Hnub chiv tim 2 lub 8 hlis 2026
Nyob zoo kwv tij sawv daws, hnub no peb mloog Tswv Ntuj Lo Lus tas lawm ces, muaj ib lo lus qhia tseem ceeb tias peb feem coob ntsia neej los ntawm txoj kev xav tias peb ib txwm tsis muaj txaus. Peb saib peb lub sij hawm, peb lub zog, thiab peb rab peev xwm los sis tej txuj ci hais tias “qhov no tsis txaus.” Hauv lub Moo Zoo hnub no, cov thwj tim kuj xav ib yam nkaus thiab. Thaum lawv pom 5 txhiab leej neeg tshaib plab, lawv ntsia tsuas pom tsib lub ncuav thiab ob tug ntses xwb, ces lawv xav tias yeej tsis muaj peev xwm pub tau txhua tus. Tiam sis, Huab Tais Yes Xus twv kom lawv tso txoj kev ntshai ntawd tseg. Nws tsis tos kom muaj mov ntau los txog. Nws coj tsib lub ncuav mov thiab ob tug ntses ntawd, txawm tias muaj lub ncuav mov thiab ntses tsawg tsawg, tias sis nws tsa muag ntsia saum ntuj, ua Tswv Ntuj tsaug, muab ntais, thiab faib rau sawv daws.
Ntawm peb, mas Huab Tais Yes Xus Lo Lus hnub no caw peb kom hloov peb txoj kev xav: txhob tsuas ntsia yam peb tsis muaj xwb, tiam sis cia siab muab yam peb muaj rau Tswv Ntuj. Muab peb tej “tsis txaus” rau Tswv Ntuj. Tswv Ntuj tsis thov kom peb zoo tag nrho los yog muaj txhua yam npaj txhij ua ntej peb pib ua hauj lwm. Tswv Ntuj tsuas thov kom peb muaj lub siab kam xwb. Peb txoj kev ua siab zoo me me, pe blub sij hawm thov Ntuj luv luv, los sis peb lub zog tsawg uas peb tseem muaj, tej ntawd yog qhov chaw uas Tswv Ntuj pib ua hwj huam yees ntxwv hauv lub ntiaj teb no.
Tsis tas li ntawd, kev ua Tswv Ntuj tsaug ua ntej txhua yam txawm tias yog yam me me xwb mam ua rau peb pom kev nplua nej. Huab Tais Yes Xus ua Tswv Ntuj tsaug ua ntej cov mov thiab ntses muaj ntau tuaj. Kev ua Tswv Ntuj tsaug qhib txoj kev rau kev nplua nuj. Thaum peb ua Tswv Ntuj tsaug rau yam peb twb muaj lawm, peb hloov peb lub siab ntawm kev txhawj xeeb mus rau kev tso siab rau Tswv Ntuj.
Qhov kawg mas, nco ntsoov tias tsis muaj dab tsi yuav cais tau peb ntawm Tswv Ntuj txoj kev hlub. Raws li Leej Ntshiab Paj Lug qhia hauv zaj nyeem ob, tsis hais kev txom nyem, kev nyuaj siab, los sis kev tsis muaj txaus, tsis muaj ib yam twg yuav cais tau peb ntawm Tswv Ntuj txoj kev hlub. Peb lub neej raug txhawb nqa los ntawm txoj kev hlub uas tsis muaj hnub qhuav thiab tsis muaj hnub kawg.
Li ntawd, thaum peb hnov tias tej hauj lwm hauv hnub no los lub lis piam no hnyav dhau lawm, nres ib pliag thiab muab peb "tsib lub ncuav thiab ob tug ntses" rau Tswv Ntuj. Thov ib lo lus yooj yim tias:
"Huab Tais Tswv Ntuj, hnub no kuv tsis muaj zog ntau, tiam sis kuv muab yam kuv muaj rau Koj. Thov Koj foom koob hmoov thiab muab nws nthuav kom muaj txiaj ntsig ntau." Ces Tswv Ntuj yauv pab peb, nws tsis tso peb pov tseg.
