Is Ntias teb : Cov me nyuam hauv lub Cheeb Koom Txoos Tura 5,000 tawm leej sib koom hais Txoj Saw Mab Liab thov kev thaj yeeb thoob ntiaj teb.
Cov me nyuam tau sib koom teev Ntuj rau kev thaj yeeb thiab rau cov me nyuam uas tau txais kev kub ntxhov los ntawm tsov rog thiab kev phem. Cov tsev teev Ntuj, tsev kawm ntawv thiab cov Koom Haum kev ntseeg nyob thoob lub Cheeb Koom Txoos Tura, tau npaj kom muaj teev ntuj hais Txoj Saw Mab Liab ua ke. Kom cov me nyuam tau sib koom ua ib tug hauv cov hauj lwm thoob ntiaj teb. Hauv kev teev Ntuj pub kev thaj yeeb rau txhua yam kev xav tau ntawm lub Koom Txoos, thiab pab kho ib tsoom neeg. Cov hauj lwm thoob ntiaj teb no tau txais kev txhawb nqa los ntawm lub Koom Haum ‘pab lub Koom Txoos uas tab tom kub ntxhov.’ Thov kom cov me nyuam ib plhom leej sib koom hais Txoj Saw Mab Liab mus tas lub 10 hli no. Vim qhov no Vaj Qhia Leo 14 thiaj tau txhawb nqa cov hauj lwm no, thiab koom hais Txoj Saw Mab Liab nrog cov me nyuam nyob Vas Tis Kas hnub tim 1 lub 10 hli tas los. Txiv Plig Benjamin tus muaj feem cuam pab cov hauj lwm no nyob hauv lub Cheeb Koom Txoos Tura hais tias : “Kev qhia cov me nyuam kom paub hais Txoj Saw Mab Liab pab yug lawv txoj kev ntseeg, thiab txhawb kom lawv txawj thov Ntuj rau lwm tus.” Kev qhia cov me nyuam hais Txoj Saw Mab Liab yog qhov zoo kawg hauv kev cog kev ntseeg rau lawv thaum tseem yau. Thaum cov me nyuam sib koom hais Txoj Saw Mab Liab, mas lawv yuav kawm kom paub tig mus cuag Tswv Ntuj hauv kev cia siab thiab thov kom Niam Mab Liab pab lawv thov Ntuj, nrog rau kev teev Ntuj pub kev thaj yeeb rau lub ntiaj teb thiab. Nws tseem cia siab tias cov hauj lwm no yuav pab kom cov me nyuam txawj muab Txoj Saw Mab Liab coj mus hais ntiag tug nyob hauv lawv lub neej niaj hnub. Txiv Plig hais tias : “Kuv vam tias kev ua cov hauj lwm yooj yim no, yuav rais ua ib feem ntawm lawv lub neej niaj hnub ntxiv mus.”
Cov hauj lwm nyob hauv lub Cheeb Koom Txoos no yog kev muaj feem cuam ntawm cov tsev neeg, cov xib hwb, cov qhia kev ntseeg, cov Leej Phauj thiab cov Txiv Plig. Uas lawv tau txhawb nqa kom cov me nyuam txhawj txhim kho lawv lub neej hauv kev teev Ntuj, thiab paub txhawj xeeb txog cov neeg uas tab tom ntsib kev tsis sib haum xeeb thiab kev txom nyem. Kev sib sau zaum no ua rau cov me nyuam nyob hauv lub Cheeb Koom Txoos Tura, yog ib feem hauv kev teev Ntuj thoob ntiaj teb. Yog hais txog cov tub ntxhais hluas cov hauj lwm hauv kev teev Ntuj pub kev thaj yeeb, thiab kev sib koom siab nrog cov uas tau txais kev kub ntxhov los ntawm kev phem.
