov chaw. Kev tsim kev sib haum xeeb nyob Xus Das Naj mus txog cov yim neeg Kws Npas thiab Ves Nes Xes Las. Tswv Qhia hais tias : “Thaum peb tab tom nco txog tus sawv rov los, peb thov kom txhob pub kev ntshai thiab kev ntxub ntxaug yog qhov muaj zog hauv kev txiav txim kawg.” Ntawm Vaj Qhia, mas nws zoo siab nrog cov me nyuam, cov niam cov txiv thiab cov Txiv Plig. Nws thov kom lawv thov qhov paj tshab tshwj xeeb ntawm Yes Xus thiab Niam Mab Liab. Qhov ntawd yog ‘thov kev thaj yeeb rau cov me nyuam nyob thoob ntiaj teb.’ Vaj Qhia piav txog kev hais Txoj Saw Mab Liab tias : “Yog zaj yooj yim uas txhua tus tuaj yeem hais tau.” Thiab hais tias cov paj ntoos uas cov me nyuam muab los hwm thaum pib hais tej yag saw ntawd, yog lub Cim ntawm kev nyiam kev hlub. Vaj Qhia hais tias kev sib sau ua ke nyob hauv Vas Tis Kas lub vaj loog, yog ib feem ua kom kev thov Ntuj nthuav dav tuaj uas muaj cov neeg ntseeg nyob thoob ntiaj teb sib koom li ntawm 1 plhom leej. Zaj koj nyob kaj lug Mab Liab 50 plhom zaj, uas nrov nce mus saum ntuj ntawm txhua ceg kaum ntuj thiab txhua xeem lus yog thov kev thaj yeeb. Sawv daws sib koom siab xws li Txoj Saw Mab Liab loj kauv ncig tas txhua xeev ntuj, txhua pab neeg thiab txhua haiv neeg nyob ntiaj teb. Dhau qhov no lawm Vaj Qhia tseem qhia cov me nyuam tias : “Kev thov Ntuj pub kev thaj yeeb ntawd ua kom lawv tus kheej txawj khuv leej, tsis hais nyob hauv tsev, nyob hauv tsev kawm ntawv, hauv chav kawm kev ntseeg thiab lub sij hawm nrog lwm tus dhia ua si. Kev teev Ntuj yuav ib txhij ua nrog kev zoo thiab kev nyiam kev hlub. Qhov ntawd yog txoj kev thaj yeeb yuav loj hlob tuaj zoo nkauj.”