Cov thawj coj txhua txoj kev teev hawm nyob Is Ntias teb, hais txog cov lus sib koom siab hauv lub caij tso tawm zaj yeeb yaj duab 'Batwara 1947'.
Zaj yeeb yaj duab yog ua raws cov liv xwm ntawm hauv zaj no. Yog cov xwm hais txog Is Ntias teb sib tawg thaum Aas Kiv kav teb chaws xyoo 1947, ua rau muaj kev tsiv teb tsaws chaw loj kawg thiab hais txog kev ua phem ntawm cov kev teev hawm ntau kawg. Kev tso tawm zaj yeeb yaj duab zaum no, yog RajKumar Santoshi nyob First Look hauv Santa Cruz ua tus tsim thiab kuj muaj cov sawv cev ntawm cov neeg His Ntus, cov neeg ntseeg, cov Sikh, cov Mawv Xis Lim thiab cov Phus Thas koom nrog. Ib tug koom ua yeeb yam hauv yog Txiv Plig Norbert Herman, SVD uas yog tus sawv cev cov Tswv Qhia Kav Tos Liv nyob Is Ntias. Cov tuaj saib qhuas txog zaj yeeb yaj duab no kawg, vim nws hais txog kev nyiam kev hlub, kev ncaj ncees thiab kev sib hwm uas yog qhov yeej kev sib tawg ntawm cov kev teev hawm thiab zej zog. Lawv hais tias : “Cov lus hauv zaj yeeb yaj duab tseem ceeb rau cov hluas txheej tshiab.” Tom qab saib zaj yeeb yaj duab tas, mas muaj kev npaj lub rooj sib tham nyob D.N Nagar. Cov thawj coj kev teev hawm tau tawm tswv yim thiab qhuas txog Santoshi uas siv yeeb yaj duab los txhawb nqa kev sib haum xeeb hauv zej zog thiab kev sib nkag siab ntawm cov kev teev hawm. Kev sib tham xaus rau kev nqua hu kom tsim kev sib tham, kev thaj yeeb thiab tsim kho neeg lub meej mom hauv txhua pab neeg ntseeg nyob thoob Is Ntias teb. Lawv hais tias qhov muaj ntau txoj kev teev hawm, tsim nyog ua qhov chaw sib koom siab ntau dua kev ua kom sib tawg.
