Ua ntej yuav coj sawv daws teev Ntuj raws zaj tus Tshiab xa xov, Vaj Qhia Fas Ntshis Kus tau hais txog kev nrhiav Huab Tais Yes Xus, kev tshawb kom tau lub hub ntim Huab Tais Yes Xus kev hlub tsis muaj nrim, thiab txais Huab Tais Yes Xus tuaj nyob hauv peb lub neej.
Lub Moo Zoo hauv Hnub Chiv lub Lis Piam 17 caij Nyob Nruab Xyoo yog cov lus hauv Mas Tais Ntawv Moo Zoo (MT 13: 44-52) yog Huab Tais Yes Xus hais zaj paj lug txog Ntuj lub Ceeb Tsheej zoo li lub hub nyiaj zais hauv ib daim teb, Ntuj lub Ceeb Tsheej zoo li lub hlaws npliag dej zoo nkauj, thiab Ntuj lub Ceeb Tsheej zoo li lub vas puav ntses. Hnub no Vaj Qhia thov muab zaj paj lug hais txog tus tub luag nrhiav tau lub hlaws npliag dej los twm rau sawv daws mloog.
Vaj Qhia hais tias tus tub luam ua 3 yam: nrhiav, ntsib, muas lub hlaws npliag dej los ua nws tug.
Yam ib nws ua yog ‘nrhiav’ (seek) lub hlaws npliag dej muaj nqis. Yam no tsom kom peb pom tias tus tub luam no nws ntshaw cog txoj kev npau suav zoo thiab tshawb nrhiav tej yam tshiab, vim tias tus tub luam no tsis txaus siab rau yam nws muaj lawm, nws paub tias muaj tej yam zoo dua nws cov cuab tam huv si.
Vaj Qhia hais tias kev ntshaw kom paub txog tej yam dab tsi thiab kev ntshaw lub zog no yog yam peb yuav tsum muaj thaum peb nrhiav qhov tshiab hauv Huab Tais Yes Xus, vim Huab Tais Yes Xus tsis zoo li qhov qub tas mus li tiam sis Huab Tais Yes Xus txhim qhov tshiab tas mus li rau peb lub neej.
Huab Tais Yes Xus zaj paj lug hais ntxiv tias tus tub luam ‘ntsib’ (find) yam nws nrhiav vim nws muaj lub qhov muag zoo thiab nws paub tias lub hlaws npliag dej twg thiaj yuav yog lub zoo nkauj muaj nqis tshaj cov. Muab piv los mas zoo li tus neeg mus kav kiab, nws yuav saib cov toob xib kom zoo tso nws mam yuav. Muab piv rau peb mas peb kuj yuav tau soj kom txhua tias qhov twg zoo thiab tseem ceeb rau peb.
Li ntawd, Vaj Qhia thiaj xav ntuas sawv daws kom nrhiav yam tseem ceeb thiab muaj nqis rau peb lub neej, peb yuav tau xyaum kom txawj ntsia pom lub hlaws npliag dej zoo nkauj nyob hauv tej yam zoo li tsis muaj qab hau rau peb.
Yam tim peb uas tus tub luam hauv zaj paj lug no ua; yog ‘muas’ (buy) lub hlaws npliag dej nws pom ntawd los ua nws li. Tus tub luam muab nws lub cuab tam muag kom tau nyiaj txaus los muas lub hlaws npliag dej muaj nqis ntawd rau qhov nws paub tias lub hlaws npliag dej ntawd muaj nqis dua nws lub cuab tam tas huv si, nws saib lub hlaws npliag dej ntawd yog nws kev nplua nuj, yog nws lub neej ziag no thiab tom ntej.
Vaj Qhia tig rov los hais txog cov neeg ntseeg tias lawv yog cov raug caw los paub Huab Tais Yes Xus, tus muaj nqis cuag li lub hlaws npliag dej uas peb yuav tau nrhiav kom ntsib thiab muas los ua peb lub cuab tam.
Thaum peb ntsib Huab Tais Yes Xus lawd, peb lub neej yuav hloov mus, vim tias peb tau ntsib Tswv Ntuj kev nyiam peb lawm.
Thaum peb mloog Huab Tais Yes Xus zaj paj lug no tas, peb yuav rov tig los nug peb tias tiag tiag mas peb nrhiav dab tsi hauv peb lub neej thiab puas yog peb tab tom tshawb nrhiav Tswv Ntuj thiab ua qhov zoo.
Vaj Qhia ntuas sawv daws kom xyaum soj ntsuam txog yus lub tswv yim saib yus puas pom tias dab tsi yog yam tuaj ntawm Tswv Ntuj tuaj thiab dab tsi yuav ua rau peb lub neej qhuav qhawv thiab tsim nyog yuav tau tso pov tseg.
Peb yuav tau rov soj ntsuam peb lub neej thiab nug saib peb puas tau tso txhua yam pov tseg ces tig los muab Huab Tais Yes Xus saib ua qhov loj tshaj plaws nyob hauv peb.
Peb yuav cev peb lo lus rau niam Mab Liab, kom nws pab kom peb nrhiav, ntsib, thiab txais Huab Tais Yes Xus los nyob hauv peb lub neej, nyob hauv peb lub siab lub nplawv.
