Kev tsis ncaj ncees thiab kev pluag txom nyem ua kom muaj kev mos deev tej me nyuam yaus heev zuj zus.
Kev tsis ncaj ncees thiab kev pluag txom nyem ua kom muaj kev mos deev tej me nyuam yaus heev zuj zus.
Cov yim neeg pluag nyob hauv nroog, lawv nyob hauv tej lub me nyuam tsev xws li cov tsev teb nyob Fis Lis Pees teb. Coob tshaj 1 feem 4 ntawm tas tsoom pej xeem 108 plhom tus neeg, lawv yog cov ua lub neej pluag txom nyem nyob qis tshaj txoj kab cov neeg pluag. Tab sis Fis Lis Pees teb yog ib lub teb chaws nplua nuj kawg, vim kev kav teb chaws yog nyob hauv cov neeg txheej siab uas nplua nuj thiab yog tub tseev tsim. Thaum lawv tau ua nom lawm, tsis muaj leej twg yuav ntiab lawv tawm tau. Tab sis thaum lawv tawm ntawm lawv tus nom lawm, lawv nplua nuj kawg. Vim thaum lawv ua nom lawv ceev nyiaj ntau txhiab plhom dos las tseg. Ces tab txawm lawv tawm ntawm kev ua nom mus lawm, tsis kav lawv kuj rov qab los ua nom tau yooj yim kawg, vim lawv nplua nuj.
Kev kav teb chaws uas yuam kev li no, ua rau cov sau npe xaiv tsa uas lawv nplua nuj tau zoo kev yuav suab, ces tej yam no thiaj ua rau neeg haj yam pluag txom nyem tuaj. Tsis tas li ntawd, lwm txoj kev pluag txom nyem, kuj yog los ntawm cov niam tsev tawm mus ua zog nyob txawv teb chaws. Cov neeg Fis Lis Pees uas mus ua tub zog nyob txawv teb chaws muaj 2 plhom leej, feem coob yog cov poj niam. Thiab kuj muaj ib co uas lawv ua hauj lwm nyob hauv lub teb chaws raug cai thiab tsis raug cai. Lawv ua tej hauj lwm xws li : tu vaj tu tsev, ntxhua khaub ncaws, muag toob xib ntawm ntug kev, cheb kev tsheb thiab muag toob xib hauv khw. Lawv feem coob nyob nrug deb lawv tsev neeg. Lawv tso me nyuam nyob hauv tsev tsis muaj neeg saib xyuas, thiab me nyuam tsis tau mus kawm ntawv. Vim li ntawd, cov me nyuam no thiaj yog cov raug ntxias ua dev ua npua ntau dua, vim tsis muaj tus saib xyuas lawv.
Hais raws qhov tseeb, nyob hauv ib xyoos muaj cov me nyuam raug ntxias los sis mos deev ua dev ua npua li ntawm 7 plhom leej nyob thoob Fis Lis Pees teb.
