Tus me nyuam tub ntawm Kerala uas pom nws nyob ib leeg ntawm lub tshav tsheb ciav hlau, rais ua Txiv Plig.
Txiv Plig Vivek Martin uas zim txwv no nws ua Txiv Plig nyob hauv lub Cheeb Koom Txoos Jhansi nyob Is Ntias qaum teb. Nws nyob ib leeg hauv lub tshav tsheb ciav hlau tsis muaj ib tug neeg nrog nws li. Tib lo lus thov uas nws hais tus neeg pab cawm nws ntawd yog lo lus tias : “Tij laug ! Kuv xav kawm ntawv.” Nws lub neej tau hloov mus yog thaum Rexy D’Cruz uas nws yog ib tug nyob hauv cov tub ntxhais hluas Yes Xus, pom Vivek nyob hauv lub tshav tsheb ciav hlau. Vim kev thov lus tso cai raws txoj cai, Rexy D’Cruz thiab nws cov phooj ywg uas yog Patrick, Jose, Rajesh thiab Tony lawv thiaj tau qhib ib lub tsev tos txais cov me nyuam pluag txom nyem. Pub kev kawm, kev nyab xeeb thiab kev nyob sov siab xws li tsev neeg rau lawv. Thaum tseem yau Vivek siv sij hawm ntau xyoo nyob nrog Patrick thiab Patrick poj niam uas yog Manu. Nws kawm ntawv tau zoo thiab qhov kawg nws tau ua tus thawj coj hauv chav kawm qib nrab xyoo 4. Tom qab Vivek kawm tiav qib nrab xyoo 4, mas nws xav mus kawm ua Txiv Plig. Tab txawm tias thaum ntej nws raug hais kom tos ib ntus tso, tsis kav nws kuj ua siab ntev kawm tiav qib nrab ntu ob ua ntej yuav mus kawm ua tub tshaj Ntuj Lus nyob hauv lub Cheeb Koom Txoos Jhansi. Kev mus kev ntawm Vivek, tau coj nws txij ntawm lub roob Attappady nyob Kerala mus txog Kochi, thiab qhov kawg kuj mus txog Jhansi hauv lub xeev Uttar Pradesh uas nyob sib nrug deb li 2,000 tawm km.
Ua ntej yuav mus kawm ua tub tshaj Ntuj Lus, Vivek yog tus neeg tsav tsheb rau tsev kho mob thiab yog tus saib Sneha Theeram nyob hauv lub nroog Aluva, xeev Kerala. Uas yog ua hauj lwm rau cov neeg mob HIV los yog mob Aids uas yog cov Txiv Plig Camillian qhia rau nws. Tej kev paub no ua rau nws nkag siab txog kev txom nyem, kev sib pom dej siab thiab kev ua hauj lwm tseeb tiag. Tswv Qhia Wilfred Moras nyob Jhansi tau tsa Txiv Plig Vivek ua Txiv Plig hnub tim 16 lub 8 hli. Nws ua thaj txi Ntuj thawj zaug hnub tim 24 lub 8 hli, nyob hauv lub tsev teev Ntuj hwm me nyuam Yes Xus, hauv lub Cheeb Koom Txoos Verapoly. Nws txoj kev txi tus kheej yog qhov zeem tseeb txog teeb meem kev kawm, kev saib xyuas thiab ua tsev neeg ruaj khov rau cov me nyuam pluag txom nyem. 2 tug me nyuam uas loj hlob nyob hauv Rexy kev saib xyuas tau txais lub Cim Tiag Tes ua Txiv Plig. Hos tseem tshuav ob tug tab tom kawm ua Txiv Plig thiab. Nayak tus qub thawj coj lub Koom Haum pab cov neeg dim ntawm dej nyab nyob Kandhamal hais tias : “Kev mus kev ntawm Txiv Plig Vivek, ua kom pom tias kev khuv leej thiab kev kawm tuaj yeem pauv ntxeev cov me nyuam lub neej tau li cas ?” Nayak hais ntxiv tias : “Tsis muaj ib tus me nyuam twg uas yuav raug teeb tseg nyob hauv lawv txoj kev pib. Thaum kev khuv leej pub lub meej mom rau cov me nyuam, kev kawm pub lub caij nyoog thiab kev ntseeg pub lub hom phiaj, tab txawm tias lub neej yog pib hauv kev raug tso tseg, tsis kav nws tuaj yeem rais ua lub neej hauv kev ua tub txib.”
Leej Phauj Goreti Nayak uas nws yog ib tug nyob hauv lub Koom Haum Leej Ntshiab As Nas nyob Bengal sab hnub poob hais tias : “Zaj hais txog Txiv Plig Vivek, ua kom pom tias txhua tus me nyuam muaj meej mom thiab muaj lub hom phiaj.” Ib tug me nyuam tub me me uas yav tag los pom nws sawv ib leeg hauv lub tshav tsheb ciav hlau, raug tos txais los ntawm cov neeg uas ntsia pom nws lub meej mom ua ntej yuav pom txog nws txoj kev txom nyem. Leej Phauj Goreti hais tias : “Hnub no nws sawv nyob ntawm lub thaj txi Ntuj, tsis yog lub Cim ntawm yam uas ploj mus, tab sis yog zeem tseeb txog yam uas kev nyiam kev hlub, kev kawm, kev khuv leej thiab kev ntseeg tuaj yeem tsim tau.” Hais txog ntawm Txiv Plig Vivek, mas kev tawm ntawm lub tshav tsheb ciav hlau mus txog lub thaj txi Ntuj, yog lub suab hu kom nws mus nyob ze cov neeg uas tab tom ntxhov siab thiab muaj kev nyuab siab. Zaj hais txog Txiv Plig ua kom pom tias kev khuv leej cov me nyuam qaug zog, tuaj yeem pauv lawv lub neej tau. Thiab qhov kawg kuj ua kom pom txog lub suab hu kom ua Tswv Ntuj tub txib.
