Vaj Qhia Fas Ntshis Kus ntuas kom sawv daws txawj sib zam mus li zoo li Huab Tais Yes Xus tau ua piv txwv rau peb pom nyob hauv nws kev khuv leej tsis muaj nrim, yog peb yoog raws Tswv Ntuj kev nyiam khuv leej neeg no mas peb lub siab yuav nrov kaj tuaj.
Hnub tim 17 lub 9 hli xyoo no, ncaj rau Hnub Chiv lub Lis Piam 24 caij Nyob Nruab Xyoo, Vaj Qhia Fas Ntshis Kus rov tuaj nthuav lub Moo Zoo ua ntej yuav coj sawv daws teev Ntuj raws zaj tus Tshiab xa xov nyob hauv Leej Ntshiab Pob Zeb lub tshav puam tim Vas Tis Kas, mas Vaj Qhia tau nqua hu tsoom neeg ntseeg txog Yes Xus sawv daws kom khuv leej thiab paub zam rau lwm tus zoo li Huab Tais Yes Xus tau qhia thiab ua piv txwv.
Lub Moo Zoo raws li Mas Tais Ntawv Moo Zoo (MT 18: 21-38) hais txog thaum Leej Ntshiab Pob Zeb nug Huab Tais Yes Xus tias ‘Huab Tais, yog kuv tus kwv tij ua txhaum rau kuv, kuv puas yuav zam txog 7 xyaus rau nws?, mas Vaj Qhia nthuav tias tus zauv 7 yog tus zauv tsom txog kev zoo txhij, yog li mas Pob Zeb cov lus nug no thiaj yog nws qhib siab dav fo los nug txog kev zam txim rau ib tug neeg txhaum.
Thaum Huab Tais Yes Xus hnov Pob Zeb cov lus nug, mas Huab Tais Yes Xus lub tswv yim mus deb dhau ntawd, Huab Tais Yes Xus thiaj teb rau Pob Zeb tias ‘Kuv tsis hais kom koj zam 7 zaus, tab sis kuv hais rau koj tias koj yuav zam rau tus ua txhaum rau koj txog 70 zaus 7 zaus.’
Lo lus no hais tau tias thaum peb zam rau lwm tus, peb txhob suav ntsoov tias puas tsawg zaus lawm, yuav zoo dua yog peb zam txim rau tus neeg ua txhaum mus li, thiab peb yuav zam txhua yam rau nws.
Tos peb yuav zam mus li, vim tias Tswv Ntuj yeej ib txwm zam peb cov txhaum tas mus li zoo li zaj paj lug tus vaj zam cov nuj nqis rau tus tub txib, hnub no Huab Tais Yes Xus tau tham rau Pob Zeb thiab cov thwj tim mloog.
Huab Tais Yes Xus hais tas tas lus thiab tseeb kawg tias Tswv Ntuj zam txim rau peb mus li, ntau dua qhov peb xav thiab yuav suav tau. Yog li Vaj Qhia thiaj xav kom sawv daws cim lo lus no cia nruab siab “Tswv Ntuj zam rau peb mus li, peb suav tsis tas Tswv Ntuj kev zam.”
Tswv Ntuj zam rau peb vim Tswv Ntuj nyiam peb thiab hlub peb. Peb tsis muaj peev xwm yuav pauj rov rau Tswv Ntuj tau, tiam sis peb yoog raws Tswv Ntuj tus piv txwv no tau, yog tias peb txawj zam rau peb cov kwv tij. Vim li ntawd, kev sib zam txim thiaj tsis yog qhov zoo uas ib tug neeg twg yuav ua los tsis ua kuj tau.
Tiam sis kev zam txim rau lwm tus, yog ib yam tseem ceeb ntawm tsoom neeg ntseeg txog Yes Xus. Tswv Ntuj pub nws txoj sia rau peb thiab tsis muaj ib txog kev twg peb yuav them tas Tswv Ntuj kev khuv leej peb no tau.
Txawm li ntawd los, peb muaj peev xwm ua kom haum raws Tswv Ntuj lub siab hlub peb tau, yog ib tug zam txim rau ib tug. Peb sib zam mas yog peb tau ua pov thawj txog Tswv Ntuj, yog peb tau tseb txoj sia tshiab nyob ncig peb. Yog peb tsis txawj sib zam, mas peb yuav tsis muaj kev vam khom; yog peb tsis txawj sib zam, mas peb yuav tsis ntsib kej thaj yeeb.
Kev zam txim yog cov pa zoo hloov tau cov pa phem kom huv tuaj, kev zam txim yog kuab tshuaj kho neeg lub siab tsaus kom rov kaj tuaj, kev zam txim yog hau kev ua kom neeg lub siab npau rov nqig tau, thiab kev zam txim cawm tau neeg lub siab mob kom rov zoo.
Ua ntej yuav xaus cov lus nthuav lub Moo Zoo, Vaj Qhia xav kom sawv daws rov nug yus tus kheej tias ‘Kuv puas ntseeg tias kuv tau txais txoj kev zam ntawm Tswv Ntuj ua kuv lub paj tshab? Kuv puas xyiv fab thaum kuv paub tias hnub twg kuv ntog rau hauv qhov txhaum txawm luag tej tsis zam rau kuv, txawm kuv tsis zam rau kuv kiag, los Tswv Ntuj tseem zam rau kuv? Kuv puas txawj zam txim rau tus neeg ua phem rau kuv?’
Yog kom sawv daws txawj zam, Vaj Qhia thiaj cia sawv daws sim xyaum zoo li no tias “Peb los xav txog tus neeg tau ua phem, ua tsis zoo rau peb. Peb thov Tswv Ntuj pub lub zog rau peb kom zam tau rau nws, peb muab peb kev nyiam Tswv Ntuj los zam rau tus neeg ua txhaum rau peb ntawd.”
Vaj Qhia ntuas ntxiv tias “Thaum koj zam hauv nruab siab rau tus ua txhaum rau koj, mas koj lub siab yuav kaj tuaj.”
Yog li, hnub no Vaj Qhia thiaj thov niam Mab Liab pab peb kom txawj txais Tswv Ntuj lub txiaj ntsim thiab txawj sib zam.
