Cov Kav Tos Liv nyob Npees Las Des txhawj xeeb txog kev nyab xeeb, tom qab muaj tub sab nyiag tsev teev Ntuj lub tswb thiab tsoo tej mlom.
Cov xwm txheej kawg uas tshwm sim hnub tim 1 lub 10 hli nyob hauv lub tsev teev Ntuj hwm Leej Ntshiab Christina’s, hauv thaj tsam Mohammadpur nyob Dhaka. Uas teeb nyob ze cov Tswv Qhia Npees Las Des lub tsev ua hauj lwm. Tus tub sab tau nyiag lub tswb tooj dag ntawm lub tsev teev Ntuj uas hnyav li 70 kg, thiab muaj nqis li ntawm 400,000 Taka, los yog 3,300 US dos las. Tom qab no cov tub ceev xwm nrhiav pom lub tswb no raug tso pov tseg ntawm lub thoob khib nyiab ib sab hauv txoj kev Zakir Hossain. Yog tom qab pib nrhiav thiab cov tub ceev xwm tab tom soj ntsuam cov koob thau duab nyob ze ntawd, thiab nrhiav ntes tus tub sab kom sai. Hais txog cov neeg ntseeg, mas kev tub sab zaum no txaus ntshai tshaj kev nyiag cuab tam. “Peb txhawj xeeb txog tej teeb meem no, peb xav tau kev nyab xeeb rau lub tsev teev Ntuj.” Txiv Plig Kajol Purification uas nws yog tus Txiv Plig saib lub tsev teev Ntuj hwm Leej Ntshiab Christina’s hais rau RVA lub rooj ntawv xov xwm tias : “Kev tub sab zaum no rov tshwm sim ib hnub tom qab tub sab nyiag tej yam muaj nqis nyob ncig lub tsev teev Ntuj. Tus tub sab tau nyiag cov kais dej hauv tsev dej mus lawm. Nws txhov siab txog tej yam teeb meem zoo li no kawg, tab sis kuj qhuas txog cov tub ceev xwm kev koom tes tom qab teeb meem tshwm sim.” Lub tswb uas tau rov los ntawd, yog nqa ntawm Is Ntias teb los. Ib hnub tom qab uas nrhiav tau, mas coj rov mus teeb dua tshiab. Lub tsev teev Ntuj kuj tau nrhiav neeg los saib xyuas kev ruaj ntseg. Yog kev tiv thaiv yav tag los uas xav tsis tseem ceeb. Cov xwm txheej no tseem ua rau ib tsoom neeg ntxim siab kawg, uas ua rau yawg Asif Mahmud Sajib Bhuiyan tus tshaj lus ntawm National Citizen Party tau mus rau lub tsev teev Ntuj thiab hais tias : “Kev nyab xeeb ntawm cov tsev teev Ntuj yog qhov tseem ceeb hauv lub teb chaws. Thiab nws thov kom cov tub ceev xwm nrhiav tus tub sab ntes thiab coj los rau txim sai sai.”
Hnub tim 23 lub 9 hlis, cov neeg ntseeg nyob hauy lub tsev teev Ntuj hwm Leej Ntshiab Pob Zeb, hauv lub nroog Chitalmari, thaj tsam Bagerhat pom tias : Niam Mab Liab tus duab mlom raug thau tawm hauv lub thawv tsom iav los, thiab muab coj mus pov tseg rau lub pas dej nyob ze ntawd. Tab sis cov tub ceev xwm ntes tau tus tub sab uas yog yawg Faizul Sheikh hnub nyug 35 xyoos. Thiab kuj npo tau tus duab mlom tawm los lawm. Raws li tub ceev xwm cov lus hais, mas tus tub sab hais tias ; nws nkag siab yuam kev. Nws xav tias yog tej yam zoo nkauj nyob ncig tus mlom yog kub. Txawm li cas kuj xij, tub ceev xwm hais tias lawv yuav tshuaj xwm ntxiv mus. Hais txog cov neeg ntseeg nyob ntawm thaj chaw ntawd, mas cov xwm txheej no yog qhov poob siab txog kev ntseeg heev kawg.
Tus Txiv Plig saib lub tsev teev Ntuj hais tias : “Kuv mob siab kawg txog qhov rhuav tshem tus mlom Mab Liab. Niam Mab Liab yog Yes Xus niam, peb hwm nws kawg. Kuv pom tias cov teeb meem no yog kev hla txoj cai hauv kev ntseeg thiab thov kom rau txim rau tus neeg ua txhaum.” Cov thawj coj kev ntseeg puav leej qhuas txog tub ceev xwm txoj kev muab siab rau nrhiav ntes tus sab 2 zaug. Tab sis cov Kav Tos Liv feem coob hais tias : “Cov teeb meem no ua rau lawv txhawj xeeb kawg hais txog kev nyab xeeb ntawm lub tsev teev Ntuj thiab txhua yam cuab tam hauv tsev teev Ntuj.”
Ua ke ntawd, cov thawj coj Mawv Xis Lim nyob Bagerhat, tau tawm los thuam txog kev ua saib tsis taus li no. Thiab zeem tseeb txog kev sib raug zoo thiab kev ua kwv ua tij los ntev ntawm cov neeg ntseeg thiab cov Mawv Xis Lim nyob hauv cheeb tsam ntawd. Ntawm cov neeg ntseeg Kav Tos Liv, mas kev sib koom siab kuj pab tsim kev sov siab. Txawm tias tej teeb meem no yuav tshwm sim ua ntu zus li no, tsis kav kuj txhib kom muaj kev taij thov kom muaj kev tiv thaiv thiab pab txuag tej chaw teev hawm. Kom cov neeg ntseeg tau ua cov kab ke yam nyab xeeb thiab tso siab lug.
