Synodality cov kav xwm hauv lub Koom Txoos As Xias thov kom lub Koom Txoos As Xias tseb noob hauv kev cia siab thiab kev tso siab.

Txiv Plig Clarence Devadass uas nws yog tus lwm thawj tswj ntawm pab kav xwm Synodality hauv lub Koom Txoos As Xias, tau hais lus kaw lub rooj sau siab hnub tim 3 lub 9 hli no hauv kem tsev sau siab Joseph Nattaya Conference Hall, nyob hauv lub tsev Phu Waan, nyob Bangkok. Yog kev sab laj ntawm pab kav xwm Synodality uas npaj nyob hauv 3 hnub sib law. Kev sau siab txij hnub tim 1 txog 3 lub 9 hlis no, yog pab kav xwm Synodality ntawm lub Koom Txoos Anglican nyob As Xias toob fab naj ua tus npaj. Hauv kev coj ntawm Tswv Qhia Pablo Virgilio David, yog tus Tswv Qhia Anglican nyob Fis Lis Pees teb, thiab tus thawj tswj pab kav xwm nrog rau Txiv Plig Devadass. Muaj cov neeg tuaj koom sau siab 60 tawm leej nyob thoob As Xias teb tuaj, nrog rau cov Tswv Qhia, cov Txiv Plig, cov Leej Phauj thiab cov thawj coj neeg ntseeg. Kev sau siab zaum no yog kev sib sau ntawm pab kav xwm Synodality, kom tau sib tham txog kev pib cov hauj lwm thiab tej kev txhawj xeeb uas tshwm sim tshiab, thiab txhawb nqa kev sib koom tes nrog txhua lub Koom Txoos. Nyob As Xias teb tseem ua ntxiv mus raws Synodality txoj kev. Hauv cov lus xaus lub rooj sau siab Txiv Plig Devadass hais tias : “Kev sau siab zaum no yog lub Cim hauv kev cia siab” rau lub Koom Txoos nyob As Xias thiab nyob thoob ntiaj teb. Nws lees tias pab kav xwm Synodality txhua tus tsis tuaj yeem tuaj koom tau, vim kev txwv fab logistical thiab peev nyiaj txiag. Tab sis nws txhib kom cov tuaj sau siab coj qhov uas lawv tau hauv lub rooj sau siab rov mus lawv teb chaws, rau hauv cov cheeb tsam thiab nyias pab neeg. Nws hais tias : “Peb tab tom nyob rau lub caij mus kev.” Nws piav tias : “Kev sau siab Synodality yog kev mus kev hauv kev pauv ntxeev ntawm Synodality.” Yog xav kom lub Koom Txoos sib mloog dua qub, muab siab rau mus kev ua ke ntau dua qub, thiab xav tias Leej Ntuj Plig Ntshiab yuav coj mus rau qhov twg ? Txiv Plig Devadass tseem hais rau cov tuaj sau siab kom tsis txhob qaug zog, tab txawm txhua yam mus tau qeeb. Nws hais tias tej zaum qee lub Koom Txoos twb pib tej yam tshiab lawm. Hos qee lub Koom Txoos tseem tab tom yuav pib los sis lawv ntsib ntau yam teeb meem. Qhov txawv ntawm cov hauj lwm ua yav tom ntej tsis tsim nyog muab los ua laij thawj hauv kev sib piv. Tab sis nws txhawb nqa kom cov tuaj sau siab lawv sib kawm sib qhia txog lawv tej kev paub.

Nws hais tias : “Kom lub Koom Txoos tej kev paub yog ib qho kev txhawb siab rau lwm lub Koom Txoos.” Thiab nws hais ntxiv tias kev muab siab rau ntawm lub Koom Txoos yog lub tswv yim rau lwm lub Koom Txoos thiab. Thaum uas lub Cim hauv kev cia siab me me tseem txhawb tau dej siab rau lwm tus. Nws hais raws Yes Xus cov lus paj lug uas hais txog lub noob txawj hlob nyob hauv Mas Kos ntawv Moo Zoo zaj 4 qib 26-27. Txiv Plig Devadass hais tias ; Synodality cov hauj lwm kheev kheev ua kom ntsia tsis pom tam sid. Nws hais tias : “Peb txoj hauj lwm yog ua tus tseb noob, hos Tswv Ntuj yog tus ua kom loj hlob.” Nws piav tias txhua txoj kev mloog, txhua txoj kev sib tham, txhua txoj kev muab siab rau uas yuav sau ib tsoom neeg los ua ke thiab kev ua uas siab ntev thiab kev nkag siab yuav rais ua lub noob hauv kev tsim kom lub Koom Txoos ua ib tug. Nws hais txog nws lub Koom Haum cov lus, yog tsim kev sib txhawb siab thiab rov sib txhawb zog thiab nyob rawv ntawm ib sab.

Txiv Plig Devadass txhib tias : “Kev sib koom ua ib tug tsis tsim nyog tso tseg kom tshuav lub npe los yog cov hauj lwm qhia kev ntseeg xwb. Kev sib koom ua ib tug tsis yog cov hauj lwm peb ua, tab sis yog lub neej ua neeg ntseeg.” Nws hais kom cov tuaj sau siab rov mus tsev nrog cov noob twg kuj xij, yog cov noob uas lawv tau txais nyob hauv kev sau siab 3 hnub ua ke. Tsis hais lub tswv yim tshiab, kev phooj ywg tshiab, kev nkag siab hais txog kev sib koom ua ib tug, los kev cia siab tias lawv tsis tau nyob ib leeg ntxiv mus. Txiv Plig Devadass hais tias :

“Thov nqa cov noob ntawd rov mus tsev thiab muab tseb.” Nws txhib kom cov neeg nyob hauv txhua lub teb chaws txhob qaug zog thaum pom tias av tawv los yog kev loj hlob qeeb, tab sis yuav ua hauj lwm ntxiv mus hauv kev ua siab ntev, kev ua neeg me thiab kev cia siab, vim Tswv Ntuj yog tus sau qoob loo.

Thaum kev sau siab xaus, mas Txiv Plig Devadass hais lus ua tsaug rau cov tuaj koom sau siab hauv kev qhib dav, kev ncaj ncees, kev sib faib thiab kev muab siab rau mus txog cov kav xwm uas sib pab npaj lub rooj sau siab zaum no. Nws vam tias kev sau siab 3 hnub ua ke, yuav tsis yog qhov nco cia xwb. Tab sis nws yuav ua kom txi txiv nyob hauv lub Koom Txoos As Xias ntxiv mus. Txiv Plig Devadass hais tias : “Peb rov mus tsev nrog lub peev xwm uas tau txais hauv kev txhawb nqa, tsis yog vim peb muaj cov lus teb tas nrho, tab sis vim peb paub tias peb tab tom tshais ruam ua ke. Thiab Leej Ntuj Plig Ntshiab tseem ua hauj lwm hauv tus piv txwv peb ntsia tsis pom.” Nws hais nws cov lus xaus uas yog thov kom cov tuaj sib koom sau siab ua cov tseb noob. “Lub noob ntawm kev cia siab rau lub Koom Txoos kev tshaj lub Moo Zoo raws Synodality.” Thaum lub Koom Txoos nyob As Xias maj mam ua tawm txog kev sib koom ua ib tug, kev muaj feem cuam thiab kev tshaj lub Moo Zoo.