Cov sawv cev tsoom tub ntxhais hluas Thaib, koom ua pov thawj hauv kev tsuj xeeb nyob Vas Tis Kas.
Cov sawv cev tsoom tub ntxhais hluas Thaib, koom ua pov thawj hauv kev tsuj xeeb nyob Vas Tis Kas.
Kev tsuj xeeb txwm 60 xyoo ntawm tsab ntawv Nostra Aetate, uas Vas Tis Kas tshaj tawm zaum ob nyob Los Mas tsis ntev los no. Yog lub zog txhawb siab rau cov tuaj sib koom thiab 5 tug sawv cev tsoom tub ntxhais hluas Thaib. Kom tau ua hauj lwm ntxiv mus hauv kev sib tham ntawm cov kev teev hawm, kev sib hwm thiab kev thaj yeeb hauv lub ntiaj teb uas muaj kev sib cais sib faib. Cov tub ntxhais hluas Thaib, yog cov tub ntxhais kawm ntawv txheej nrab nyob hauv 5 lub tsev kawm ntawv. Lawv raug xaiv ua cov sawv cev kev thaj yeeb tsoom tub ntxhias hluas Thaib mus koom lub rooj sab laj zaum no. Ib tug nyob hauv yog Narawich Bunyarit, uas nws muaj 15 xyoos. Nws yog ib tug tub kawm nyob hauv lub tsev kawm ntawv Assumption nyob Bangkok. Cov sawv cev tsoom tub ntxhais hluas kev thaj yeeb tau koom ua pov thawj nrog pab neeg sawv cev ntawm Thaib teb. Muaj Somdej Phra Maha Thirachan uas yog tus thawj hauj sam ntawm lub tsev teev hawm Wat Pho thiab cov thawj coj kev teev hawm uas muaj tshaj 12 txoj.
Xws li kev ntseeg Yus Das, Islam, Hindu, Phus Thas, Sikhism, Jainism thiab kev ntseeg. Lawv koom nrog Vaj Qhia Leo 14 thov kev thaj yeeb ua ke.
Narawich hais nyob hauv hnub tim 8 lub 11 hlis no tias : “Yog ib qho zoo kawg uas tau pom cov thawj coj kev teev hawm coob leej koom nrog Vaj Qhia. Kev tsuj xeeb no ua kom peb pom tias ; kev sib tham tsis yog kev xaiv, tab sis yog lub luag hauj lwm ntshiab uas yuav ua kom lub ntiaj teb zoo tuaj.”
Kev tsuj xeeb yog tsa nyob Vas Tis Kas, uas yog Dicastery kev sib tham hauv cov kev teev hawm txwm 60 xyoo. Suav txij li thaum tshaj tawm tsab ntawv Nostra Aetate, los yog cog lus kev sib raug zoo ntawm lub Koom Txoos thiab lwm cov kev teev hawm uas tsis yog kev ntseeg hauv xyoo 1965.
Vaj Qhia Leo 14 zaum nrog cov hauj sam thiab cov thawj coj txhua txoj kev teev hawm nyob thoob ntiaj teb, hauv kev tsuj xeeb txwm 60 xyoo ntawm tsab ntawv Nostra Aetate nyob Vas Tis Kas. Cov sawv cev neeg Thaib kuj tau koom kev sib tham thiab tsim kev thaj yeeb nrog txhua txoj kev teev hawm.
Phurapat uas nws yog ib tug hauv cov sawv cev nyob Bangkok hais tias : “Cov hauj lwm no ua kom nws paub tias ; kev hwm qhov sib txawv, yog tus cag ntawm kev nyob ua ke. Thaum peb qhib siab mloog, peb yuav pom qhov zoo nkauj nyob hauv ntau yam sib txawv thiab ua tsaug rau peb sawv daws txoj kev sib koom ua neeg nyob.”
Kritphet Trachu tuaj ntawm lub xeev Khon Kaen, uas nyob Thaib toob fab pej tuaj, nws hais tias : “Kuv zoo siab thiab qhuas txog kev nyab xeeb ntawm cov thawj coj ntau txoj kev teev hawm. Nws ua rau kuv nco txog qhov muaj nqis hauv kev thaj yeeb, kev sib nkag siab thiab kev sib zam. Yog tus cag tseem ceeb hauv kev tsim kev sib haum xeeb nyob hauv zej zog.”
Hauv cov lus hais rau ib tsoom neeg, Vaj Qhia Leo 14 txhib cov neeg tuaj sib koom, kom txhawb kev cia siab hauv peb lub ntiaj teb uas muaj tsov rog thiab muaj kev piam sij hauv txhua yam nyob ib puag ncig. Vaj Qhia thov kom muaj kev sib koom tes ua ke. Yog tias peb sib koom tes, mas txhua yam peb yeej ua tau. Dhau ntawd Vaj Qhia thov Ntuj ntsiag to nyob hauv nws nruab siab ib me ntsis, kom pab txhib sawv daws lub siab tias : “Kev thov Ntuj tuaj yeem hloov tau peb txoj kev xav, kev hais lus thiab kev ua.”
